ഹൈദരാബാദ് : മാർഗദർശി ചിറ്റ് ഫണ്ടിന്‍റെ 111-ാമത് ശാഖ ഹൈദരാബാദിലെ ഉപ്പൽ പീർജാദിഗുഡയിൽ പ്രവര്‍ത്തനമാരംഭിച്ചു. മാർഗദർശി ചിറ്റ് ഫണ്ട് പ്രൈവറ്റ് ലിമിറ്റഡ് (Margadarsi Chit Fund Private Limited) മാനേജിങ് ഡയറക്‌ടർ സി എച്ച് ശൈലജ കിരൺ (CH Sailaja Kiran) ഉദ്ഘാടനം നിർവഹിച്ചു. യുവാക്കൾ ദീർഘവീക്ഷണത്തോടെ മാർഗദർശി പോലുള്ള ചിട്ടികളിൽ ചേർന്നാൽ തങ്ങളുടെ എല്ലാ ആഗ്രഹങ്ങളും നിറവേറ്റാനാകുമെന്ന് ശൈലജ കിരൺ പറഞ്ഞു.
എല്ലാവരും ജീവിതത്തിൽ സമ്പാദ്യശീലം വളർത്തിയാൽ സാമ്പത്തികമായി വലിയ ഉയർച്ചയിലെത്താനാവുമെന്നും എംഡി വിശദീകരിച്ചു. പ്രത്യേക പൂജയ്‌ക്ക് ശേഷം ദീപം തെളിയിച്ചാണ് പുതിയ ശാഖ നാടിന് സമര്‍പ്പിച്ചത് (Margadarsi's new branch in Hyderabad). ഈനാട് എം ഡി സി എച്ച് കിരൺ, ഇടിവി ഭാരത് എംഡി ബൃഹതി എന്നിവർ സന്നിഹിതരായിരുന്നു.
കമ്പനി ഡയറക്‌ടർ എസ് വെങ്കിടസ്വാമി, വൈസ് പ്രസിഡന്‍റുമാരായ പി രാജാജി, സാംബമൂർത്തി, ജി ബാലരാമകൃഷ്‌ണ, ചീഫ് മാനേജർ സി വി എം ശർമ, ബ്രാഞ്ച് മാനേജർ എസ് തിരുപ്പതി, കമ്പനിയിലെ ജീവനക്കാർ, ഏജന്‍റുമാർ എന്നിവരും പരിപാടിയിൽ പങ്കെടുത്തു. ചിട്ടി ഉപഭോക്താക്കൾക്ക് ആവശ്യമായ എല്ലാ സേവനങ്ങളും ഉറപ്പുവരുത്തുമെന്നും ഉദ്‌ഘാടന വേളയിൽ ശൈലജ കിരൺ പറഞ്ഞു.
പ്രതിസന്ധി ഘട്ടത്തിലും കമ്പനി വിജയകരമായാണ് പ്രവർത്തിക്കുന്നത്. മാർഗദർശി എന്നും വിജയകരമായി പ്രവർത്തിക്കുമെന്നും എം ഡി പറഞ്ഞു. 1962 ഒക്ടോബറിലാണ് കമ്പനി ആരംഭിക്കുന്നത്. റാമോജി ഗ്രൂപ്പ് ചെയർമാൻ റാമോജി റാവു ആണ് കമ്പനി സ്ഥാപിച്ചത്. ആരംഭ ഘട്ടത്തിൽ രണ്ട് ജീവനക്കാർ മാത്രമായിരുന്നെങ്കില്‍ നിലവിൽ 5000-ത്തിൽ അധികം ജീവനക്കാരും 111 ശാഖകളുമായി.
60 വർഷങ്ങൾ പിന്നിടുമ്പോള്‍ കമ്പനിക്കുണ്ടായത് വലിയ വളർച്ചയാണ്. മാർഗദർശി ഇപ്പോൾ തെലങ്കാനയിലും ആന്ധ്രാപ്രദേശിലും മാത്രമല്ല, തമിഴ്‌നാട്ടിലും കർണാടകയിലും പ്രശസ്‌തി നേടിയെടുത്തിട്ടുണ്ട്. ദക്ഷിണേന്ത്യയിലെ തന്നെ മുൻനിര ചിട്ടി കമ്പനിയായാണ് ഇത് നിലകൊള്ളുന്നത്.
60 ലക്ഷം ഉപഭോക്താക്കൾക്ക് സേവനം നൽകി വരികയാണ് മാർഗദർശി കമ്പനി. ഉപഭോക്താക്കൾ ദൈവങ്ങള്‍ എന്നതാണ് മാർഗദർശിയുടെ ആപ്‌തവാക്യം. നിരവധി ചിറ്റ് ഫണ്ട് കമ്പനികളുടെ വരവിനിടയിലും, സത്യസന്ധമായ പ്രകടനം കൊണ്ടും പ്രൊഫഷണൽ സമഗ്രത കൊണ്ടും മികച്ച സേവനത്താലും സമ്പൂർണ സാമ്പത്തിക അച്ചടക്കം കൊണ്ടും ആണ് മാർഗദർശിക്ക് ഇന്നും നേതൃസ്ഥാനം നിലനിർത്താനാകുന്നത്.
