കാണ്‍പൂർ (ഉത്തർ പ്രദേശ്) : ദുബായിൽ ഷോറും തുടങ്ങാൻ പണം നൽകാത്തതിനെത്തുടർന്ന് മലയാളിയായ ഭർത്താവ് തന്നെ ഫോണിലൂടെ മുത്തലാഖ് ചൊല്ലിയതായി കാണ്‍പൂർ സ്വദേശിനിയായ ദന്ത ഡോക്‌ടറുടെ പരാതി. കാണ്‍പൂരിലെ റാവത്‌പൂർ സ്വദേശിനിയായ ഡോ സേവ സിദ്ദിഖിയാണ് ഭർത്താവും കേരള സ്വദേശിയുമായ സുലാൽ വഹീദ സലാഹിനെതിരെ പൊലീസിൽ പരാതി നൽകിയിരിക്കുന്നത്. സംഭവത്തിൽ കാണ്‍പൂരിലെ റാവത്‌പൂർ പൊലീസ് എഫ്‌ഐആർ രജിസ്റ്റർ ചെയ്‌ത് അന്വേഷണം ആരംഭിച്ചു.
2017 ഒക്‌ടോബർ 30 നായിരുന്നു ഇരുവരും തമ്മിലുള്ള വിവാഹം. ദുബായിൽ വർഷങ്ങളായി ബിസിനസ് ചെയ്‌ത് വരികയാണ് സുലാൽ. വിവാഹ ശേഷം ഭർത്താവും ഭർതൃവീട്ടുകാരും സ്‌ത്രീധനം ആവശ്യപ്പെട്ട് നിരന്തരം ഭീഷണി മുഴക്കിയിരുന്നതായി യുവതി പറയുന്നു. വിവാഹത്തിനായി 30 ലക്ഷത്തോളം രൂപ ചെലവാക്കിയെന്നും, എന്നാൽ ഇതിന് ശേഷം ദുബായിൽ ഷോറൂം തുറക്കാൻ സുലാൽ തന്നോട് 25 ലക്ഷം രൂപ ആവശ്യപ്പെടുകയായിരുന്നുവെന്നും യുവതി പറഞ്ഞു.
വിവാഹം കഴിഞ്ഞ് കുറച്ച് നാളുകൾക്ക് ശേഷം സുലാൽ ബിസിനസിനായി ദുബായിലേക്ക് പോയെന്നും ശേഷം മടങ്ങിവന്നിട്ടില്ലെന്നും സേവ പരാതിയിൽ പറയുന്നു. ഇതിനിടെ താൻ ഒരു പെണ്‍കുഞ്ഞിന് ജന്മം നൽകിയെന്നും കുഞ്ഞിനെക്കാണാൻ പോലും ഭർത്താവ് നാട്ടിലേക്ക് എത്തിയില്ലെന്നും ഇവർ പറയുന്നു. കുഞ്ഞ് ജനിച്ചതിന് പിന്നാലെ വീട്ടുചെലവിനുള്ള പണം നൽകുന്നത് സുലാൽ നിർത്തുകയായിരുന്നു. തുടർന്ന് സേവ ജീവനാംശത്തിനായി കോടതിയിൽ കേസ് ഫയൽ ചെയ്‌തു.
ഇതിൽ രോഷാകുലനായ സുലാൽ ജൂലൈ 23ന് ഫോണിൽ വിളിച്ച് കേസ് പിൻവലിക്കണമെന്ന് ഭീഷണിപ്പെടുത്തി. ഇതിനിടെ മകളെ വളർത്താൻ പണം വേണമെന്നും മാസം ലക്ഷക്കണക്കിന് രൂപ വരുമാനമുണ്ടായിട്ടും പണം അയക്കാത്തതെന്താണെന്നും യുവതി ഇയാളോട് ചോദിച്ചു. ഇതിൽ പ്രകോപിതനായ സുലാൽ തന്നോട് മൂന്ന് തവണ ഫോണിലൂടെ തലാഖ് ചൊല്ലിയെന്നും യുവതി പൊലീസിൽ നൽകിയ പരാതിയിൽ പറയുന്നു.
ഇക്കാര്യം ഭർത്താവിന്‍റെ വീട്ടുകാരെ അറിയിച്ചെങ്കിലും അവരും തന്നോട് തട്ടിക്കയറിയെന്നും, സുലാലിന് 25 ലക്ഷം രൂപ നൽകാൻ ആവശ്യപ്പെടുകയായിരുന്നുവെന്നും യുവതി പറഞ്ഞു. അതേസമയം സുലാലിനെതിരെ എഫ്‌ഐആർ രജിസ്റ്റർ ചെയ്‌തതായി എസിപി കല്യാണ്‍പൂർ വികാസ് പാണ്ഡെ പറഞ്ഞു. സുലാൽ ഉൾപ്പെടെ അഞ്ച് പേർക്കെതിരെയാണ് യുവതി പരാതി നൽകിയിരിക്കുന്നത്. സംഭവത്തിൽ കൂടുതൽ അന്വേഷണത്തിന് ശേഷം തുടർ നടപടികൾ സ്വീകരിക്കുമെന്നും പൊലീസ് അറിയിച്ചു.
കത്തിലൂടെ മുത്തലാഖ് ചൊല്ലിയെന്ന് പരാതി : കഴിഞ്ഞ ദിവസം ഭർത്താവ് കത്തിലൂടെ മുത്തലാഖ് ചൊല്ലിയെന്നാരോപിച്ച് ഉത്തർ പ്രദേശിലെ മഥുര സ്വദേശിനി പൊലീസിൽ പരാതി നൽകിയിരുന്നു. ജില്ലയിലെ കോട്‌വാലി പൊലീസ് സ്‌റ്റേഷന്‍ പരിധിയില്‍ താമസിക്കുന്ന കബീറിനെതിരെയാണ് ഭാര്യ സാലിമ പരാതി നല്‍കിയത്.
രണ്ട് വര്‍ഷത്തോളം പ്രണയത്തിലായിരുന്ന ഇരുവരും ഇക്കഴിഞ്ഞ ജൂണ്‍ ഏഴാം തീയതിയായിരുന്നു വിവാഹിതരായത്. വിവാഹത്തിന് ശേഷം കബീര്‍ ഫത്തേപൂര്‍ സിക്രി ആഗ്രയിലെ ബന്ധുവിന്‍റെ സ്ഥലത്തേക്ക് ഭാര്യയെ കൊണ്ടുപോകുകയും അവിടെ താമസമാക്കുകയും ചെയ്‌തു. ജൂലൈ 21ന് വീട്ടില്‍ പോയി വരാമെന്ന് പറഞ്ഞ് ഭാര്യയെ തനിച്ചാക്കി മടങ്ങിയ കബീര്‍ മടങ്ങിയെത്തിയിരുന്നില്ല.
അടുത്ത ദിവസം തന്‍റെ ഭര്‍ത്താവിനെ അന്വേഷിച്ച് സാലിമ ഭര്‍തൃഗൃഹത്തില്‍ എത്തിയിരുന്നു. എന്നാല്‍ വീട് വിട്ട് പോകാന്‍ ആവശ്യപ്പെട്ടുകൊണ്ട് ഭര്‍ത്താവിന്‍റെ മാതാപിതാക്കള്‍ തന്നെ മര്‍ദിക്കുകയായിരുന്നുവെന്ന് സാലിമ പരാതിയില്‍ പറയുന്നു. പിന്നീട് ജൂലൈ 31ന് കബീര്‍ തന്നെ ഉപേക്ഷിച്ചു എന്ന കത്തായിരുന്നു സാലിമയ്‌ക്ക് ലഭിച്ചിരുന്നത്. തുടർന്ന് യുവതി പൊലീസിൽ പരാതി നൽകുകയായിരുന്നു.
