ഹൈദരാബാദ് : കൊവിഡിന്‍റെ പുതിയ വകഭേദം മുതിര്‍ന്നവരെ പോലെ കുട്ടികളേയും ബാധിക്കുകയാണ്. കുട്ടികളില്‍ അണുബാധ ഗുരുതരമായി മാറാനുള്ള സാധ്യത കുറവാണെങ്കിലും രോഗലക്ഷണങ്ങള്‍ വ്യാപകമായി കാണപ്പെടുന്നുണ്ട്. കൃത്യമായ മുന്‍കരുതലുകള്‍ സ്വീകരിച്ചില്ലെങ്കില്‍ അവര്‍ വൈറസ് വാഹകരായി മാറാനും ഇടയുണ്ട്. കൊവിഡ് രണ്ടാം തരംഗം കുട്ടികളിലുണ്ടാക്കുന്ന ആരോഗ്യപ്രശ്നങ്ങളെക്കുറിച്ച് ഇ ടി വി ഭാരതിന് നൽകിയ പ്രത്യേക അഭിമുഖത്തിൽ വിശദീകരിക്കുകയാണ് ഹൈദരാബാദ് റെയിന്‍ബോ ചില്‍ഡ്രന്‍സ് ആശുപത്രിയിലെ നിയോനാറ്റോളജി ഫെലോ ഡോ.വിജയാനന്ദ് ജമാല്‍പുരി.
കൊവിഡിന്‍റെ പുതിയ വകഭേദം എങ്ങനെയാണ് കുട്ടികളെ ബാധിക്കുന്നത്? ആദ്യ തരംഗത്തെ രണ്ടാം തരംഗവുമായി എങ്ങനെ താരതമ്യം ചെയ്യാം?
ആദ്യ തരംഗത്തില്‍ കുട്ടികളെ അത്രയധികമൊന്നും ഈ വൈറസ് ബാധിക്കുന്നുണ്ടായിരുന്നില്ല. ഉണ്ടെങ്കില്‍ തന്നെ കൂടുതലും ലക്ഷണങ്ങളില്ലാതെയായിരുന്നു. പക്ഷെ കുടുംബത്തിലെ മറ്റാരെങ്കിലും രോഗബാധിതനായി വൈറസ് വാഹകരായി വീട്ടിലെത്തുമ്പോള്‍ ഉണ്ടാകുന്ന ബന്ധപ്പെടല്‍ മൂലം അവരേയും പരിശോധിക്കുമ്പോൾ രോഗം വന്നതായി സ്ഥിരീകരിക്കാറുണ്ട്. എന്നാല്‍ രണ്ടാം തരംഗത്തില്‍ കുട്ടികളെ പ്രാഥമികമായും രോഗം ബാധിക്കുന്നു എന്നതിനാലാണ് പരിശോധനയ്ക്ക് വിധേയമാക്കുന്നത്. കാരണം അവര്‍ രോഗ ലക്ഷണങ്ങള്‍ കാണിക്കുന്നുണ്ട്.എന്നിരുന്നാലും രോഗബാധയുടെ ഗുരുതരാവസ്ഥയും കുട്ടികളില്‍ ഉണ്ടാകുന്ന രോഗ ലക്ഷണങ്ങളും പ്രായപൂര്‍ത്തിയായവരുമായി താരതമ്യം ചെയ്യുമ്പോള്‍ വളരെ കുറവാണ്. എട്ട് വയസ്സിന് താഴെയുള്ള ഏതാനും കുട്ടികളും അതുപോലെ ചില നവജാത ശിശുക്കളും വൈറസ് ബാധിച്ചവരായി കണ്ടുകഴിഞ്ഞു. കൂടുതല്‍ അമ്മമാര്‍ രോഗബാധിതരാകുന്നതിനാലാണ് നവജാത ശിശുക്കള്‍ക്കും വൈറസ് ബാധ ഉണ്ടാകുന്നത്. കുഞ്ഞുങ്ങള്‍ അമ്മമാരുമായി വളരെ അധികം അടുത്ത് ഇടപഴകുന്നു. അതുകൊണ്ട് രോഗം പകരുവാന്‍ വളരെ എളുപ്പവുമാണ്. മുലപ്പാലിലൂടെ വൈറസ് കുഞ്ഞിലേക്ക് പകരുന്നില്ല. എന്നാല്‍ പ്ലാസന്റയിലൂടെ (മറുപിള്ള) രോഗം പകര്‍ന്ന ഏതാനും ചില കേസുകള്‍ ശ്രദ്ധയില്‍പ്പെട്ടു.
ALSO READ : മധ്യപ്രദേശില്‍ ആശങ്ക സൃഷ്ടിച്ച് കൊവിഡ് രോഗികളില്‍ ബ്ലാക്ക് ഫംഗസ്
കുട്ടികളില്‍ കണ്ടുവരുന്ന രോഗ ലക്ഷണങ്ങള്‍ എന്തൊക്കെയാണ്?
കുട്ടികളില്‍ ഞങ്ങള്‍ സര്‍വ്വസാധാരണമായി കണ്ട ലക്ഷണങ്ങള്‍ പനി, ചുമ, തൊണ്ടവേദന, ജലദോഷം എന്നിവയോടൊപ്പം ചില ഉദരസംബന്ധവുമായ ലക്ഷണങ്ങളാണ്. വയറിളക്കവും ഛര്‍ദ്ദിയും ഇതില്‍ ഉള്‍പ്പെടുന്നു. ഒരു കുട്ടിക്ക് അത്തരം ഉദരസംബന്ധമായ പ്രശ്‌നങ്ങള്‍ ഉണ്ടെന്ന പരാതി ഉയരുമ്പോള്‍ അവരെ കൊവിഡ് പരിശോധനയ്ക്ക് വിധേയമാക്കുകയും അവരില്‍ മിക്കവര്‍ക്കും രോഗം ഉണ്ടെന്ന് സ്ഥിരീകരിക്കുകയും ചെയ്തു. സാധാരണയായി മഴക്കാലത്താണ് വയറിളക്കവും ഛര്‍ദ്ദിയും കണ്ടുവരുന്നത്. എന്നാല്‍ നിലവിലുള്ള സാഹചര്യങ്ങള്‍ മൂലം വേനല്‍ക്കാലത്ത് പോലും വൈറസ് ബാധയാൽ കുട്ടികളില്‍ ഇത്തരം ലക്ഷണങ്ങള്‍ കണ്ടുവരുന്നു. 10 വയസ്സിന് മുകളിലുള്ള കുട്ടികളില്‍ സാധാരണയായി കണ്ടുവരുന്ന ലക്ഷണങ്ങളില്‍ തലവേദന, ശരീരവേദന, തളര്‍ച്ച എന്നിവ ഉള്‍പ്പെടുന്നു. രുചിയും മണവും നഷ്ടപ്പെടുന്നതും അനുഭവപ്പെടുന്നുണ്ട്. ഇക്കാരണത്താല്‍ കുട്ടി ഭക്ഷണം കഴിക്കാന്‍ തയ്യാറായിക്കൊള്ളണമെന്നില്ല.
തീവ്രതയുടെ തോത്
ലക്ഷണങ്ങള്‍ കാണിക്കുന്ന മിക്ക കുട്ടികളിലും അത് മിതമായ തോതില്‍ മാത്രമേ അനുഭവപ്പെടുന്നുള്ളൂ. ഗുരുതരമായ അല്ലെങ്കില്‍ അതീവ ഗുരുതരമായ സാഹചര്യങ്ങള്‍ കുട്ടികളില്‍ ഉണ്ടാകുന്നത് വിരളമാണ്. എന്നിരുന്നാലും അണുബാധയെ മിതമായതു മുതല്‍ ഗുരുതരമായത് വരെ എന്നുള്ള വിവിധ ഗണങ്ങളില്‍ ഉള്‍പ്പെടുത്തി പരിഗണിക്കേണ്ടതുണ്ട്. കൂടുതല്‍ രോഗാതുരരായ കുട്ടികളെ തിരിച്ചറിഞ്ഞ് ആവശ്യമെങ്കില്‍ അവര്‍ക്ക് ആശുപത്രി ചികിത്സ ലഭ്യമാക്കേണ്ടത് പ്രധാനമാണ്.
1. മിതമായ തോതിൽ രോഗബാധ കാണിക്കുന്ന കുട്ടികളില്‍ സാധാരണയായി മേല്‍പ്പറഞ്ഞ ലക്ഷണങ്ങളായ പനി, ചുമ അല്ലെങ്കില്‍ തൊണ്ടവേദന, ഛര്‍ദ്ദി അല്ലെങ്കില്‍ വയറിളക്കം എന്നിവ കാണുന്നു. ഇതൊഴിച്ചാല്‍ പൊതുവെ അവര്‍ പ്രശ്‌നങ്ങളില്ലാത്തവരായിരിക്കും. ശ്വസനവുമായി ബന്ധപ്പെട്ട പ്രശ്‌നങ്ങളൊന്നും അവരില്‍ കാണാറില്ല.
2. ഇടത്തരം രോഗബാധയുള്ള കുട്ടികളുടെ കാര്യമെടുത്താല്‍ മറ്റ് ലക്ഷണങ്ങളോടൊപ്പം അവന് അല്ലെങ്കില്‍ അവള്‍ക്ക് അതിവേഗത്തിലുള്ള ശ്വാസോഛ്വാസം അല്ലെങ്കില്‍ ശ്വാസമെടുക്കാന്‍ ബുദ്ധിമുട്ട് എന്നിവ കാണാം.
3. ഗുരുതരമായ രോഗലക്ഷണങ്ങൾ കാണിക്കുന്ന കുട്ടികളില്‍ കൊവിഡ് മൂലം ന്യുമോണിയ ഉണ്ടാകുന്നത് കണ്ടുവരുന്നുണ്ട്. അവരില്‍ ഓക്‌സിജന്‍റെ തോതും സാധാരണ നിലയേക്കാള്‍ കുറവായിരിക്കും. ഈ കുട്ടികള്‍ക്ക് ശ്വാസമെടുക്കാന്‍ ബുദ്ധിമുട്ട്, നെഞ്ചില്‍ മുരള്‍ച്ച അല്ലെങ്കില്‍ ഇറുക്കം എന്നിവ ഉണ്ടായേക്കാം. അവര്‍ക്ക് ക്ഷീണം, അലസത, ഉറക്കം തൂങ്ങല്‍ എന്നിവയും മിക്കപ്പോഴും കണ്ടുവരുന്നു.ഇതിനുപുറമെ അങ്ങേയറ്റം ഗുരുതരമായ രോഗബാധയുടെ കാര്യമെടുത്താല്‍ അതില്‍ ഒന്നിലധികം അവയവങ്ങള്‍ ഉള്‍പ്പെടുന്നതായി കാണാം. കുട്ടിക്ക് വെന്‍റിലേറ്ററിന്‍റെ സഹായം മാത്രമല്ല രക്ത സമ്മര്‍ദ്ദ പിന്തുണ, വൃക്ക പിന്തുണ (ഡയാലിസിസ്) തുടങ്ങിയ ചികിത്സകളും ആവശ്യമാണ്. എന്നാല്‍ അങ്ങേയറ്റം ഗുരുതരമായ രോഗാവസ്ഥയുടെ തോത് കുറവാണ്.
കുട്ടികള്‍ക്ക് ആശുപത്രി പ്രവേശനം ആവശ്യമാണോ?
ആദ്യ തരംഗവുമായി താരതമ്യം ചെയ്യുമ്പോള്‍ കുട്ടികളെ ആശുപത്രിയില്‍ പ്രവേശിപ്പിക്കുന്നതിന്റെ തോത് വര്‍ധിച്ചിട്ടുണ്ട്. അതേസമയം തന്നെ മുതിര്‍ന്നവരുമായി താരതമ്യം ചെയ്യുമ്പോള്‍ ഈ കണക്കുകള്‍ പരിമിതവുമാണ്. ആശുപത്രിയില്‍ പ്രവേശിപ്പിക്കപ്പെട്ടാലും അവര്‍ കൂടുതല്‍ മെച്ചപ്പെട്ട രീതിയില്‍ വേഗത്തില്‍ രോഗമുക്തി പ്രാപിക്കുന്നു. ഇതിനുപുറമെ തീവ്ര പരിചരണം ആവശ്യമായി വരുന്ന സംഭവങ്ങള്‍ കുറവാണ്.
