ന്യൂഡൽഹി : തെരഞ്ഞെടുപ്പ് ഭേദഗതി ബിൽ ലോക്‌സഭ പാസാക്കി. പ്രതിപക്ഷ ബഹളങ്ങള്‍ക്കിടെ ശബ്‌ദ വോട്ടോടെയാണ് ബിൽ സഭയിൽ പാസാക്കിയത്. നിയമമന്ത്രി കിരണ്‍ റിജിജുവാണ് ബില്‍ അവതരിപ്പിച്ചത്. ഇതോടെ ആധാറും തെരഞ്ഞെടുപ്പ് തിരിച്ചറിയല്‍ കാര്‍ഡും തമ്മിൽ ബന്ധിപ്പിക്കും.
കള്ളവോട്ട് തടയുക എന്നതാണ് ഭേദഗതി ബില്ലിലൂടെ ലക്ഷ്യംവയ്ക്കുന്നത്. തെരഞ്ഞെടുപ്പ് കമ്മിഷന്‍ നേരത്തേതന്നെ ഇതിനായി നടപടി എടുത്തിരുന്നെങ്കിലും നിയമത്തിന്‍റെ പിന്‍ബലം വേണമെന്ന് സുപ്രീം കോടതി നിര്‍ദേശിച്ചിരുന്നു. ഇതേ തുടര്‍ന്ന് ജനപ്രാതിനിധ്യ നിയമത്തിലാണ് മാറ്റം വരുത്തിയത്.
വോട്ടര്‍ കാര്‍ഡില്‍ പേര് ചേര്‍ക്കുന്നതിനൊപ്പം ആധാര്‍ നമ്പര്‍കൂടി രേഖപ്പെടുത്തണമെന്ന് ഭേദഗതി ബില്‍ നിര്‍ദേശിക്കുന്നുണ്ട്. വോട്ടര്‍ പട്ടികയില്‍ നിലവില്‍ പേരുള്ളവരും പുതുതായി പേര് ചേര്‍ക്കുന്നവരും ആധാര്‍ നമ്പര്‍ നല്‍കാന്‍ തെരഞ്ഞെടുപ്പ് കമ്മിഷന്‍ ആവശ്യപ്പെടും. എന്നാല്‍, ആധാര്‍ കാര്‍ഡോ നമ്പറോ ഹാജരാക്കാന്‍ കഴിഞ്ഞില്ല എന്ന കാരണത്താല്‍ ഒരാളുടെ പേര് വോട്ടര്‍പ്പട്ടികയില്‍ ഉള്‍പ്പെടുത്താതിരിക്കരുതെന്നും ബില്ലിൽ വ്യവസ്ഥ ചെയ്യുന്നുണ്ട്.
ALSO READ നിര്‍ബന്ധിത മാറ്റത്തിന് 10 വര്‍ഷം വരെ തടവ് ; മതപരിവര്‍ത്തന നിരോധന ബില്ലുമായി കര്‍ണാടക
ആധാറും തെരഞ്ഞെടുപ്പ് തിരിച്ചറിയല്‍ കാര്‍ഡും തമ്മിൽ ബന്ധിപ്പിക്കുമ്പോള്‍ ഭാര്യ എന്ന പദത്തിന് പകരം പങ്കാളി എന്നാക്കാം എന്നും ബില്ലിൽ പറയുന്നു. അതേസമയം പൗരന്മാരുടെ ഭരണഘടനാപരമായ അവകാശങ്ങളുടെ ലംഘനമാണ് ബില്ലെന്ന് പ്രതിപക്ഷം ആരോപിച്ചു. ഇത് നിയമമായാല്‍ പൗരന്മാരുടെ വ്യക്തി സ്വാതന്ത്ര്യത്തില്‍ വലിയ പ്രശ്‌നങ്ങളുണ്ടാവുമെന്നും പ്രതിപക്ഷം ചൂണ്ടിക്കാട്ടി.
ALSO READ 12 നാള്‍ ബഹിരാകാശത്ത് ; വിസ്‌മയാനുഭവങ്ങളുമായി ഭൂമിയിലേക്ക്, യാത്രാച്ചെലവ് രഹസ്യം
