ന്യൂഡൽഹി: നേതാജി സുഭാഷ് ചന്ദ്രബോസിന്‍റെ ഹോളോഗ്രാം പ്രതിമ പ്രധാനമന്ത്രി നരേന്ദ്ര മോദി അനാച്ഛാദനം ചെയ്തു. നേതാജിയുടെ 125 ആം ജന്മവാർഷികത്തോടനുബന്ധിച്ച് ഗ്രാനൈറ്റില്‍ തീർക്കുന്ന പൂർണകായ പ്രതിമ ഇന്ത്യ ഗേറ്റില്‍ സ്ഥാപിക്കാനാണ് സർക്കാർ തീരുമാനിച്ചിരിക്കുന്നത്. 28 അടി ഉയരവും 6 അടി വീതിയുള്ള ഗ്രാനൈറ്റ് പ്രതിമ സ്ഥാപിക്കുന്നത് വരെ നേതാജിയുടെ ഹോളോഗ്രാം പ്രതിമ അതേ സ്ഥലത്ത് ഉണ്ടാകും.
സ്വാതന്ത്ര്യ സമരത്തിൽ നേതാജിയുടെ മഹത്തായ സംഭാവനകൾക്കുള്ള ബഹുമാന സൂചകമായും രാജ്യത്തിന് അദ്ദേഹത്തോടുള്ള കടപ്പാടിന്‍റെ പ്രതീകവുമായാണ് പ്രതിമ സ്ഥാപിക്കുന്നത്. 30,000 ല്യൂമെൻസ് 4കെ പ്രൊജക്ടറാണ് ഹോളോഗ്രാം പ്രതിമയുടേത്.
അദൃശ്യവും 90 ശതമാനം സുതാര്യവുമായ ഹോളോഗ്രാഫിക് സ്‌ക്രീൻ സന്ദർശകർക്ക് ദൃശ്യമാകാത്ത വിധത്തിലാണ് സ്ഥാപിച്ചിരിക്കുന്നത്. ഹോളോഗ്രാമിന്‍റെ പ്രഭാവം സൃഷ്ടിക്കുന്നതിനായി നേതാജിയുടെ ത്രീഡി ചിത്രവും പ്രൊജക്റ്റ് ചെയ്യും.
Also read: 'പ്രതിമ സ്ഥാപിക്കുന്നതുകൊണ്ട് നേതാജിയെ ബഹുമാനിക്കുന്നുവെന്ന് അ‌ർഥമില്ല'; കേന്ദ്രത്തിനെതിരെ മമത
നേതാജി സുഭാഷ് ചന്ദ്രബോസിന്‍റെ ജന്മദിനം എല്ലാ വർഷവും പരാക്രം ദിവസായി ആഘോഷിക്കുമെന്ന് പ്രധാനമന്ത്രി നരേന്ദ്ര മോദി പ്രഖ്യാപിച്ചിരുന്നു. നേതാജിയുടെ ജന്മദിനം കണക്കിലെടുത്താണ് റിപ്പബ്ലിക് ദിനാഘോഷങ്ങൾ ഇത്തവണ ഒരു ദിവസം മുൻപേ ആരംഭിച്ചത്.
