ഛണ്ഡിഗഡ്: കൊവിഡ് കേസുകൾ കുതിച്ചുയരുന്ന സാഹചര്യത്തിൽ കാർഷിക നിയമങ്ങൾക്കെതിരായ പ്രതിഷേധം താൽക്കാലികമായി നിർത്തിവയ്‌ക്കണമെന്ന് ആവശ്യപ്പെട്ട് ഹരിയാന മുഖ്യമന്ത്രി മനോഹർ ലാൽ ഖട്ടാർ. പ്രതിഷേധക്കാരുമായുള്ള നിരന്തരമായ സമ്പർക്കം മൂലം ഗ്രാമങ്ങളിൽ കൊവിഡ് വ്യാപനം വർധിക്കുന്നുവെന്നാരോപിച്ചാണ് പ്രതിഷേധം നിർത്തിവയ്‌ക്കാൻ അദ്ദേഹം ആഹ്വാനം ചെയ്‌തത്.
കൂടുതൽ വായനയ്‌ക്ക്: ലോക്‌ഡൗണിനെതിരെ പ്രതിഷേധിക്കുമെന്ന് പഞ്ചാബിലെ കർഷക സംഘടനകൾ
കർഷകസമരത്തെ തുടർന്ന് പല ഗ്രാമങ്ങളിലും ഹോട്ട്സ്പോട്ടുകൾ വർധിച്ചു. ധർണ നടക്കുന്നിടത്തു നിന്നും ആളുകൾ പതിവായി ഗ്രാമങ്ങളിലേക്ക് വന്നുപോകുന്നതാണ് ഇതിന് കാരണം. ഈ പ്രതിസന്ധി ഘട്ടത്തിൽ നാമെല്ലാവരുടെയും ലക്ഷ്യം ജനങ്ങളുടെ ജീവൻ രക്ഷിക്കുക എന്നതാണ്. മനുഷ്യജീവനേക്കാള്‍ വലുതായി മറ്റൊന്നുമില്ല. അതിനാൽ പ്രതിഷേധം താൽക്കാലികമായി നിർത്തിവയ്‌ക്കണമെന്നും സ്ഥിതി നിയന്ത്രണവിധേയമായ ശേഷം വീണ്ടും സമരം പുനരാരംഭിക്കണമെന്നും കർഷക നേതാക്കളോട് ഖട്ടാർ അഭ്യർഥിച്ചു.
കൂടുതൽ വായനയ്‌ക്ക്: ഹരിയാനയില്‍ ലോക്ക്‌ഡൗണ്‍ വീണ്ടും നീട്ടി
ഹോട്ട്സ്പോട്ടുകൾ വർധിച്ച സാഹചര്യത്തിൽ ആരോഗ്യവകുപ്പിന്‍റെ 8,000 ടീമുകൾ ഗ്രാമങ്ങളിലെ വീടുകൾതോറും കയറി ജനങ്ങളുടെ ആരോഗ്യപരിശോധന നടത്തും. കൂടാതെ ദരിദ്ര കുടുംബങ്ങളിലെ 50 വയസ് വരെ പ്രായമുള്ള ഒരാളുടെ മരണത്തിന് സർക്കാർ രണ്ട് ലക്ഷം രൂപ സൗജന്യ ഇൻഷുറൻസ് നൽകുമെന്നും മുഖ്യമന്ത്രി അറിയിച്ചു. അതേസമയം കൊവിഡ് പശ്ചാത്തലത്തിൽ ഹരിയാന സർക്കാർ മെയ് 10 വരെ സംസ്ഥാനത്ത് ലോക്ക്ഡൗൺ പ്രഖ്യാപിച്ചു. കേന്ദ്രം പാസാക്കിയ കാർഷിക നിയമങ്ങൾക്കെതിരെ കഴിഞ്ഞ നവംബർ 26 മുതൽ ദേശീയ തലസ്ഥാനത്തിന്‍റെ വിവിധ അതിർത്തികളിൽ കർഷകർ പ്രതിഷേധിച്ചു വരികയാണ്.
കൂടുതൽ വായനയ്‌ക്ക്: ചണ്ഡിഗഡിൽ എല്ലാവർക്കും സൗജന്യ വാക്‌സിൽ
