ന്യൂഡല്‍ഹി : പന്ത്രണ്ടാം ക്ലാസ് പരീക്ഷകൾ റദ്ദാക്കിയ സിബിഎസ്ഇ, ഐസിഎസ്ഇ ബോര്‍ഡുകളുടെ തീരുമാനം ചോദ്യം ചെയ്‌തുള്ള ഹര്‍ജികള്‍ സുപ്രീംകോടതി തള്ളി. പന്ത്രണ്ടാം ക്ലാസ് പരീക്ഷ മൂല്യനിര്‍ണയവുമായി ബോര്‍ഡുകള്‍ക്ക് മുന്നോട്ട് പോകാമെന്നും പരമോന്നത കോടതി അറിയിച്ചു.
ജസ്റ്റിസ് എ.എം ഖാൻവിൽക്കർ, ജസ്റ്റിസ് ദിനേശ് മഹേശ്വരി എന്നിവരടങ്ങിയ അവധിക്കാല ബെഞ്ചാണ് ഹര്‍ജികൾ തള്ളിയത്. വിദ്യാർഥികളുടെ ജീവിതം വിലപ്പെട്ടതാണെന്നും ഈ മഹാമാരിയുടെ കാലത്ത് പരീക്ഷ എഴുതാന്‍ വിദ്യാര്‍ഥികളെ നിർബന്ധിക്കാനാകില്ലെന്നും കോടതി നിരീക്ഷിച്ചു.
Read more: പന്ത്രണ്ടാം ക്ലാസ് പരീക്ഷ സൗകര്യങ്ങള്‍ ഒരുക്കുമെന്ന് സിബിഎസ്ഇ
പന്ത്രണ്ടാം ക്ലാസ് പരീക്ഷയുടെ ഫലം ജൂലൈ 31 നകം പ്രഖ്യാപിക്കുമെന്ന് സിബിഎസ്ഇ തിങ്കളാഴ്‌ച സുപ്രീംകോടതിയിൽ സത്യവാങ്മൂലം നൽകിയിരുന്നു.
മൂല്യനിര്‍ണയം സംബന്ധിച്ച തർക്കങ്ങൾ കമ്മിറ്റിക്ക് വിടുമെന്നും ബോര്‍ഡ് കോടതിയെ അറിയിച്ചു. ഓഗസ്റ്റ് 15 മുതൽ സെപ്റ്റംബർ 15 വരെ പരീക്ഷ ഓപ്‌ഷണലായി നടത്താനാണ് സിബിഎസ്ഇയുടെ തീരുമാനം.
