ന്യൂഡല്‍ഹി: എംബിബിഎസ് പഠനം ഒന്‍പത് വര്‍ഷത്തിനുള്ളില്‍ പൂര്‍ത്തിയാക്കണമെന്ന് ദേശീയ മെഡിക്കല്‍ കമ്മിഷന്‍. മെഡിക്കല്‍ ബിരുദ പഠനത്തിന് പ്രവേശനം നേടുന്ന മുഴുവന്‍ വിദ്യാര്‍ഥികളും ഒന്‍പത് വര്‍ഷത്തിനുള്ളില്‍ പഠനം പൂര്‍ത്തിയാക്കണമെന്നും ആദ്യ അധ്യയന വര്‍ഷത്തെ എല്ലാ വിഷയങ്ങളിലും നാലു ശ്രമങ്ങള്‍ക്കുള്ളില്‍ വിജയിക്കണമെന്നുമാണ് കമ്മിഷന്‍റെ നിര്‍ദേശം. മെഡിക്കല്‍ വിദ്യാഭ്യാസ രംഗം കൂടുതല്‍ കാര്യക്ഷമമാക്കാനുള്ള ഗ്രാജ്വേറ്റ് മെഡിക്കല്‍ എജ്യുക്കേഷന്‍ റെഗുലേഷന്‍സ് കരട് നിര്‍ദേശത്തിലെ വ്യവസ്ഥകളാണിത്.
ഒന്‍പത് വര്‍ഷത്തിന് ശേഷം ഒരു കാരണവശാലും ഒരു വിദ്യാര്‍ഥിക്കും പഠനം തുടരാന്‍ സാധിക്കില്ല. മാത്രമല്ല ഒരു വിദ്യാര്‍ഥിക്കും ഒരു വിഷയത്തിലും നാലില്‍ കൂടുതല്‍ തവണ പരീക്ഷകള്‍ എഴുതാന്‍ അനുവദിക്കില്ല. പുതുതായി പുറത്തിറക്കിയ ഗ്രാജ്വേറ്റ് മെഡിക്കല്‍ എജ്യുക്കേഷന്‍ റെഗുലേഷന്‍സ് പ്രകാരം രാജ്യത്തെ മുഴുവന്‍ മെഡിക്കല്‍ കോളജുകളിലും മെറിറ്റ് അടിസ്ഥാനത്തില്‍ പ്രവേശനം നടത്തുന്നതിന് ഒരു പൊതു കൗണ്‍സലിങ് ഉണ്ടായിരിക്കും.
എന്‍എംസി (ദേശീയ മെഡിക്കല്‍ കമ്മിഷന്‍) നല്‍കുന്ന നിര്‍ദേശത്തിന് അനുസരിച്ചായിരിക്കും കൗണ്‍സലിങ്ങിന്‍റെ പ്രവര്‍ത്തനം. കൗണ്‍സലിങ്ങിനായി സര്‍ക്കാര്‍ ഒരു അതോറിറ്റിയെ നിയമിക്കും. വിദ്യാര്‍ഥികളുടെ അഡ്‌മിഷനുമായി ബന്ധപ്പെട്ടുള്ള മുഴുവന്‍ കാര്യങ്ങളും ഈ അതോറിറ്റിയുടെ മേന്‍നോട്ടത്തിലായിരിക്കും. പുതിയ ചട്ടങ്ങള്‍ക്ക് വിരുദ്ധമായി ഒരു മെഡിക്കല്‍ സ്ഥാപനത്തിലേക്കും വിദ്യാര്‍ഥികളെ പ്രവേശിപ്പിക്കരുതെന്നും ചട്ടങ്ങളില്‍ വ്യക്തമാക്കുന്നു.
വിജ്ഞാപനത്തിലെ മറ്റ് വ്യവസ്ഥകള്‍: രാജ്യത്ത് ഉടനീളമുള്ള മുഴുവന്‍ മെഡിക്കല്‍ കോളജുകളിലും സ്റ്റുഡന്‍സ് അസോസിയേഷനുകള്‍ രൂപീകരിക്കും. ഈ അസോസിയേഷനുകളിലൂടെ മെഡിക്കല്‍ വിദ്യാര്‍ഥികള്‍ക്ക് തങ്ങളുടെ അഭിപ്രായങ്ങള്‍ അറിയിക്കാനാകും. പൊതു ക്ഷേമ കാര്യങ്ങളില്‍ അടക്കം വിദ്യാര്‍ഥികള്‍ക്ക് തങ്ങളുടെ അഭിപ്രായം അറിയിക്കാവുന്നതാണ്.
പഠനത്തിനിടെ വിദ്യാര്‍ഥികള്‍ക്ക് പഠന സ്ഥാപനങ്ങള്‍ മാറുന്നതിനും വ്യവസ്ഥകളില്‍ സൂചിപ്പിക്കുന്നുണ്ട്. മാനദണ്ഡങ്ങള്‍ പാലിച്ച് വിദ്യാര്‍ഥികള്‍ക്ക് സ്ഥാപനങ്ങള്‍ മാറാവുന്നതാണ്. ഒരു സര്‍ക്കാര്‍ കോളജില്‍ നിന്നും മറ്റൊരു മെഡിക്കല്‍ കോളജിലേക്കും ഒരു സ്വകാര്യ കോളജില്‍ നിന്നും മറ്റൊരു സ്വകാര്യ കോളജിലേക്കും മാത്രമെ മാറാന്‍ സാധിക്കൂവെന്നും വിജ്ഞാപനത്തില്‍ പറയുന്നു. ഒന്‍പത് ഓപ്‌ഷണല്‍ വിഷയങ്ങളാണ് പാഠ്യപദ്ധതിയുടെ ഭാഗമാകുന്നത്. അതില്‍ അഞ്ചെണ്ണം നിര്‍ബദ്ധമായും പഠിക്കണമെന്നും നാലെണ്ണം വിദ്യാര്‍ഥികള്‍ക്ക് തെരഞ്ഞെടുക്കുകയും ചെയ്യാം.
പിന്‍വാതില്‍ നിയമങ്ങള്‍ ഇല്ലാതാക്കും: മെഡിക്കല്‍ വിദ്യാഭ്യാസ രംഗത്ത് കോഴ വാങ്ങിയുള്ള പിന്‍വാതില്‍ നിയമനങ്ങളും തടയും. ഇത്തരം അന്യായമായ നിയമനങ്ങള്‍ തടഞ്ഞ് പ്രവേശന നടപടികള്‍ കൂടുതല്‍ സുതാര്യമാക്കാനാണ് കമ്മിഷന്‍റെ തീരുമാനം. സര്‍ക്കാര്‍, സ്വാശ്രയ മെഡിക്കല്‍ കോളജുകളിലുള്ള ഇത്തരം പ്രവേശന നടപടികള്‍ ഇല്ലാതാക്കാനാണ് കമ്മിഷന്‍റെ നീക്കം.
