ന്യൂഡല്‍ഹി: അദാനി എന്‍റര്‍പ്രൈസസ് ലിമിറ്റഡിന് തിരുവനന്തപുരം അന്താരാഷ്‌ട്ര വിമാനത്താവള നടത്തിപ്പ് പാട്ടത്തിന് കൊടുത്തതുമായി ബന്ധപ്പെട്ട സംസ്ഥാന സര്‍ക്കാറിന്‍റെ അപ്പീല്‍ ഹര്‍ജി സുപ്രീം കോടതി തള്ളി. അദാനി കമ്പനിക്ക് പാട്ടത്തിന് കൊടുത്ത തീരുമാനം ഹൈക്കോടതി ശരിവച്ചിരുന്നു. ഇതിനെതിരായി സംസ്ഥാന സര്‍ക്കാര്‍ കൊടുത്ത ഹര്‍ജിയാണ് സുപ്രീംകോടതി തള്ളിയിരിക്കുന്നത്.
അദാനി കമ്പനി തിരുവനന്തപുരം വിമാനത്താവളം 2021 ഒക്‌ടോബര്‍ മുതല്‍ പ്രവര്‍ത്തിപ്പിച്ച് കൊണ്ടിരിക്കുകയാണെന്നും പരിഗണിക്കപ്പെടേണ്ട യാതൊരു കാര്യവും ഹര്‍ജിയില്‍ ഇല്ലെന്നും ചീഫ്‌ ജസ്റ്റിസ് യു യു ലളിതും ജസ്റ്റിസ് ബെല എം ത്രിവേദിയും അംഗങ്ങളായ ബെഞ്ച് വ്യക്തമാക്കി. വിഷയത്തില്‍ കേന്ദ്ര സര്‍ക്കാറും സംസ്ഥാന സര്‍ക്കാറും തമ്മിലുള്ള ചര്‍ച്ചയാണ് കേരളത്തിന് വേണ്ടി ഹാജരായ അഭിഭാഷകന്‍ ഉന്നയിച്ചതെന്ന് സുപ്രീംകോടതി വ്യക്തമാക്കി. ലേലത്തില്‍ കോട്ട് ചെയ്യുന്ന ഏറ്റവും കൂടുതല്‍ തുകയുടെ പത്ത് ശതമാനത്തിന് ഉള്ളില്‍ സംസ്ഥാന സര്‍ക്കാറിന് 25 ശതമാനമെങ്കിലും ഓഹരിയുള്ള കമ്പനിക്ക് പ്രഥമ പരിഗണനയുണ്ടാകുമെന്ന്(right of first refusal ) ഈ ചര്‍ച്ചയില്‍ ധാരണയായി.
ഇതനുസരിച്ച് സംസ്ഥാന സര്‍ക്കാറിന്‍റ ഉടമസ്ഥതയിലുള്ള കെഎസ്ഐഡിസി ലേലത്തില്‍ പങ്കെടുക്കുകയും ചെയ്‌തു. ലേലത്തില്‍ ഏറ്റവും കൂടുതല്‍ തുക പറഞ്ഞത് അദാനി കമ്പനിയായിരുന്നു. ഒരു യാത്രക്കാരന് 168 രൂപ എന്ന നിലയിലായിരുന്നു ഇത്. എന്നാല്‍ കെഎസ്ഐഡിസി പറഞ്ഞത് ഒരു യാത്രക്കാരന് 135 രൂപ എന്ന നിലയിലായിരുന്നു. അതായത് അദാനി കമ്പനിയേക്കാള്‍ 20 ശതമാനം കുറവ്. അതുകൊണ്ട് തന്നെ കെഎസ്ഐഡിസിക്ക് പ്രഥമ പരിഗണന ഇല്ലെന്ന് ഹൈക്കോടതി വിധി ചൂണ്ടികാണിച്ചുകൊണ്ട് സുപ്രീംകോടതി വ്യക്തമാക്കി.
സംസ്ഥാന സര്‍ക്കാറിന്‍റെ ഹര്‍ജി കേന്ദ്ര സര്‍ക്കാറിന്‍റെ സ്വകാര്യവത്‌കരണ നയത്തിനെതിരായുള്ളതാണെന്നും കേന്ദ്ര സര്‍ക്കാറിന്‍റെ നയപരമായ കാര്യങ്ങളില്‍ കോടതിക്ക് ഇടപെടാന്‍ ആവില്ലെന്നുമാണ് 2020 ഒക്‌ടോബര്‍ 19ന് പുറപ്പെടുവിച്ച വിധിയില്‍ കേരള ഹൈക്കോടതി വ്യക്തമാക്കിയത്. ഹൈക്കോടതി വിധി ശരിവയ്‌ക്കുകയാണ് സുപ്രീംകോടതി ചെയ്‌തിരിക്കുന്നത്. വിമാനത്താവളത്തിന്‍റെ നടത്തിപ്പ് കരാര്‍ അദാനിക്ക് കൊടുത്ത നടപടിയില്‍ വിമാനത്താവള അതോറിറ്റി ജീവനക്കാര്‍ ഉള്‍പ്പെടെയുള്ളവര്‍ കൊടുത്ത സമാന ഹര്‍ജികളും സുപ്രീം കോടതി തള്ളി.
