ന്യൂഡല്‍ഹി : ചൈന, പാകിസ്ഥാൻ ബോർഡറുകളിൽ ഒരേസമയം നിരീക്ഷണം നടത്താൻ കഴിയുന്ന ഇസ്രായേൽ നിർമിത പുതിയ ഹെറോൺ മാർക്ക് 2 ഡ്രോണുകൾ സ്വന്തമാക്കി ഇന്ത്യൻ വ്യോമസേന. അത്യാധുനിക സാങ്കേതികവിദ്യയില്‍ നിർമിച്ചിട്ടുള്ള ഡ്രോണുകൾക്ക് ആകാശത്ത് ദീർഘനേരം അചഞ്ചലമായി പ്രവർത്തിക്കാൻ കഴിയും. മികച്ച രീതിയിൽ നിരീക്ഷണം നടത്താനും ശത്രുക്കളുടെ നടപടികള്‍ ഒപ്പിയെടുക്കാനും കഴിയുന്ന ഈ ഡ്രോണുകൾ ദേശീയ സുരക്ഷയ്‌ക്ക് മുതൽക്കൂട്ടാണ്.
തുടർച്ചയായി 36 മണിക്കൂർ വരെ നിരീക്ഷിക്കാൻ കഴിയും എന്നതിന് പുറമെ സാറ്റലൈറ്റ് കമ്മ്യൂണിക്കേഷൻ വൈദഗ്‌ധ്യത്താൽ സായുധരായ ഡ്രോണുകൾക്ക് വളരെ ദൂരത്തുള്ള ശത്രുക്കളെ നിരീക്ഷിക്കാനും പോരാടാനും സാധിക്കും. ഇന്ത്യൻ വ്യോമസേനയുടെ ഇന്‍റലിജൻസ്, നിരീക്ഷണം, രഹസ്യാന്വേഷണം എന്നീ മേഖലകളിൽ ഡ്രോൺ നിരീക്ഷണം ഉപയോഗപ്പെടുത്തുമെന്ന് ഇതുമായി ബന്ധപ്പെട്ട സ്‌ക്വാഡ്രണിന്‍റെ കമാൻഡിംഗ് ഓഫിസർ വിങ് കമാൻഡർ പങ്കജ് റാണ പറഞ്ഞു.
സ്‌ക്വാഡ്രൺ ലീഡർ അർപിത് ടണ്ഡനാണ് ഹെറോൺ മാർക്ക് 2 ഡ്രോണുകളെ നിയന്ത്രിക്കുകയും പറത്തുകയും ചെയ്യുക. ഹെറോൺ മാർക്ക് 2 ഡ്രോണുകൾ ഏത് കാലാവസ്ഥയിലും പ്രവർത്തനക്ഷമമായിരിക്കും. മൈനസ് ഡിഗ്രിയിൽ വരെ ഡ്രോൺ കാര്യക്ഷമമായി പ്രവർത്തിക്കുമെന്നാണ് കമാൻഡിംഗ് ഓഫിസർ വ്യക്തമാക്കിയത്. സാറ്റലൈറ്റ് കമ്മ്യൂണിക്കേഷൻ ലിങ്കുകൾക്കും ആയുധവത്‌കരണത്തിനുമായി 70 ഓളം ഹെറോൺ ഡ്രോണുകൾ നവീകരിക്കുന്നതിനുള്ള 'ചീറ്റ'(Cheetah) പോലുള്ള പദ്ധതികളുമായി ഇന്ത്യൻ വ്യോമസേന മുന്നോട്ട് കുതിക്കുകയാണ്.
Read More : 'മേക്ക് ഇൻ ഇന്ത്യ'യ്ക്ക് കീഴിൽ യാത്രാവിമാനം; ഏറ്റെടുക്കൽ നടപടി ആരംഭിച്ച് ഇന്ത്യൻ വ്യോമസേന
ഇന്ത്യൻ സായുധ സേന 31 പ്രിഡേറ്റർ ഡ്രോണുകള്‍ സ്വന്തമാക്കാനും ഒരുങ്ങുന്നുണ്ട്. ഉയരത്തിൽ ദീർഘ നേരം പ്രവർത്തിക്കാൻ കഴിയുന്ന ഇവ നാവികസേനയെ ഇന്ത്യൻ സമുദ്ര മേഖലയിൽ നിരീക്ഷണം നടത്താൻ സഹായിക്കും. ഇതിൽ 15 ഡ്രോണുകൾ ഇന്ത്യൻ നാവിക സേനയും ബാക്കി ഡ്രോണുകൾ മറ്റ് രണ്ട് സേനകളുമാകും പ്രവർത്തിപ്പിക്കുക.
Also Read : IAF Emergency Exercise| പൂർവാഞ്ചൽ എക്‌സ്പ്രസ് വേ എയർസ്ട്രിപ്പിൽ ഇന്ത്യൻ വ്യോമസേനയുടെ വ്യോമാഭ്യാസ പ്രകടനം
മീഡിയം ട്രാൻസ്‌പോർട്ട് എയർക്രാഫ്റ്റ് : ഇക്കഴിഞ്ഞ ഫെബ്രുവരിയിൽ 'മേക്ക് ഇൻ ഇന്ത്യ' പദ്ധതിക്ക് കീഴിൽ രാജ്യത്ത് നിർമിക്കാൻ പോകുന്ന മീഡിയം ട്രാൻസ്‌പോർട്ട് എയർക്രാഫ്റ്റ് (എംടിഎ) ഏറ്റെടുക്കുന്നതിനുള്ള നടപടികൾ ഇന്ത്യൻ വ്യോമസേന ആരംഭിച്ചിരുന്നു. വിവിധ ഗതാഗത പ്രവർത്തനങ്ങൾക്കായി ഉപയോഗപ്പെടുത്താവുന്ന യാത്രാവിമാനത്തിന് 18 മുതൽ 30 ടൺ വരെ ഭാരമുള്ള ചരക്ക് കൊണ്ടുപോകാനുള്ള ശേഷിയുണ്ട്. പ്രതിരോധ മേഖലയിൽ വലിയൊരു പരിവർത്തനത്തിനാണ് ഇതിലൂടെ ഇന്ത്യൻ വ്യോമസേന ലക്ഷ്യമിടുന്നത്.
