ന്യൂഡൽഹി: പ്രധാനമന്ത്രി നരേന്ദ്ര മോദി ഈ വര്‍ഷം അമേരിക്ക സന്ദര്‍ശിച്ചേക്കും. കൊവിഡുമായി ബന്ധപ്പെട്ട ചര്‍ച്ചകള്‍ക്കായിരിക്കും മോദിയുടെ അമേരിക്കൻ സന്ദർശനമെന്നാണ് റിപ്പോർട്ട്. എന്നാല്‍ ഇതില്‍ ഔദ്യോഗിക സ്ഥിരീകരണമൊന്നുമുണ്ടായിട്ടില്ല. ജി 7 ഉച്ചകോടിയില്‍ പങ്കെടുക്കാൻ ജൂണ്‍ 12, 13 ദിവസങ്ങളില്‍ മോദി ബ്രിട്ടണിലേക്ക് പോകുന്നുണ്ട്.
അംഗരാജ്യങ്ങളായ ബ്രിട്ടണ്‍, കാനഡ, ഫ്രാൻസ്, ജർമനി, ഇറ്റലി, ജപ്പാൻ, അമേരിക്ക എന്നിവര്‍ക്ക് പുറമെ പ്രത്യേക ക്ഷണിതാക്കളായാണ് ഇന്ത്യ, ഓസ്‌ട്രേലിയ, ദക്ഷിണ കൊറിയ, ദക്ഷിണ ആഫ്രിക്ക എന്നീ രാജ്യങ്ങള്‍ ഉച്ചക്കോടിയില്‍ പങ്കെടുക്കുന്നത്. ബ്രിട്ടണാണ് ഇന്ത്യയെ ക്ഷണിച്ചത്.
also read: 'ബില്‍ഡ് ബാക്ക് ബെറ്റർ' ; ജി7 ഉച്ചകോടിയില്‍ മോദി പങ്കെടുക്കും
കൊവിഡ് ബാധയില്‍ നിന്ന് ലോകത്തെ കരകയറ്റുക, ഭാവിയില്‍ വരാനിരിക്കുന്ന മഹാമാരികളില്‍ നിന്ന് സംരക്ഷണമൊരുക്കുക, സ്വതന്ത്രവും ന്യായമായതുമായ വ്യാപാരത്തിൽ വിജയിക്കുക, കാലാവസ്ഥ വ്യതിയാനങ്ങളെ അനുകൂലമാക്കി ഭാവി ശോഭനമാക്കുക, ജൈവവൈവിധ്യത്തെ സംരക്ഷിക്കുക തുടങ്ങിയ വിഷയങ്ങളാകും ഇത്തവണ ചര്‍ച്ചയാകുക.
ഇത് രണ്ടാം തവണയാണ് ജി 7 യോഗത്തിൽ പ്രധാനമന്ത്രി മോദി പങ്കെടുക്കുന്നത്. 2019ൽ ഫ്രാൻസില്‍ നടന്ന സമ്മേളനത്തിലാണ് ഇതിന് മുന്‍പ് പങ്കെടുത്തത്.
