മുംബൈ: മഹാരാഷ്ട്ര മന്ത്രി നവാബ് മാലിക്കിനെതിരെ എന്‍സിബി ഉദ്യോഗസ്ഥന്‍ സമീർ വാങ്കഡെയുടെ പിതാവിന്‍റെ പരാതി. കുടുംബത്തിന്‍റെ ജാതിയെക്കുറിച്ച് തെറ്റായ ആരോപണങ്ങൾ ഉന്നയിച്ചതിന് പട്ടികജാതി-പട്ടികവർഗ (അതിക്രമങ്ങൾ തടയൽ) നിയമപ്രകാരമാണ് വാങ്കഡെയുടെ പിതാവ് ധ്യാൻദേവ് കെ വാങ്കഡെയുടെ പരാതി.
സകാൽ ദിനപത്രത്തിനും മറ്റ് വിവിധ തരത്തിലുള്ള മാധ്യമങ്ങള്‍ക്കും നല്‍കിയ അഭിമുഖത്തിലാണ് നവാബ് മാലിക്ക് തങ്ങളുടെ ജാതി സംബന്ധിച്ചും കുടുംബാംഗങ്ങൾക്കുമെതിരെ തെറ്റായതും അപകീർത്തികരവുമായ പ്രസ്താവന നടത്തിയതെന്നാണ് പരാതിയില്‍ പറയുന്നത്.
ഇതിന്‍റെ തെളിവുകള്‍ ആവശ്യപ്പെടുകയാണെങ്കില്‍ ഹാജരാക്കാന്‍ തയ്യാറാണെന്നും ധ്യാൻദേവ് കെ വാങ്കഡെ ഒഷിവാര ഡിവിഷന്‍ അസിസ്റ്റന്‍റ് പൊലീസ് കമ്മീഷണർക്ക് നല്‍കിയ പരാതിയില്‍ പറയുന്നു.
also read: കൊവാക്സിനെ അംഗീകരിച്ച് ബ്രിട്ടൻ; നവംബര്‍ 22മുതല്‍ പ്രവേശനാനുമതി
സമീർ വാങ്കഡെ മുസ്ലീമായാണ് ജനിച്ചതെന്നും യുപിഎസ്‌സി പരീക്ഷ പാസായതിന് ശേഷം എസ്‌സി ക്വാട്ടയിൽ പ്രവേശനം ലഭിക്കാൻ ജാതി സര്‍ട്ടിഫിക്കറ്റ് ഉള്‍പ്പെടെ വ്യാജ രേഖകൾ ഉണ്ടാക്കിയെന്നും നവാബ് മാലിക് നേരത്തെ ആരോപിച്ചിരുന്നു.
