ഹൈദരാബാദ്: തുകൽ സാങ്കേതിക വിദ്യയിലെ വഴിത്തിരിവായ ഗവേഷണത്തിലൂടെ ലോകപ്രശസ്‌തനായ യലവർത്തി നായുഡമ്മയുടെ ജന്മവാര്‍ഷികം ഇന്ന്. ശാസ്‌ത്രജ്ഞനും, കെമിക്കൽ എഞ്ചിനീയറുമായ യലവർത്തി നായുഡമ്മക്ക് തുകൽ സാങ്കേതിക വിദ്യയില്‍ നടത്തിയ ഗവേഷണങ്ങളിലൂടെ വിദേശത്ത് മികച്ച തൊഴിലവസരങ്ങളാണ് തുറന്നുകിട്ടിയത്. എന്നാല്‍ ഗവേഷണങ്ങളെല്ലാം തന്നെ രാജ്യത്തുള്ള തോൽപ്പണിക്കാർക്കും തുകൽ വ്യവസായങ്ങൾക്കും പ്രയോജനപ്പെടുത്തണമെന്നുമുള്ള അത്യുത്സാഹവും, മാതൃരാജ്യത്തോടുള്ള സ്‌നേഹവും അദ്ദേഹത്തെ ഇന്ത്യയില്‍ പിടിച്ചുനിര്‍ത്തുകയായിരുന്നു. മദ്രാസ് സിഎൽഐ ഡയറക്‌ടറായും, കേന്ദ്ര സര്‍ക്കാരിന്‍റെ ശാസ്‌ത്ര സാങ്കേതിക വകുപ്പിന്റെ സെക്രട്ടറിയായും സേവനമനുഷ്ഠിച്ച് ആരെയും പ്രചോദിപ്പിക്കുന്നതായിരുന്നു യലവർത്തി നായുഡമ്മയുടെ ജീവിതം.
1951ലാണ് യലവർത്തി നായുഡമ്മ മദ്രാസിലെ സെൻട്രൽ ലെതർ ഇൻസ്‌റ്റിറ്റ്യൂട്ടിൽ (സിഎൽഐ) ശാസ്‌ത്രജ്ഞനായെത്തുന്നത്. ഇവിടെ വച്ച് നടത്തിയ ഗവേഷണങ്ങള്‍ക്കൊടുവില്‍ തോൽപ്പണിക്കാർക്കും തുകൽ വ്യവസായത്തിനും പ്രയോജനപ്പെടുന്ന നിരവധി പദ്ധതികൾ അദ്ദേഹം തയ്യാറാക്കുകയും അവ വിജയകരമായി നടപ്പിലാക്കുകയും ചെയ്തു. ഇതോടെ ചുരുങ്ങിയ കാലയളവില്‍ മദ്രാസ് സിഎൽഐ ലോകോത്തര ഗവേഷണ സ്ഥാപനമായി വളര്‍ന്നു. മാത്രമല്ല, സകല വളര്‍ച്ചയുടെയും മുഖ്യപങ്ക് വഹിച്ച നായിഡമ്മയെ സിഎൽഐയുടെ ഡയറക്‌ടറായും നിയമിച്ചു. തുടര്‍ന്ന് കൗൺസിൽ ഓഫ് സയന്റിഫിക് ആൻഡ് ഇൻഡസ്ട്രിയൽ റിസർച്ചിന്റെ (സിഎസ്ഐആർ) ഡയറക്‌ടർ ജനറലായും, കേന്ദ്ര ശാസ്‌ത്ര സാങ്കേതിക വകുപ്പിന്റെ സെക്രട്ടറിയായും നായുഡമ്മ സേവനമനുഷ്ഠിച്ചു.
Also Read: റീപോസ്റ്റ് ഫീച്ചർ പരീക്ഷിച്ച് ഇൻസ്റ്റഗ്രാം
ആന്ധ്രാപ്രദേശിലുള്ള തുരുമെല്ല സ്‌കൂളില്‍ പ്രാഥമിക വിദ്യാഭ്യാസം പൂര്‍ത്തിയാക്കിയ നായുഡമ്മ ഇന്‍റര്‍ കോളജ് പഠിച്ചത് ഗുണ്ടൂർ എസി കോളേജില്‍ നിന്നാണ്. ബനാറസ് ഹിന്ദു സർവകലാശാലയിൽ നിന്ന് കെമിക്കൽ ടെക്‌നോളജിയില്‍ ബിരുദം നേടിയ അദ്ദേഹം പിന്നീട് മദ്രാസ് ഇൻസ്‌റ്റിറ്റ്യൂട്ട് ഓഫ് ലെതർ ടെക്നോളജി കോളജിൽ ചേർന്നു. അദ്ദേഹത്തിലെ പ്രതിഭയെ തിരിച്ചറിഞ്ഞ അന്നത്തെ മദ്രാസ് സർക്കാർ 1946-ൽ ഉന്നത വിദ്യാഭ്യാസത്തിനും തുകൽ സാങ്കേതികവിദ്യയിൽ ഗവേഷണത്തിനുമായി നായുഡമ്മയെ ബ്രിട്ടനിലേക്കയച്ചു. അവിടെ ലെതർ ടെക്നോളജിയിൽ പ്രത്യേക പഠനം പൂർത്തിയാക്കിയ ശേഷം അദ്ദേഹം യുഎസിലെ ലെഹി സർവകലാശാലയിൽ നിന്ന് ടാനിംഗിൽ ബിരുദാനന്തര ബിരുദവും നേടി.
1922 സെപ്തംബർ 10 ന് ഗുണ്ടൂർ ജില്ലയിലെ അമർതലൂരിലെ യലവരുവില്‍ ഒരു സാധാരണ കർഷക കുടുംബത്തില്‍ രാഘവമ്മ-അഞ്ജയ്യ ദമ്പതികളുടെ മകനായായിരുന്നു നായുഡമ്മയുടെ ജനനം. തുകൽ വ്യവസായം തന്നെ വെറുക്കപ്പെട്ട സമയത്ത് തന്റെ ഗവേഷണത്തിലൂടെ അദ്ദേഹം തുകൽ വ്യവസായം നിരവധി പേർക്ക് ഉപയോഗപ്രദമാക്കുകയായിരുന്നു. മാലിന്യപ്രശ്നത്തെ തുടർന്ന് ചെന്നൈയിലെ തോൽപണിശാലകൾ അടച്ചുപൂട്ടുന്ന അവസ്ഥയിലെത്തിയപ്പോള്‍ പരീക്ഷണങ്ങൾ നടത്തി മാലിന്യം ഒഴിവാക്കിയതും, തൊഴിൽ ഏകീകരിക്കപ്പെട്ടതും നായുഡമ്മയുടെ നിതാന്തപരിശ്രമത്തിന്‍റെ ഫലമായിരുന്നു.
Also Read: ഇന്ത്യ നേരിടുന്ന വെല്ലുവിളികൾ പരിഹരിക്കാൻ സാങ്കേതികവിദ്യയ്‌ക്ക്‌ കഴിയും: ബ്രാഡ് സ്‌മിത്ത്
നിലവില്‍ 25 ലക്ഷത്തോളം ആളുകൾ ഈ മേഖലയെ ആശ്രയിച്ച് ജീവിക്കുന്നുണ്ട്. മാത്രമല്ല, ശാസ്‌ത്ര സാങ്കേതിക മേഖലയിൽ നിർണായക സംഭാവനകൾ നടത്തിയ ശാസ്‌ത്രജ്ഞർക്ക് അദ്ദേഹത്തിന്റെ പേരില്‍ നായുഡമ്മ ട്രസ്‌റ്റ് വർഷം തോറും അവാർഡും നൽകിവരുന്നു. എല്ലാത്തിലുമുപരി യലവർത്തി നായുഡമ്മയുടെ ശതാബ്‌ദിയോടനുബന്ധിച്ച് ആന്ധ്രാപ്രദേശിലെ തെനാലിയിൽ അദ്ദേഹത്തിന്റെ പ്രതിമ സ്ഥാപിക്കാനും സര്‍ക്കാര്‍ ആലോചനയുണ്ട്.
ഐക്യരാഷ്‌ട്രസഭയുടെ കൺസൾട്ടന്റായി പ്രവര്‍ത്തിച്ച കാലത്ത് അദ്ദേഹം സുഡാൻ, സൊമാലിയ, നൈജീരിയ, തുർക്കി, ഇറാൻ തുടങ്ങിയ രാജ്യങ്ങളിലെ തുകൽ വ്യവസായങ്ങളുടെ വികസനത്തിനായും പ്രവർത്തിച്ചു. ഡൽഹിയിലെ ജവഹർലാൽ നെഹ്‌റു യൂണിവേഴ്‌സിറ്റിയുടെ (ജെഎൻയു) വൈസ് ചാൻസലറായി സേവനമനുഷ്ഠിച്ച ആദ്യ തെലുങ്കുദേശക്കാരന്‍ കൂടിയായിരുന്നു യലവർത്തി നായുഡമ്മ. 1971 ല്‍ രാജ്യം അദ്ദേഹത്തിന് പത്മശ്രീ പുരസ്കാരം നല്‍കി ആദരിച്ചു. ബറോഡ സർവകലാശാല ഡോ. കെ.ജി നായിക് സ്വർണ മെഡലും, 1981ൽ രാജ്യലക്ഷ്മി ഫൗണ്ടേഷൻ അവാർഡും അദ്ദേഹത്തിന് ലഭിച്ചു. മാത്രമല്ല, ആന്ധ്ര, നാഗാർജുന, വെങ്കിടേശ്വര സർവകലാശാലകൾ അദ്ദേഹത്തിന് ഓണററി ഡോക്‌ടറേറ്റും നൽകി ആദരിച്ചിരുന്നു. 1985 ജൂൺ 10-ന് കാനഡയിലെ മോൺട്രിയലിൽ നടന്ന അന്താരാഷ്‌ട്ര ഗവേഷണ വികസന സമ്മേളനത്തിൽ പങ്കെടുത്ത് മടങ്ങുന്നതിനിടെ ഭാരതത്തെ ലോകത്തിന് മുന്നില്‍ അടയാളപ്പെടുത്തിയ ആ മഹാന്‍ വിമാനാപകടത്തില്‍ മരണപ്പെടുകയായിരുന്നു.
Also Read: രാജ്യത്ത് ആദ്യം ; തത്സമയ റോബോട്ടിക് ശസ്‌ത്രക്രിയ നടത്തി ഓർത്തോപീഡിക് ഡോക്‌ടർമാർ
