അലിഗഡ് (ഉത്തര്‍പ്രദേശ്‌): അലിഗഡ് മുസ്‌ലിം സര്‍വകലാശാല പെൺകുട്ടികളുടെ ഹോസ്റ്റലിൽ 400 വിദ്യാർഥികൾക്ക് ഭക്ഷ്യവിഷബാധയേറ്റതായി സംശയിക്കുന്നു (Students Get Food Poisoning In Girls Hostel). ഒക്‌ടോബർ 17ന് രാത്രി അലിഗഡ് മുസ്‌ലിം യൂണിവേഴ്‌സിറ്റിയുടെ (Aligarh Muslim University) സ്ഥാപകനായ സർ സയ്യിദ് അഹമ്മദിന്‍റെ ദിനത്തിൽ ബീഗം അസീസുൽ നിഷാ ഹോസ്റ്റലിൽ പരിപാടിയുടെ ഭാഗമായി നല്‍കിയ ഭക്ഷണത്തില്‍ നിന്നാണ്‌ ഭക്ഷ്യവിഷബാധയേറ്റതെന്ന്‌ പ്രാഥമിക നിഗമനം.
രോഗബാധിതരിൽ ചിലർ ഹോസ്റ്റലിന് പുറത്ത് നിന്നുള്ളവരാണ്. ഹോസ്റ്റലിന് പുറത്തുനിന്നുള്ള പെൺകുട്ടികളും അത്താഴ വിരുന്നിൽ പങ്കെടുത്തിരുന്നു. അത്താഴവിരുന്നിൽ പങ്കെടുത്ത നിരവധി പെൺകുട്ടികൾക്കാണ്‌ ഭക്ഷ്യവിഷബാധയേറ്റത്‌. വിദ്യാർഥിനികളുടെ നില വഷളായപ്പോൾ അവരെ ജെഎൻ മെഡിക്കൽ കോളേജിൽ പ്രവേശിപ്പിച്ചു.
വിദ്യാർഥികൾ പറഞ്ഞതനുസരിച്ച്, ബീഗം അസീസുൽ നിഷ ഹോസ്റ്റലിൽ അത്താഴം കഴിഞ്ഞ് എല്ലാ വിദ്യാർത്ഥികളും അവരവരുടെ ഹോസ്റ്റൽ മുറികളിലേക്ക് പോയി. ഹോസ്റ്റലിൽ ചില പെൺകുട്ടികളുടെ അവസ്ഥ പെട്ടെന്ന് വഷളാകാൻ തുടങ്ങി. വയറുവേദനയും ഛർദ്ദിയും അനുഭവപ്പെട്ടതായി വിദ്യാർഥികൾ പറഞ്ഞു. 400-ലധികം പെൺകുട്ടികൾക്ക് ഒരേസമയം വയറുവേദനയും ഛർദ്ദിയും അനുഭവപ്പെട്ടതിനെ തുടർന്ന് പരിഭ്രാന്തി പരത്തി. ഹോസ്റ്റൽ അധികൃതർ കുട്ടികളെ ജെഎൻ മെഡിക്കൽ കോളേജിൽ ചികിത്സയ്ക്കായി പ്രവേശിപ്പിച്ചു.
പരിപാടിയിൽ അത്താഴം കഴിച്ചതിന് ശേഷം ഭക്ഷ്യവിഷബാധയേറ്റ് നിരവധി പെൺകുട്ടികളുടെ നില വഷളായതായി എഎംയു വിദ്യാർത്ഥിനി വാനിയ മാധ്യമങ്ങളോട് പറഞ്ഞു. പല ഹോസ്റ്റലിലെയും പെൺകുട്ടികളുടെയും അവസ്ഥ മോശമായി. എത്രപേര്‍ക്ക്‌ ഭക്ഷ്യവിഷബാധ ഏറ്റിട്ടുണ്ട്‌ എന്ന കാര്യത്തില്‍ വ്യക്തമായി ധാരണയില്ല. എന്നാൽ വിദ്യാർത്ഥികൾ പറയുന്നതനുസരിച്ച് രോഗബാധിതരായ വിദ്യാർത്ഥികളുടെ എണ്ണം 400-ന് അടുത്ത് വരാം.
അത്താഴത്തിന് ശേഷം രാത്രി 1:30 ഓടെ, ചില പെൺകുട്ടികൾക്ക് നേരിയ അസ്വസ്‌ഥതകളുണ്ടെന്ന് പരാതിപ്പെട്ടതായി എഎംയു പബ്ലിക് റിലേഷൻസ് ഓഫീസർ ഒമർ പീർസാദ പറഞ്ഞു. വിദ്യാർഥിനികളെ ചികിത്സയ്ക്കായി ജെഎൻ മെഡിക്കൽ കോളേജിൽ പ്രവേശിപ്പിച്ചു. കൂടാതെ യൂണിവേഴ്‌സിറ്റി അഡ്‌മിനിസ്ട്രേഷനു വേണ്ടി വൈസ് ചാൻസലർ, ഡിഎസ്‌ഡബ്ല്യു, രജിസ്ട്രാർ, പ്രോക്‌ടർ തുടങ്ങിയവർ മെഡിക്കൽ സംഘത്തോടൊപ്പം മെഡിക്കൽ കോളേജിലെത്തി പെൺകുട്ടികളുടെ അവസ്ഥ വിലയിരുത്തി.
പ്രാഥമിക ശുശ്രൂഷയ്ക്ക് ശേഷം എല്ലാ പെൺകുട്ടികളെയും ഹോസ്റ്റലിലേക്ക് തിരിച്ചയച്ചു. സംഭവത്തിൽ സർവകലാശാല മൂന്നംഗ അന്വേഷണ സമിതിക്ക് രൂപം നൽകി. അന്വേഷണ റിപ്പോർട്ട് ഉടൻ സർവകലാശാലാ ഭരണകൂടത്തിന് സമർപ്പിക്കും. അന്വേഷണ റിപ്പോർട്ടിന്‍റെ അടിസ്ഥാനത്തിലായിരിക്കും തുടർ നടപടി.
പാൽ കുടിച്ചതിനെ തുടർന്ന് 25 ഓളം കുട്ടികള്‍ക്ക് ഭക്ഷ്യവിഷബാധ: ഗാസിയാബാദിലെ സ്‌കൂളില്‍ ഉച്ചഭക്ഷണത്തിനൊപ്പമുള്ള പാൽ കുടിച്ചതിനെ തുടർന്ന് കുട്ടികളുടെ ആരോഗ്യനില വഷളായതായി അധികൃതർ. ലോനിയിലെ പ്രേം നഗറിൽ സ്ഥിതി ചെയ്യുന്ന പ്രൈമറി സ്‌കൂളിൽ സാധാരണ ദിവസങ്ങളിലെ പോലെ തന്നെ ബുധനാഴ്‌ചയും കുട്ടികൾ പാൽ കുടിച്ചതായാണ് വിവരം. എന്നാല്‍ പാൽ കുടിച്ചയുടനെ സ്‌കൂൾ കുട്ടികൾക്ക് വയറുവേദന, തലവേദന, ഛർദ്ദി എന്നിവ അനുഭവപ്പെടുന്നതായി പരാതിപ്പെടാൻ തുടങ്ങിയതായി ഉദ്യോഗസ്ഥര്‍ പറഞ്ഞു.
ALSO READ: ഉച്ചഭക്ഷണത്തിനൊപ്പമുള്ള പാൽ കുടിച്ചതിനെ തുടർന്ന് 25 ഓളം കുട്ടികള്‍ക്ക് ഭക്ഷ്യവിഷബാധ
