ന്യൂഡല്‍ഹി: ഉള്ളി വില കുതിച്ചുയരുന്ന സാഹചര്യത്തില്‍ കിലോയ്‌ക്ക് 25 രൂപ നിരക്കില്‍ സബ്‌സിഡി പ്രഖ്യാപിച്ച് കേന്ദ്രം. രാജ്യത്ത് ഉള്ളി വില 57 ശതമാനം ഉയര്‍ന്ന് 47 രൂപയായതോടെയാണ്, ചില്ലറ വിപണിക്ക് ആശ്വാസമായി 25 രൂപ സബ്‌സിഡിയില്‍ സവാള കേന്ദ്രം ലഭ്യമാക്കി തുടങ്ങിയത്. വിപണിയിലെ വിലവര്‍ധനയില്‍ സാധാരണക്കാരന് സമാശ്വാസമാവാനാണ് കേന്ദ്ര നടപടി.
രാജ്യതലസ്ഥാനത്ത് സവാളയുടെ ചില്ലറ വിപണിയിലെ വില കിലോയ്‌ക്ക് 30 രൂപ എന്നതില്‍ നിന്ന് കിലോയ്‌ക്ക് 40 രൂപ എന്ന നിലയിലേക്ക് വെള്ളിയാഴ്‌ച (27.10.2023) ഉയര്‍ന്നിരുന്നു (Price Hike In Onion Price). മാത്രമല്ല മുന്‍ വര്‍ഷത്തെ ഇതേ കാലയളവില്‍ കിലോയ്‌ക്ക് 30 രൂപയായിരുന്ന സവാളയുടെ ചില്ലറ വിപണിയിലെ വില രാജ്യമൊട്ടാകെ കിലോയ്‌ക്ക് ശരാശരി 47 രൂപയായതായും ഉപഭോക്തൃ കാര്യ മന്ത്രാലയം കണ്ടെത്തിയിരുന്നു. തുടര്‍ന്നാണ് സബ്‌സിഡി നിരക്കില്‍ സവാള ലഭ്യമാക്കാനുള്ള നടപടിയിലേക്ക് കേന്ദ്രം നീങ്ങിയത്.
വിലവര്‍ധനവ് തടയാന്‍ കേന്ദ്രം: ഞങ്ങള്‍ ഓഗസ്‌റ്റ് പകുതി മുതല്‍ തന്നെ ഉള്ളി ഇറക്കി നല്‍കുന്നുണ്ട്. വിലയില്‍ കൂടുതല്‍ വര്‍ധനവെത്തുന്നത് തടയുന്നതിനും ഉപഭോക്താക്കള്‍ക്ക് ആശ്വാസം നല്‍കുന്നതിനുമായി ഞങ്ങള്‍ ചില്ലറ വിപണിയില്‍ കൂടി ശക്തമായി ഇടപെടുകയാണെന്നും ഉപഭോക്തൃ കാര്യ സെക്രട്ടറി രോഹിത് കുമാർ സിങിനെ ഉദ്ദരിച്ച് പിടിഐ റിപ്പോര്‍ട്ട് ചെയ്‌തു.
അതായത് ഉപഭോക്തൃ മന്ത്രാലയം അറിയിക്കുന്നത് പ്രകാരം വില കുത്തനെ ഉയരുന്ന സംസ്ഥാനങ്ങളിലെ ഹോള്‍സെയില്‍ ചില്ലറ വിപണികളില്‍ കരുതല്‍ സ്‌റ്റോക്കില്‍ നിന്ന് ഉള്ളി ഇറക്കുന്നുണ്ട്. ഇത്തരത്തില്‍ ഓഗസ്‌റ്റ് പകുതി മുതല്‍ 22 സംസ്ഥാനങ്ങളിലെ വിവിധയിടങ്ങളിലായി 1.7 ലക്ഷം ടണ്‍ ഉള്ളി ഇതിനോടകം ലഭ്യമാക്കിയിട്ടുണ്ടെന്നും മന്ത്രാലയം വ്യക്തമാക്കുന്നു.
മാത്രമല്ല സഹകരണ സ്ഥാപനങ്ങളായ എന്‍സിസിഎഫ്, നാഫെഡ് ഔട്ട്ലെറ്റുകള്‍ വഴിയും വാഹനങ്ങളിലായും കിലോയ്‌ക്ക് 25 രൂപ എന്ന സബ്‌സിഡി നിരക്കില്‍ ഉള്ളി ചില്ലറ വിപണിയിലെത്തുന്നുണ്ടെന്നും ഡല്‍ഹിയിലും ഈ സബ്‌സിഡി നിരക്കിലാണ് ഉള്ളി വില്‍പനയെന്നും മന്ത്രാലയം അറിയിച്ചു.
എന്തുകൊണ്ട് വില കൂടി: അതേസമയം കാലാവസ്ഥയില്‍ വന്ന മാറ്റങ്ങള്‍ ഉള്‍പ്പടെയുള്ള കാരണങ്ങളാവാം ഖാരിഫ് സീസണിലെ ഉള്ളി കൃഷിയില്‍ ബാധിച്ചതെന്നും, ഇത് വിളവിലുള്ള കുറവിനും വിളയുടെ വരവ് വൈകാനും കാരണമായെന്നും ഉപഭോക്തൃ കാര്യ മന്ത്രാലയത്തിലെ മുതിര്‍ന്ന ഉദ്യോഗസ്ഥര്‍ പറയുന്നു.
ഖാരിഫിലെ ഉള്ളി എത്തിത്തുടങ്ങേണ്ട സമയമാണിത്. എന്നാല്‍ ഇവ എത്തിയിട്ടില്ല. സംഭരിച്ച് വച്ചിരുന്ന റാബി സീസണിലെ ഉള്ളി തീര്‍ന്നുപോവുകയും ഖാരിഫിലെ ഉള്ളിയുടെ വരവ് വൈകുകയും ചെയ്‌തതോടെയാണ് വിതരണത്തില്‍ ഈ ബുദ്ധിമുട്ട് സംജാതമായതെന്നും. ഇതുവഴി ചില്ലറ മൊത്തവ്യാപാര വിപണിയില്‍ വിലവര്‍ധനവിന് കാരണമായെന്നും ഇവര്‍ അഭിപ്രായപ്പെട്ടു. മാത്രമല്ല നടപ്പുവര്‍ഷം കരുതല്‍ ശേഖരത്തിലെ ഉള്ളിയുടെ സ്‌റ്റോക്ക് സർക്കാർ ഇരട്ടിയാക്കിയിട്ടുണ്ടെന്നും ഇത് ആഭ്യന്തര ലഭ്യത സുഗമമാക്കുമെന്നും ഇവര്‍ വ്യക്തമാക്കി.
