ന്യൂഡല്‍ഹി: ഒരു ദിവസത്തെ ഇടവേളയ്ക്ക് ശേഷം രാജ്യത്ത് ഇന്ധനവില വീണ്ടും കൂട്ടി. പെട്രോള്‍ ലിറ്ററിന് 87 പൈസയും ഡീസലിന് 84 പൈസയുമാണ് വര്‍ധിപ്പിച്ചത്. മാര്‍ച്ച് 22 മുതല്‍ ഇതുവരെ ഇന്ധനവില 7 രൂപയിലേറെ കൂട്ടി.
കൊച്ചിയില്‍ പെട്രോള്‍ ലിറ്ററിന് 112.15 രൂപയും ഡീസലിന് 99.13 രൂപയുമായി. കോഴിക്കോട് പെട്രോളിന് 112.32 രൂപയും ഡീസലിന് 99.31 രൂപയുമാണ്. തിരുവനന്തപുരത്ത് ഡീസലിന് 100.98 രൂപയും പെട്രോളിന് 114.14 രൂപയുമായി ഉയര്‍ന്നു.
ചെന്നൈയില്‍ പെട്രോളിന് ലിറ്ററിന് 107.45 രൂപയും ഡീസലിന് ലിറ്ററിന് 97.52 രൂപയുമാണ്. ഡല്‍ഹിയില്‍ പെട്രോളിന് 101.81 രൂപയും ഡീസലിന് 93.07 രൂപയുമായി. കൊല്‍ക്കത്തയില്‍ പെട്രോളിന് 111.35 രൂപയായപ്പോള്‍ ഡീസലിന് 96.22 രൂപയാണ് വില.
വാണിജ്യ നഗരമായ മുംബൈയില്‍ പെട്രോളിന് 116.72 രൂപയായപ്പോള്‍ ഡീസല്‍ വില 100 കടന്നു. മുംബൈയില്‍ ഡീസല്‍ ലിറ്ററിന് 100.94 രൂപയാണ്. 137 ദിവസത്തെ ഇടവേളയ്ക്ക് ശേഷം മാര്‍ച്ച് 22 മുതലാണ് ഇന്ധനവില വീണ്ടും വര്‍ധിപ്പിച്ചത്.
അഞ്ച് സംസ്ഥാനങ്ങളിലെ തെരഞ്ഞെടുപ്പ് മുന്‍നിര്‍ത്തി, ഇന്ധനവില കൂട്ടുന്നത് നിര്‍ത്തിവയ്ക്കുകയായിരുന്നു. തെരഞ്ഞെടുപ്പ് ഫലം വന്നതിനുപിന്നാലെ വില വര്‍ധിപ്പിയ്ക്കുന്നത് പുനരാരംഭിച്ചു. റഷ്യ-യുക്രൈന്‍ യുദ്ധം മൂലമാണ് ഇന്ധനവിലയില്‍ വർധനവുണ്ടാകുന്നതെന്നാണ് കേന്ദ്ര സര്‍ക്കാരിന്‍റെ വാദം.
Also read: പ്രധാനമന്ത്രിക്ക് വധഭീഷണി; ഭീഷണി സന്ദേശം ലഭിച്ചത് എൻഐഎ ഓഫിസിൽ
