ഹൈദരാബാദ്: മാര്‍ഗദര്‍ശി ചിട്ടി ഫണ്ടിന്‍റെ പ്രതിച്ഛായ തകര്‍ക്കാന്‍ ആന്ധ്രപ്രദേശ് സിഐഡി (എപി സിഐഡി) ശ്രമിക്കുന്നതായി ആരോപണം. ജീവനക്കാരെയും വരിക്കാരെയും ഭീഷണിപ്പെടുത്താന്‍ ലക്ഷ്യമിട്ട് കഴിഞ്ഞ ദിവസം എപി സിഐഡി മേധാവി എന്‍ സഞ്ജയ് ദേശീയ തലസ്ഥാനത്ത് മാധ്യമങ്ങളോട് സംസാരിച്ചിരുന്നുവെന്നും മാര്‍ഗ ദര്‍ശി ആരോപിക്കുന്നു. രാജ്യത്തെ ഏറ്റവും വലിയ ചിട്ടി ഫണ്ട് തട്ടിപ്പ് താന്‍ തടയാന്‍ ശ്രമിക്കുകയാണെന്ന് എപി സിഐഡി മേധാവി മാധ്യമങ്ങളോട് പറഞ്ഞു.
നിരവധി വരിക്കാരെ മാര്‍ഗദര്‍ശിനി വേട്ടയാടുകയാണെന്നും അദ്ദേഹം പറഞ്ഞതായി മാര്‍ഗദര്‍ശി ആരോപിക്കുന്നു. തെലങ്കാനയിലും ആന്ധ്രപ്രദേശിലും മാത്രം രണ്ട് ലക്ഷത്തിലധികം വരിക്കാരുണ്ട് മാര്‍ഗദര്‍ശിക്ക്. 60 വര്‍ഷം മുമ്പ് റാമോജി റാവുവാണ് മാര്‍ഗദര്‍ശി ചിട്ടി കമ്പനി ആരംഭിച്ചത്. തെലുഗു ദിനപത്രമായ 'ഈനാട്' ന്‍റെ സ്ഥാപക എഡിറ്റര്‍ കൂടിയാണ് റാമോജി റാവു.
മാര്‍ഗദര്‍ശി ചിട്ടി ഫണ്ടിന്‍റെ പ്രതിച്ഛായ തകര്‍ക്കാനുള്ള ആന്ധ്രപ്രദേശ് സര്‍ക്കാറിന്‍റെ ശ്രമമാണിതെന്നും 2022 നവംബറിലാണ് ഇത്തരത്തിലൊരു വേട്ടയാടലിന് തുടക്കമായതെന്നുമാണ് ആരോപണം.
ദൈംദിന കാര്യങ്ങള്‍ തടസപ്പെടുത്തല്‍: മാര്‍ഗദര്‍ശിയുടെ പുതിയ ചിട്ടി ഗ്രൂപ്പുകള്‍ തുറക്കുന്നതിനുള്ള അപേക്ഷകള്‍ സ്വീകരിക്കുന്നത് സര്‍ക്കാര്‍ നിര്‍ത്തി വച്ചു. ഇത് കമ്പനിയുടെ പ്രവര്‍ത്തനങ്ങള്‍ക്ക് തടസമായി. ചിട്ടി പൂര്‍ത്തിയാക്കിയ ശേഷം രജിസ്ട്രാറുടെ പക്കല്‍ ചിട്ടി സെക്യൂരിറ്റി നിക്ഷേപങ്ങള്‍ തിരികെ നല്‍കണം. എന്നാല്‍ ചിട്ടികള്‍ പൂര്‍ത്തിയാക്കിയ ശേഷവും രജിസ്‌ട്രാര്‍മാര്‍ നിക്ഷേപം നിലനിര്‍ത്തി. ഇത്തരത്തില്‍ രജിസ്‌ട്രാര്‍മാര്‍ തിരിച്ചടയ്‌ക്കാത്ത സെക്യൂരിറ്റി നിക്ഷേപം 48,81 കോടി രൂപയാണ്. ചിട്ടി ഫണ്ട് നിയമത്തിന്‍റെ ലംഘനം ആരോപിച്ച് ഈ രജിസ്‌ട്രാര്‍മാര്‍ വിശദീകരണം തേടിയിട്ടുണ്ട്. സംഘം ഉന്നയിച്ച മുഴുവന്‍ ചോദ്യങ്ങള്‍ക്കും ഉത്തരം നല്‍കിയിട്ടുണ്ടെങ്കിലും അവയെല്ലാം അവഗണിക്കപ്പെട്ടു.
രജിസ്ട്രാര്‍മാരുടെ പരാതികളുടെ അടിസ്ഥാനത്തില്‍ ചിട്ടി ഫണ്ട് ആക്‌ട്, ഇന്ത്യന്‍ പീനല്‍ കോഡ്, ആന്ധ്രപ്രദേശ് പ്രൊട്ടക്ഷന്‍ ഓഫ് ഡിപ്പോസിറ്റേഴ്‌സ് ഓഫ് ഫിനാന്‍ഷ്യല്‍ എസ്റ്റാബ്ലിഷ്‌മെന്‍റ് ആക്‌ട് എന്നീ വകുപ്പുകള്‍ പ്രകാരം ഏഴ് എഫ്‌ഐആറുകളാണ് രജിസ്റ്റര്‍ ചെയ്‌തിരിക്കുന്നത്. മൂന്ന് ബ്രാഞ്ച് മാനേജര്‍മാരെയും ഓഡിറ്റിങ് കമ്പനിയിലെ പാര്‍ട്‌ണറെയും അറസ്റ്റ് ചെയ്‌ത് കസ്റ്റഡിയില്‍ വിട്ടു.
കമ്പനിക്കെതിരെ പരാതി നല്‍കാന്‍ വരിക്കാരോട് സിഐഡി ആവശ്യപ്പെട്ടു. പരാതി നല്‍കിയില്ലെങ്കില്‍ ഗുരുതരമായ പ്രത്യാഘാതങ്ങള്‍ നേരിടേണ്ടി വരുമെന്നും സിഐഡി മേധാവി പറഞ്ഞു. മാത്രമല്ല എങ്ങനെയാണ് പരാതി നല്‍കണ്ടതെന്നും സിഐഡി വിശദീകരിച്ച് നല്‍കിയിട്ടുണ്ട്.
ഹൈദരാബാദിലും മറ്റ് ഓഫിസുകളിലും പരിശോധന: ഹൈദരാബാദിലെ കോര്‍പറേറ്റ് ഓഫിസിലും മറ്റ് വിവിധയിടങ്ങളിലും സിഐഡി പരിശോധന നടത്തി. ഓഫിസില്‍ നിന്ന് ഏതാനും രേഖകള്‍ പിടിച്ചെടുക്കുകയും ചെയ്‌തു. ഹൈദരാബാദിലെ ഓഫിസിലെത്തിയ ഉദ്യോഗസ്ഥര്‍ റാമോജി റാവുവിനെ ചോദ്യം ചെയ്യണമെന്ന് ആവശ്യപ്പെട്ടു. ആരോഗ്യ നില മോശമാണെങ്കിലും ഏപ്രില്‍ മൂന്നിന് ചോദ്യം ചെയ്യലിന് അദ്ദേഹം തയ്യാറായി.
സിഐഡി ചോദ്യം ചെയ്യാനെത്തിയപ്പോള്‍ കട്ടിലില്‍ കിടക്കുകയായിരുന്ന റാമോജി റാവുവിന്‍റെ ഫോട്ടോ പകര്‍ത്തി ആന്ധ്രപ്രദേശ് മുഖ്യമന്ത്രി വൈഎസ് ജഗന്‍ മോഹന്‍ റെഡിയുടെ ഉടമസ്ഥതയിലുള്ള സാക്ഷിയെന്ന മാധ്യമത്തിന് നല്‍കി. റാമോജി റാവുവിന്‍റെ സ്വകാര്യത ലംഘിച്ച് അത് ഉടന്‍ തന്നെ മാധ്യമങ്ങളില്‍ സംപ്രേക്ഷണം ചെയ്യുകയും ചെയ്‌തു. തുടര്‍ന്ന് ഏപ്രില്‍ ആറിന് കമ്പനിയുടെ മാനേജിങ് ഡയറക്‌ടറായ റാമോജി റാവുവിന്‍റെ മരുമകള്‍ സൈലജ കിരണിനെയും സിഐഡി ചോദ്യം ചെയ്‌തു.
തുടര്‍കഥയായി പ്രശ്‌നങ്ങള്‍: മാര്‍ഗദര്‍ശി ചിട്ടി ഫണ്ടിന് പിറകില്‍ കോർപ്പറേറ്റ് തട്ടിപ്പ്, ബിനാമി ഇടപാടുകൾ, ആദായനികുതി വെട്ടിപ്പ് തുടങ്ങി കുറ്റകൃത്യങ്ങളും നടക്കുന്നുണ്ടെന്നാണ് സിഐഡി പറയുന്നത്. ഈ കുറ്റകൃത്യങ്ങളില്‍ കേന്ദ്ര അന്വേഷണ ഏജന്‍സിയ്‌ക്ക് പരാതി നല്‍കുന്നതിന് രണ്ട് ദിവസത്തേക്ക് സംഘം ഡല്‍ഹിയിലേക്ക് പോകുമെന്നും എപി സിഐഡി അറിയിച്ചു.
സംഭവ വികാസങ്ങള്‍ക്കെതിരെ പ്രസ്‌താവനകളുമായി മാര്‍ഗദര്‍ശി: ഇതിനേക്കാൾ മോശമായ മറ്റൊരു സാഹചര്യം മാര്‍ഗ ദര്‍ശിയുടെ ചരിത്രത്തില്‍ ഉണ്ടായിട്ടില്ല. മാര്‍ഗ ദര്‍ശിനിയെ സാമ്പത്തികമായി തളര്‍ത്തുകയാണ് ഇതിലൂടെയെല്ലാം ലക്ഷ്യം വയ്‌ക്കുന്നതെന്ന കാര്യം വളരെ വ്യക്തമാണ്. മാനേജ്മെന്റിനെയും ജീവനക്കാരെയും ഭീഷണിപ്പെടുത്തുകയും വരിക്കാരിൽ ആശങ്ക സൃഷ്‌ടിക്കുകയും ചെയ്‌ത് മാര്‍ഗദര്‍ശിയെ ഇല്ലായ്‌മ ചെയ്യുകയാണ് ഇതിനെല്ലാം പിന്നിലെന്നും സ്ഥാപനത്തിന് എതിരെയുള്ള ആരോപണങ്ങളെല്ലാം സാങ്കല്‍പ്പികമാണെന്നും സംഭവത്തിനെതിരെ കോടതിയെ സമീപിക്കുമെന്നും മാര്‍ഗദര്‍ശി പ്രസ്‌താവനയില്‍ വ്യക്തമാക്കി.
സിഐഡിയുടെ ആരോപണങ്ങൾക്ക് മാർഗദർശിയുടെ മറുപടി:
സിഐഡി: നിലവിലുള്ള നിയമങ്ങൾക്ക് വിരുദ്ധമായി വൻതോതിൽ ചിട്ടികൾ പണമാക്കുന്നത് കള്ളപ്പണം വെളുപ്പിക്കലിന്‍റെ പരിധിയിൽ വരും.
മാര്‍ഗദര്‍ശി (മറുപടി): മാര്‍ഗദര്‍ശി ഒരു ചിട്ടി ഫണ്ട് ബിസിനസാണ്. ഇത്തരം ഇടപാടുകളുടെ ഭാഗമായി വരിക്കാര്‍ നല്‍കുന്ന സബ്‌സ്‌ക്രിപ്ഷനുകള്‍ ചെക്കുകളുടെയോ പണത്തിന്‍റെയോ രൂപത്തിലാണ് സ്വീകരിക്കുന്നത്. വരിക്കാര്‍ നികുതിദായകരായത് കൊണ്ട് തന്നെ ആദായ നികുതി വ്യവസ്ഥകള്‍ പൂര്‍ണമായും പാലിക്കുന്നുണ്ട്. അതിനാല്‍ ഇതിനെ കള്ളപ്പണം വെളുപ്പിക്കൽ എന്ന് വിളിക്കുന്നത് പൂർണമായും തെറ്റാണ്.
സിഐഡി: സെക്യൂരിറ്റിയുടെ നിയമവിരുദ്ധമായ രസീത്. വരിക്കാരുടെ പണം കമ്പനിയില്‍ സ്ഥിരമായി സൂക്ഷിക്കാന്‍ അവരെ നിര്‍ബന്ധിതരാക്കുന്നു.
മാര്‍ഗദര്‍ശി (മറുപടി): ചിട്ടി തുകയ്ക്ക് ആവശ്യമായ സർക്കാർ ജാമ്യം നൽകാൻ കഴിയാത്ത വരിക്കാർക്ക്, രേഖാമൂലം ഉറപ്പുനൽകുകയും തീർപ്പാക്കാത്ത തവണകൾക്ക് ആവശ്യമായ സെക്യൂരിറ്റി നൽകുകയും ചെയ്‌തതിന് ശേഷം മാത്രമേ അവർക്ക് ചിട്ടിയുടെ പേഔട്ട് ലഭിക്കൂ. ഭാവിയിലെ ഗഡുക്കളുമായി ബന്ധപ്പെട്ട തുക മാത്രമാണ് ഞങ്ങൾ സെക്യൂരിറ്റിയായി പരിഗണിക്കുന്നത്. ഭാവിയിൽ ഇതേ ഗ്രൂപ്പിൽ നിന്ന് ചിട്ടികൾ സ്വീകരിക്കുന്ന മറ്റ് വരിക്കാരുടെ താത്‌പര്യങ്ങൾ കണക്കിലെടുത്താണ് ഞങ്ങൾ ഈ നടപടി സ്വീകരിക്കുന്നത്. അതിനാൽ, നിക്ഷേപങ്ങളുടെ രസീത് ഡെറിവേറ്റീവ് അല്ല. ഈ ആരോപണം തികച്ചും തെറ്റും ഗൂഢാലോചനപരവുമാണ്. ചിട്ടി ഫണ്ട് പ്രവർത്തനങ്ങള്‍ നിയന്ത്രിക്കുന്നത് ചിട്ടി ഫണ്ട് നിയമവും ആർബിഐ പുറപ്പെടുവിച്ച വിവിധ നോൺ ബാങ്കിങ് കമ്പനി നിർദേശങ്ങളും അനുസരിച്ചാണ്.
സിഐഡി: ബ്രാഞ്ച് തലത്തിൽ ചെക്കിന്‍റെയും കൈയിലുള്ള പണത്തിന്‍റെയും പേരിൽ കാഷ് ബാലൻസ് പെരുപ്പിച്ചു കാണിക്കുന്നു.
മാര്‍ഗദര്‍ശി (മറുപടി): ചിട്ടി ഫണ്ട്, ഇന്‍ഷുറന്‍സ് കമ്പനി എന്നിവയ്‌ക്ക് മാസം അവസാനത്തില്‍ ചെക്കുകള്‍ ലഭിക്കുന്നത് സാധാരണയാണ്. സ്വഭാവികമായും അത്തരം ചെക്കുകള്‍ അടുത്ത മാസം എന്‍ ക്യാഷ്‌ ചെയ്യപ്പെടും. രജിസ്ട്രാർമാരോടും ലോക്കൽ പൊലീസിനോടും ഞങ്ങൾ ഇക്കാര്യം വിശദീകരിച്ചെങ്കിലും മനസ്സിലാക്കാൻ തയ്യാറാവാതെ അതേ ആരോപണങ്ങൾ ഉന്നയിക്കുകയാണ്.
സിഐഡി: ചിട്ടിഫണ്ട് നിയമപ്രകാരം ബാലൻസ് ഷീറ്റുകളും അക്കൗണ്ടുകളും സംസ്ഥാന തലത്തിലോ ബ്രാഞ്ച് തലത്തിലോ ചിട്ടി രജിസ്ട്രാർക്ക് ഫയൽ ചെയ്‌തിട്ടില്ല.
മാര്‍ഗദര്‍ശി (മറുപടി): ഇതൊരു പച്ചക്കള്ളമാണ്. കമ്പനി എല്ലാ വര്‍ഷവും പതിവായി ബാലന്‍സ് ഷീറ്റുകള്‍ രജിസ്ട്രാറുടെ മുമ്പാകെ സമര്‍പ്പിക്കുന്നുണ്ട്. വിഷയവുമായി ബന്ധപ്പെട്ട് കൂടുതല്‍ വിശദീകരണങ്ങളും നല്‍കിയിട്ടുണ്ട്. സിഐഡി അന്വേഷണം ആരംഭിച്ചത് മുതല്‍ ഞങ്ങളും വിശദീകരണം നല്‍കിയിട്ടുണ്ട്. ഇതു സംബന്ധിച്ച് ഒരു രജിസ്‌ട്രാറില്‍ നിന്ന് പോലും പരാതി ലഭിച്ചിട്ടില്ലെന്ന കാര്യം വളരെ വ്യക്തമാണെന്നും പറഞ്ഞു.
സിഐഡി: മാര്‍ഗദര്‍ശിനി വരിക്കാരുടെ പണം സ്റ്റോക്ക് മാര്‍ക്കറ്റുകളിലേക്കും മ്യൂച്വല്‍ ഫണ്ടുകളിലേക്കും വഴി തിരിച്ച് വിടുന്നു.
മാര്‍ഗദര്‍ശി (മറുപടി): ഇത് തികച്ചും അടിസ്ഥാനരഹിതമാണ്. വരിക്കാരെ ആശങ്കയിലാക്കാന്‍ വേണ്ടി ദുരുദ്ദേശ്യത്തോടെ കള്ളക്കളി പ്രചരിപ്പിക്കുകയാണിത്. 1982ലെ ചിട്ടി ഫണ്ട് ആക്‌ട് സെക്ഷൻ 14-ന്‍റെ കീഴിലുള്ള വ്യവസ്ഥകൾ അനുസരിച്ച് അതിന്‍റെ പ്രവർത്തനങ്ങളിൽ നിന്ന് ലഭിക്കുന്ന വരുമാനവും കമ്മിഷനും മറ്റ് വരുമാനവും നിക്ഷേപിക്കാൻ കമ്പനിക്ക് അധികാരമുണ്ട്.
സിഐഡി: മാര്‍ഗദര്‍ശി ഗ്രൂപ്പിന്‍റെ ബാലന്‍സ് ഷീറ്റില്‍ തെറ്റായ വിവരങ്ങളാണുള്ളത്.
മാര്‍ഗദര്‍ശി (മറുപടി): 60 വർഷം പഴക്കമുള്ള ഒരു കമ്പനിയുടെ സൽപ്പേര് കളങ്കപ്പെടുത്താനുള്ള ദുരുദ്ദേശ്യപരമായ ആരോപണങ്ങളാണിവ. കമ്പനി തങ്ങളുടെ അക്കൗണ്ട് ബുക്കുകളില്‍ നിയമ വിരുദ്ധമായ കണക്കുകള്‍ രേഖപ്പെടുത്തിയിട്ടില്ല. അംഗീകൃത അക്കൗണ്ടിങ് തത്വങ്ങള്‍ അനുസരിച്ച് മാത്രമാണ് കമ്പനി മുന്നോട്ട് പോകുന്നത്. കഴിഞ്ഞ 60 വര്‍ഷമായി കുറ്റമറ്റ രീതിയിലും തികഞ്ഞ സാമ്പത്തിക അച്ചടക്കത്തോടെയുമാണ് കമ്പനി പ്രവര്‍ത്തിക്കുന്നത്. സൽപ്പേരിന് കളങ്കം വരുത്തുക എന്ന ഒറ്റ ലക്ഷ്യത്തോടെയാണ് അനുദിനം കമ്പനിക്കെതിരെ സാങ്കൽപ്പിക കഥകള്‍ കെട്ടിച്ചമയ്ക്കുന്നത്.
