ന്യൂഡൽഹി: ജനസംഖ്യ നിയന്ത്രണ ബില്ലിൽ ഉത്തർപ്രദേശ്, അസം സർക്കാരുകളെ വിമർശിച്ച് കോൺഗ്രസ് നേതാവ് ശശി തരൂർ. ജനസംഖ്യ നിയന്ത്രണം വഴി ബിജെപി രാഷ്‌ട്രീയവും വർഗീയവുമായ നീക്കമാണ് നടത്തുന്നതെന്ന് അദ്ദേഹം പറഞ്ഞു.
ഒരു പ്രത്യേക മതവിഭാഗത്തെയാണ് ജനസംഖ്യ നിയന്ത്രണ ബില്ലിലൂടെ ബിജെപി ലക്ഷ്യം വയ്ക്കുന്നതെന്നും അദ്ദേഹം വ്യക്തമാക്കി. നിലവിൽ ഇന്ത്യ നേരിടുന്ന പ്രധാന പ്രശ്‌നം ജനസംഖ്യ വർധനവല്ലെന്നും അത് വൃദ്ധരുടെ എണ്ണത്തിലെ വർധനവാണെന്നും തരൂർ കൂട്ടിച്ചേർത്തു.
യുപിയും, അസമും, ലക്ഷദ്വീപും എന്തുകൊണ്ടാണ് ജനസംഖ്യ നിയന്ത്രണത്തിൽ തിടുക്കം കൂട്ടുന്നത് എന്നതും വ്യക്തമാണെന്നും അദ്ദേഹം പറഞ്ഞു. അസമിൽ ചില കുടിയേറ്റ ബംഗാളി മുസ്ലീങ്ങളെക്കുറിച്ച് അവർ ആശങ്കാകുലരാണെന്നും ഉത്തർപ്രദേശിൽ ആദിത്യനാഥും കൂട്ടാളികളും എന്താണ് ചെയ്യുന്നതെന്ന് നമുക്കറിയാമെന്നും ലക്ഷദ്വീപിൽ 96 ശതമാനവും മുസ്ലീങ്ങളാണെന്നും അദ്ദേഹം പറഞ്ഞു.
Also Read: 'ജനനനിരക്ക് ഘട്ടങ്ങളായി കുറയ്ക്കും' ; ജനസംഖ്യ നയം പുറത്തിറക്കി യോഗി സർക്കാർ
ലോക ജനസംഖ്യ ദിനത്തോടനുബന്ധിച്ചായിരുന്നു യുപി മുഖ്യമന്ത്രി യോഗി ആദിത്യനാഥ് 2021-2030 സംസ്ഥാന ജനസംഖ്യ നയം പുറത്തിറക്കിയത്. കുട്ടികൾ കൂടുതലുള്ളവർക്ക് സർക്കാർ ആനുകൂല്യവും ജോലിയും നിഷേധിക്കുമെന്നും തെരഞ്ഞെടുപ്പിൽ മത്സരിക്കാൻ കഴിയില്ലെന്നും സർക്കാർ ജോലിയിൽ സ്ഥാനക്കയറ്റം നിഷേധിക്കുമെന്നുമടക്കമാണ് കരട് ബില്ലിൽ പറയുന്നത്.
യുപി പ്രഖ്യാപിക്കുന്നതിന് മുമ്പ് അസം മുഖ്യമന്ത്രി ഹിമന്ത ബിശ്വ ശർമ്മ ജനസംഖ്യ നിയന്ത്രണ നയം പ്രഖ്യാപിച്ചിരുന്നു.
