ശ്രീനഗർ: ലഷ്‌കറെ ത്വയിബ ഭീകരർക്ക് രഹസ്യവിവരങ്ങൾ ചോർത്തിയെന്നാരോപിച്ച് മുതിർന്ന പൊലീസുദ്യോഗസ്ഥനെ ദേശീയ അന്വേഷണ ഏജൻസി അറസ്റ്റ് ചെയ്‌തു. 2021 നവംബർ 6ന് രജിസ്റ്റർ ചെയ്‌ത കേസുമായി ബന്ധപ്പെട്ട് ഷിംല പൊലീസ് സൂപ്രണ്ട് അരവിന്ദ് ദിഗ്‌വിജയ് നേഗി ഉൾപ്പെടെ ആറ് പേരാണ് അറസ്റ്റിലായത്.
2011ൽ ഐപിഎസ് ഓഫിസറായി സ്ഥാനക്കയറ്റം ലഭിച്ച നേഗി നേരത്തെ എൻഐഎയിൽ സേവനമനുഷ്ഠിച്ചിട്ടുണ്ട്. എൻഐഎയിൽ നിന്ന് തിരിച്ചയച്ച ശേഷമാണ് നേഗിയെ ഷിംല എസ്പിയായി നിയമിച്ചത്. ലഷ്‌കറെ ത്വയിബ ഭീകരർക്ക് പ്രാദേശിക പിന്തുണ നൽകിയ കാര്യം എൻഐഎ അന്വേഷിക്കുകയാണെന്ന് മുതിർന്ന പൊലീസ് ഉദ്യോഗസ്ഥൻ പറഞ്ഞു.
അന്വേഷണത്തിനിടെ ഉദ്യോഗസ്ഥർക്ക് നേഗിയുടെ പെരുമാറ്റത്തിൽ സംശയം തോന്നിയിരുന്നു. തുടർന്ന് നടത്തിയ അന്വേഷണത്തിലാണ് നേഗി വിവരങ്ങൾ ചോർത്തി നൽകിയതായി കണ്ടെത്തിയത്. തുടർന്ന് വീട് പരിശോധിച്ചപ്പോൾ എൻഐഎയുടെ രഹസ്യ രേഖകൾ ലഷ്‌കറെ ത്വയിബ സഹായിക്ക് ചോർത്തി നൽകിയതായി കണ്ടെത്തി. ലഷ്‌കറെ ത്വയിബ സഹായിയെയും കേസിൽ പ്രതി ചേർത്തിട്ടുണ്ടെന്ന് പൊലീസ് ഉദ്യോഗസ്ഥൻ പറഞ്ഞു.
നേഗിയുടെ അറസ്റ്റ് ഏജൻസിയുടെ അന്വേഷണത്തിന്‍റെ വ്യാപ്തി വർധിപ്പിച്ചുവെന്നും കൂടുതൽ അറസ്റ്റ് ഉണ്ടായേക്കാമെന്നും പൊലീസ് ഉദ്യോഗസ്ഥൻ പറഞ്ഞു.
Also Read: വ്യാപം കുഭകോണം: സിബിഐ കുറ്റപത്രത്തില്‍ 160 പേര്‍ കൂടി
