ചണ്ഡിഗഡ് : പഞ്ചാബിലെ ഗുർദാസ്‌പൂരിന് സമീപം തിങ്കളാഴ്‌ച ഫള്ളാര ഗ്രാമത്തിലുണ്ടായ വെടിവയ്‌പ്പില്‍ നാല് പേർ കൊല്ലപ്പെട്ടു. ഇരുസംഘങ്ങള്‍ തമ്മില്‍ ഭൂമിത്തര്‍ക്കത്തിലായിരുന്നു ആക്രമണ പ്രത്യാക്രമണം. സുഖ്‌രാജ് സിങ്, ജമാൽ സിങ്, നിഷാൻ സിങ് ഇവര്‍ക്കുപുറമെ എതിര്‍ സംഘത്തിലെ മറ്റൊരാളുമാണ് മരിച്ചത്.
നാലാമത്തെയാള്‍ ദസൂയ സ്വദേശിയാണ്. ഇയാളുടെ പേരുവിവരങ്ങള്‍ ലഭ്യമായിട്ടില്ല. സംഭവത്തില്‍ പൊലീസ് അന്വേഷണം ഊര്‍ജിതമാക്കി. ഡി.എസ്‌.പി കുൽവീന്ദർ സിങ് വിർക്കിന്‍റെ നേതൃത്വത്തിലാണ് പരിശോധനകള്‍.
ALSO READ | ക്ഷേത്രത്തിന് മുന്‍പില്‍ നിര്‍ത്തിയിട്ട ബുള്ളറ്റിന് തീപിടിച്ചു ; ഉഗ്ര ശബ്ദത്തില്‍ പൊട്ടിത്തെറി
സംഭവത്തില്‍ ഒരാൾക്ക് പരിക്കേറ്റു. കോൺഗ്രസ് നേതാവും മുന്‍ ഗ്രാമപഞ്ചായത്ത് പ്രസിഡന്‍റുമായ ലവ്ജിത് കൗറിന്‍റെ ഭർത്താവാണ് സുഖ്‌രാജ് സിങ് എന്നാണ് വിവരം. അന്വേഷണം ഊര്‍ജിതമാക്കി പ്രതികളെ ഉടന്‍ പിടികൂടണമെന്ന് കൊല്ലപ്പെട്ടവരുടെ കുടുംബങ്ങള്‍ ആവശ്യപ്പെട്ടു.
