ന്യൂഡല്‍ഹി: ഓസ്‌ട്രേലിയയുമായുള്ള ആദ്യ മന്ത്രിതല ചര്‍ച്ച ഇന്ന് ന്യൂഡല്‍ഹിയില്‍ വച്ച് നടക്കും. ഓസ്ട്രേലിയൻ വിദേശകാര്യ മന്ത്രി മാരിസ് പെയ്‌നും പ്രതിരോധ മന്ത്രി പീറ്റർ ഡട്ടനും വിദേശകാര്യ മന്ത്രി എസ് ജയശങ്കർ, പ്രതിരോധ മന്ത്രി രാജ്‌നാഥ് സിങ് എന്നിവരുമായി കൂടിക്കാഴ്‌ച നടത്തും. പ്രധാനമന്ത്രി നരേന്ദ്ര മോദിയെ 7 ലോക്‌ കല്യാണ്‍ മാര്‍ഗിലുള്ള അദ്ദേഹത്തിന്‍റെ വസതിയിൽ വച്ച് വൈകുന്നേരം 4.30ന് ഓസ്‌ട്രേലിയന്‍ മന്ത്രിമാര്‍ സന്ദർശിക്കും.
രാവിലെ ദേശീയ യുദ്ധ സ്‌മാരകത്തിൽ പുഷ്‌പചക്രം അർപ്പിച്ചതിന് ശേഷം 10.30ന് പെയ്ൻ ഹൈദരാബാദ് ഹൗസിൽ വച്ച് എസ് ജയശങ്കറുമായി കൂടിക്കാഴ്‌ച നടത്തും. വൈകുന്നേരം 3 മണിക്ക് ജവഹർലാൽ നെഹ്റു ഭവനിലെ മുത്തമ്മ ഹാളിൽ നടക്കുന്ന പത്രസമ്മേളനത്തിലും പെയ്‌ന്‍ പങ്കെടുക്കും. സാമ്പത്തിക സുരക്ഷ, സൈബർ, കാലാവസ്ഥ, നിര്‍ണായക സാങ്കേതികവിദ്യ, വിതരണ ശൃംഖലകൾ എന്നിവ ഉൾപ്പെടെയുള്ള വിഷയങ്ങൾ മന്ത്രിമാർ ചർച്ച ചെയ്യും.
പരസ്‌പര ബന്ധം മെച്ചപ്പെട്ടു
തന്ത്രപരമായ പങ്കാളിത്തത്തിന്‍റെ ആദ്യ വർഷത്തിൽ തന്നെ ഇരു രാജ്യങ്ങളും ഗണ്യമായ പുരോഗതി കൈവരിച്ചതായി പെയ്ൻ പറഞ്ഞു. ഇന്ത്യ ആഗോള ഉൽപാദന കേന്ദ്രത്തിന്‍റെ പാതയിലാണെന്നും പുതിയ സാങ്കേതികവിദ്യകളുടെ പ്രധാന വിപണിയായി മാറിയെന്നും ഓസ്ട്രേലിയൻ വിദേശകാര്യ മന്ത്രി പറഞ്ഞു.
ദുരന്തത്തെ നേരിടുന്നതിനായി അടിസ്ഥാന സൗകര്യങ്ങൾക്കായുള്ള ഇന്ത്യന്‍ സംരംഭത്തിന് ഓസ്ട്രേലിയ 10 ദശലക്ഷം ഡോളർ സംഭാവന ചെയ്യുമെന്ന് അവർ വ്യക്തമാക്കി. കൊവിഡിനെ തുടര്‍ന്ന് വിദ്യാഭ്യാസ മേഖലയില്‍ ഉള്‍പ്പെടെ പ്രതിസന്ധികള്‍ നേരിട്ടെങ്കിലും ഇന്ത്യൻ വിദ്യാർഥികളെ എത്രയും വേഗം രാജ്യത്തേക്ക് തിരികെ കൊണ്ടുവരാൻ ഓസ്ട്രേലിയ കഠിനമായി പരിശ്രമിക്കുന്നുണ്ടെന്നും പെയ്ൻ പറഞ്ഞു.
Also read: 9/11 സ്മരണയില്‍ അമേരിക്ക; ലോകം നടുങ്ങിയ ദിനത്തിന് രണ്ട് പതിറ്റാണ്ട്
