ന്യൂഡല്‍ഹി : സിറം ഇന്‍സ്റ്റിറ്റ്യൂട്ട് പുറത്തിറക്കുന്ന കൊവിഷീല്‍ഡ് വാക്‌സിന്‍റെ രണ്ട് ഡോസുകള്‍ തമ്മിലുള്ള ഇടവേള കുറച്ചു. ആദ്യ ഡോസ് വാക്‌സിനെടുത്ത ശേഷം 8-16 ആഴ്‌ചകള്‍ക്കുള്ളില്‍ കൊവിഷീല്‍ഡിന്‍റെ രണ്ടാം ഡോസ് നല്‍കാന്‍ വാക്‌സിന്‍ വിതരണത്തിനുള്ള ദേശീയ സാങ്കേതിക ഉപദേശക സമിതി (എന്‍ടിഎജിഐ) ശിപാര്‍ശ ചെയ്‌തതായി ഔദ്യോഗിക വൃത്തങ്ങള്‍ അറിയിച്ചു.
നിലവിൽ ദേശീയ കൊവിഡ് വാക്‌സിനേഷന്‍ നയപ്രകാരം, ആദ്യ ഡോസ് കഴിഞ്ഞ് 12-16 ആഴ്‌ചകൾക്കിടയിലാണ് കൊവിഷീൽഡിന്‍റെ രണ്ടാം ഡോസ് നൽകുന്നത്. അതേസമയം, ഭാരത് ബയോടെക്കിന്‍റെ കൊവാക്‌സിന്‍റെ രണ്ട് ഡോസുകള്‍ തമ്മിലുള്ള ഇടവേളയ്ക്ക് മാറ്റമില്ല. കൊവാക്‌സിന്‍ ആദ്യ ഡോസ് കഴിഞ്ഞ് 28 ദിവസത്തിന് ശേഷമാണ് രണ്ടാമത്തെ ഡോസ് നൽകുന്നത്.
ദേശീയ കൊവിഡ് വാക്‌സിനേഷന്‍ പ്രോഗ്രാമിൽ ഇടവേള കുറച്ചുള്ള ശിപാർശ ഇതുവരെ നടപ്പാക്കിയിട്ടില്ല. എൻ‌ടി‌എ‌ജി‌ഐയുടെ ശിപാർശകളെ അടിസ്ഥാനമാക്കി 2021 മെയ് 13ന് കേന്ദ്ര സർക്കാർ കൊവിഷീൽഡ് വാക്‌സിന്‍റെ ആദ്യ രണ്ട് ഡോസുകൾ തമ്മിലുള്ള ഇടവേള 6-8 ആഴ്‌ചയിൽ നിന്ന് 12-16 ആയി നീട്ടിയിരുന്നു.
