ന്യൂഡല്‍ഹി: കഴിഞ്ഞ ദിവസം പാര്‍ലമെന്‍റ് മന്ദിരത്തിന് അകത്തും പുറത്തും നടന്ന സംഭവങ്ങളുടെ പശ്ചാത്തലത്തില്‍ സുരക്ഷ കൂടുതല്‍ കര്‍ശനമാക്കാന്‍ കേന്ദ്ര സര്‍ക്കാര്‍ തീരുമാനിച്ചു. അതേ സമയം കളര്‍ സ്‌പ്രേകളുമായി പ്രതിഷേധിച്ച് അറസ്‌റ്റിലായ പ്രതികള്‍ക്കെതിരെ ഐപിസി വകുപ്പുകള്‍ക്ക് പുറമെ യുഎപിഎ കൂടി ഡല്‍ഹി പൊലീസ് ചുമത്തി (The Delhi Police has registered a case under the stringent Unlawful Activities (Prevention) Act). 2001 ല്‍ പാര്‍ലമെന്‍റിനു നേരെ നടന്ന ആക്രമണത്തിന്‍റെ വാര്‍ഷിക ദിനാചരണ ദിവസം തന്നെ പ്രതികള്‍ പാര്‍ലമെന്‍റ് മന്ദിരത്തിനുള്ളില്‍ കടന്ന് കയറി പ്രതിഷേധിച്ചതിനെ അതീവ ഗൗരവത്തോടെയാണ് സര്‍ക്കാര്‍ നോക്കിക്കാണുന്നത്.
ലോക്‌സഭയില്‍ ശൂന്യവേള നടക്കുന്നതിനിടെയാണ് സാഗര്‍ ശര്‍മ്മ, മനോരഞ്ജന്‍ എന്നിവര്‍ കളര്‍ സ്‌പ്രേയുമായി സന്ദര്‍ശക ഗ്യാലറിയില്‍ നിന്ന് അംഗങ്ങളുടെ മധ്യത്തിലേക്ക് എടുത്ത് ചാടിയത്. ഏറെ കുറെ അതേ സമയത്ത് തന്നെയാണ് നീലംദേവി എന്ന് പേരുള്ള യുവതിയും അമോല്‍ ഷിന്‍ഡെ എന്ന യുവാവും മന്ദിരത്തിന് പുറത്ത് കളര്‍ സ്‌പ്രേകളുമായി പ്രതിഷേധിച്ചത്. സംഭവത്തില്‍ നാലുപേരെയും പൊലീസ് ഉടന്‍ തന്നെ പിടികൂടി. ഇവര്‍ക്കെതിരെ ഐപിസി വകുപ്പുകള്‍ക്ക് പുറമെ ആണ് യുഎപിഎ കൂടി ഡല്‍ഹി പോലീസ് ചുമത്തിയത്.
സുരക്ഷാ ക്രമീകരണങ്ങള്‍: അതേ സമയം സുരക്ഷയുടെ ഭാഗമായി ഇനിമുതല്‍ എം പിമാരെ പ്രത്യേക ഗേറ്റിലൂടെ മന്ദിരത്തിനകത്ത് പ്രവേശിപ്പിക്കാനാണ് തീരുമാനം. കൂടാതെ മാധ്യമ പ്രവര്‍ത്തകര്‍ക്കും ജീവനക്കാര്‍ക്കും പ്രത്യേക ഗേറ്റ് സജീകരിക്കാനും തീരുമാനമായി. സന്ദര്‍ശ ഗ്യാലറിയില്‍ ഗ്ലാസ് മറ നിര്‍ബന്ധമാക്കും, സന്ദര്‍ശകര്‍ക്ക് പാസ് അനുവദിക്കുന്നത് താല്‍കാലികമായി നിറുത്തിവയ്ക്കാനും സര്‍ക്കാര്‍ തീരുമാനിച്ചു. ഗേറ്റുകളില്‍ ബോഡി സ്‌കാനിങ്ങ് മിഷീനുകള്‍ സ്ഥാപിക്കുകയും ചെയ്യും.
ഇന്നലെ ഉണ്ടായ അനിഷ്‌ട സംഭവങ്ങളെ കുറിച്ച് അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ സിആര്‍പിഎഫ് ഡിജി അനീഷ് ദായാലിന്‍റെ നേതൃത്വത്തിലുള്ള സംഘത്തെ കേന്ദ്ര ആഭ്യന്തര മന്ത്രാലയം ചുമതലപ്പെടുത്തി. സുരക്ഷയില്‍ പാളിച്ച സംഭവിച്ചത് എങ്ങനെയാണെന്നും എന്തൊക്കെ തിരുത്തല്‍ നടപടികളാണ് വേണ്ടതെന്നും സംഘം സര്‍ക്കാരിനോട് ശുപാര്‍ശ ചെയ്യും.
കേസിന്‍റെ അന്വേഷ ചുമതല തല്‍ക്കാലം കേന്ദ്ര ഏജന്‍സികള്‍ ഏറ്റെടുക്കില്ലെന്നാണ് സൂചന, അതേ സമയം കേസ് പൂര്‍ണമായും ഡല്‍ഹി പൊലീസിലെ സ്‌പെഷ്യല്‍ സെല്ലിന് കൈമാറും. പിടിയിലായവര്‍ക്ക് ഭീകര ബന്ധമോ പറയത്തക്ക രാഷ്ട്രീയ ബന്ധങ്ങളോ ഇല്ലെന്നാണ് അന്വേഷണ സംഘം നല്‍കുന്ന വിവരം. എന്നാല്‍ കഴിഞ്ഞ രാത്രി ചേര്‍ന്ന് അടിയന്തിര സുരക്ഷാ യോഗം ഇക്കാര്യം വളരെ ഗൗരവത്തോടെയാണ് കാണുന്നത്. അതുകൊണ്ടാണ് പ്രതികള്‍ക്കെതിരെ അതിക്രമിച്ച് കടക്കല്‍ , ക്രിമിനല്‍ ഗൂഢാലോചന എന്നിവയ്ക്ക് പുറമെ യുഎപിഎ കൂടി ചുത്തിയത്.
സുരക്ഷാ വീഴ്‌ച പ്രതിപക്ഷം ആയുധമാക്കാനുള്ള സാധ്യതയും കേന്ദ്രം തള്ളിക്കളയുന്നില്ല. പാര്‍ലമെന്‍റില്‍ സംഭവത്തെക്കുറിച്ച് കേന്ദ്ര ആഭ്യന്ത്ര മന്ത്രി അമിത് ഷാ പ്രസ്‌താവന നടത്തണമെന്ന് പ്രതിപക്ഷം ആവശ്യപ്പെടുമെന്നാണ് അറിയുന്നത്. കൂടാതെ ഇക്കാര്യത്തില്‍ രാഷ്‌ട്രപതിയെ കാണാനും പ്രതിപക്ഷം നീക്കം നടത്തുന്നുണ്ട്.
പാര്‍ലമെന്‍റ് മന്ദിരത്തിലെ സുരക്ഷ കര്‍ശനമാക്കാന്‍ അത്യാധുനിക ഉപകരണങ്ങള്‍ ഉള്‍പ്പെടെയുള്ള സൗകര്യങ്ങളേര്‍പ്പെടുത്താന്‍ ഈ ആഴ്‌ചയാണ് കേന്ദ്രം ടെന്‍ഡര്‍ ക്ഷണിച്ചത്. അതിനിടെയാണ് അനിഷ്‌ട സംഭവങ്ങള്‍ അരങ്ങേറിയത്
