ന്യൂഡൽഹി: ഇന്ദിര ഗാന്ധി വിമാനത്താവളത്തിൽ ബഹളമുണ്ടാക്കിയ യാത്രക്കാരനെ പൊലീസ് അറസ്റ്റ് ചെയ്തു. ആർടിപിസിആർ റിപ്പോർട്ട് ഇല്ലാത്തതിനെ തുടർന്ന് വിമാന അധികൃതർ യുവാവിനെ എയർപ്പോട്ടിൽ തടഞ്ഞുവെച്ചു. ഇതേ തുടർന്നുണ്ടായ തർക്കമാണ് ബഹളത്തിൽ കലാശിച്ചത്.
വിസ്താര എയർലൈൻസ് ഡെപ്യൂട്ടി മാനേജർ ദീപക് ചദ്ദയിൽ നിന്ന് ലഭിച്ച പരാതിയുടെ അടിസ്ഥാനത്തിലാണ് ഉത്തർപ്രദേശിലെ രുദ്രാപൂർ സ്വദേശിയായ സൂരജ് പാണ്ഡെ തിങ്കളാഴ്ച അറസ്റ്റിലായത്.
"മുംബൈയിലേക്ക് പോകേണ്ടിയിരുന്ന വിസ്താര യുകെ 933 എന്ന വിമാനത്തിലെ യാത്രക്കാരനായിരുന്നു യുവാവ്. വിമാന ടിക്കറ്റ് കൗണ്ടറിൽ എത്തിയപ്പോൾ ആർടി പിസിആർ ടെസ്റ്റ് റിപ്പോർട്ട് ഇല്ലെന്ന് പറയുകയായിരുന്നു. റിപ്പോർട്ട് ഇല്ലാത്തവർക്ക് വിമാനത്തിൽ കയറാൻ അനുമതിയില്ല. ഇതേ തുടർന്നുണ്ടായ തർക്കമാണ് ബഹളത്തിൽ കലാശിച്ചത്.", ചദ്ദയുടെ പരാതിയിൽ പറയുന്നു.
ബഹളം വച്ചു തുടങ്ങിയ ഇയാൾ മറ്റ് യാത്രകാർക്കും ജീവനകാർക്കും ബുദ്ധിമുട്ടുകൾ ഉണ്ടാക്കി. ഇതെല്ലാം സിസിടിവി ദൃശ്യങ്ങളിൽ പതിഞ്ഞിട്ടുണ്ട്. യുവാവ് അക്രമാസക്തനായതോടെ സിഐഎസ്എഫ് ഉദ്യോഗസ്ഥർ ഇയാളെ പിടിച്ചുകൊണ്ടുപോകുന്നതിന്‍റെ സിസിടിവി ദൃശ്യങ്ങളും പൊലീസിന് ലഭിച്ചിട്ടുണ്ട്.
Also Read: കൊവിഡ് ഡെൽറ്റ പ്ലസ് അപകടകാരി; കേരളത്തിനടക്കം മുന്നറിയിപ്പ്
സിസിടിവി ദൃശ്യങ്ങളുടെ അടിസ്ഥാനത്തിൽ പൊലീസ് അന്വേഷണം ആരംഭിച്ചതായി ഡൽഹി പൊലീസ് അറിയിച്ചു. കോടതിയിൽ ഹാജരാക്കിയ യുവാവിനെ ജാമ്യത്തിൽ വിട്ടു. കേന്ദ്ര സർക്കാർ ഉത്തരവ് പ്രകാരം വിമാനയാത്രക്ക് ആർടി പിസിആർ നിർബന്ധമാണ്.
