കൊൽക്കത്ത: നിയമസഭ തെരഞ്ഞെടുപ്പിന് പിന്നാലെ പശ്ചിമ ബംഗാളിൽ നടന്ന അക്രമ സംഭവങ്ങളിൽ അന്തിമ റിപ്പോർട്ട് സമർപ്പിച്ച് ദേശീയ മനുഷ്യാവകാശ കമ്മിഷൻ. കൊൽക്കത്ത ഹൈക്കോടതിയിലാണ് മനുഷ്യാവകാശ കമ്മിഷൻ റിപ്പോർട്ട് സമർപ്പിച്ചത്. സംഭവത്തിൽ സിബിഐ അന്വേഷണം നടത്തണമെന്ന് കമ്മിഷൻ റിപ്പോർട്ടിൽ ശുപാർശ ചെയ്‌തിട്ടുണ്ട്.
കമ്മിഷന്‍റെ അഞ്ച് വ്യത്യസ്‌ത സംഘങ്ങൾ അക്രമ സംഭവങ്ങൾ അരങ്ങേറിയ 311 സ്ഥലങ്ങളിൽ നേരിട്ടെത്തി പരിശോധനകൾ നടത്തിയതിന് ശേഷമാണ് റിപ്പോർട്ട് സമർപ്പിച്ചത്. നേരത്തെ കമ്മിഷൻ ഒരു ഇടക്കാല റിപ്പോർട്ട് കോടതിയിൽ സമർപ്പിച്ചിരുന്നെങ്കിലും ഇപ്പോഴാണ് പൂർണ റിപ്പോർട്ട് സമർപ്പിക്കുന്നത്.
റിപ്പോർട്ടിൽ ഇടംപിടിച്ച് പ്രമുഖരും
വോട്ടെടുപ്പിന് ശേഷമുള്ള അക്രമത്തിന് ഉത്തരവാദികളായ നിരവധി സാമൂഹിക വിരുദ്ധരെക്കുറിച്ചും കമ്മിഷൻ റിപ്പോർട്ടിൽ പ്രതിപാദിക്കുന്നുണ്ട്. ഈ ഘടകങ്ങളെല്ലാം തൃണമൂൽ കോൺഗ്രസുമായി ബന്ധപ്പെട്ടിരിക്കുന്നുവെന്നും കമ്മിഷൻ നിരീക്ഷിച്ചു. കമ്മിഷന്‍റെ റിപ്പോർട്ടിൽ നിരവധി തൃണമൂൽ എം‌എൽ‌എമാരും ഉന്നത നേതാക്കളും ഉൾപ്പെട്ടിട്ടുണ്ടെന്നും വ്യക്തമാണ്.
കൂച്ച് ബെഹാർ ജില്ലയിലെ സിതാൽകുച്ചി, സീതായ്, ദിൻ‌ഹത, തുഫാങ്കുഞ്ച്, കോട്‌വാലി മേഖലകളിലെ അക്രമ സംഭവങ്ങളെക്കുറിച്ച് കമ്മിഷൻ റിപ്പോർട്ടിൽ പ്രത്യേകം പരാമർശിച്ചിട്ടുണ്ട്. കൂടാതെ, റിപ്പോർട്ടിൽ മുൻ തൃണമൂൽ കോൺഗ്രസ് കൗൺസിലർ ജോയ്‌ദീപ് ഘോഷ്, ദിൻ‌ഹാറ്റയിൽ നിന്നുള്ള മുൻ തൃണമൂൽ കോൺഗ്രസ് എം‌എൽ‌എ ഉദയൻ ഗുഹ എന്നിവരുടെ പേരുകളും ഉൾപ്പെട്ടിട്ടുണ്ട്.
കൊൽക്കത്തയിൽ നിന്നുള്ള പട്ടികയിൽ ചിത്പൂർ ഏരിയയിൽ നിന്നുള്ള തൃണമൂൽ നേതാവ് ഉമ ദാസിന്‍റെയും ഭർത്താവ് ലാൽതു ദാസിന്‍റെയും പേരുകളും ഉൾപ്പെട്ടിട്ടുണ്ട്.
മുഖ്യമന്ത്രി മമത ബാനർജിയുടെ തെരഞ്ഞെടുപ്പ് ഏജന്‍റ് ഷെയ്ഖ് സുഫിയാൻ ഉൾപ്പെടെ അഞ്ച് പേരുകളാണ് നന്ദിഗ്രാമിൽ നിന്നും പട്ടികയിലിടം പിടിച്ചിരിക്കുന്നത്. ഇതിന് പുറമെ, തൃണമൂൽ കോൺഗ്രസ് എം‌എൽ‌എമാരായ ജ്യോതിപ്രിയ മല്ലിക്, ഖോകാൻ ദാസ് എന്നിവരുടെ പേരുകളും പട്ടികയിൽ ഉണ്ട്.
പൊലീസ് സ്റ്റേഷനുകൾക്കെതിരെയും വിമർശനം
വോട്ടെടുപ്പിന് ശേഷം അക്രമം അരങ്ങേറുമ്പോൾ നിഷ്‌ക്രിയമായി തുടർന്ന പൊലീസ് സ്റ്റേഷനുകളെയും ഉദ്യോഗസ്ഥരെയും കമ്മിഷൻ റിപ്പോർട്ടിൽ വിമർശിച്ചിട്ടുണ്ട്. ഈ പൊലീസ് സ്റ്റേഷനുകളിൽ പലതിലും അക്രമസംഭവങ്ങൾക്ക് ശേഷം കുറ്റപത്രം പോലും തയ്യാറാക്കിയിരുന്നില്ലെന്നും കമ്മിഷൻ ചൂണ്ടിക്കാട്ടി.
കുറ്റങ്ങൾ പലത്
പൊതുസ്വത്ത് നശിപ്പിക്കൽ, വൈദ്യുതി ബന്ധം വിച്ഛേദിക്കൽ, കൊള്ളയടിക്കൽ തുടങ്ങിയ സംഭവങ്ങളും നടന്നതായി കമ്മിഷൻ റിപ്പോർട്ടിൽ പറയുന്നുണ്ട്. സിബിഐ അന്വേഷണത്തിന് പുറമേ, കേസ് പ്രത്യേക കോടതി പരിഗണിക്കണമെന്നും പ്രത്യേക അന്വേഷണ സംഘം (എസ്ഐടി) മേൽനോട്ടം വഹിക്കണമെന്നും കമ്മിഷൻ ശുപാർശ ചെയ്‌തിട്ടുണ്ട്.
ഇരകൾക്ക് സുരക്ഷ ഉറപ്പുവരുത്തുന്നതിനായി അക്രമബാധിത സ്ഥലങ്ങളിൽ കേന്ദ്ര സായുധ സേനയെ വിന്യസിക്കാനും കമ്മിഷൻ ശുപാർശ ചെയ്‌തു. സ്‌ത്രീകളുടെ സുരക്ഷയിൽ ജാഗ്രത പാലിക്കണമെന്നും കമ്മിഷൻ കൊൽക്കത്ത ഹൈക്കോടതിയോട് പ്രത്യേകം അഭ്യർഥിച്ചു.
Also Read: ബംഗാളിലെ തോല്‍വി അംഗീകരിക്കാൻ മോദിക്ക് ആകുന്നില്ലെന്ന് മമത ബാനർജി
