അനകപ്പള്ളി: സാധാരണ മത്സ്യ തൊഴിലാളിയായിരുന്ന മെരുഗു നുകയ്യ ഒരു മീനിനെ വിറ്റ്‌ നേടിയത്‌ 3.90 ലക്ഷം രൂപ. ആന്ധ്രാപ്രദേശിലെ അനകപ്പള്ളി അച്യുതപുരം മണ്ഡലം (Fisherman in Andhra Pradesh) സ്വദേശിയായ മെരുഗു നുകയ്യ കഴിഞ്ഞ തിങ്കളാഴ്‌ച (നവംബര്‍ 27) പതിവുപോലെ കടലിൽ മത്സ്യബന്ധനത്തിന് പോയതാണ്‌. എന്നാൽ ആഴ്‌ചയിലെ ആദ്യ ദിവസം തന്‍റെ ജീവിതത്തെ മാറ്റിമറിക്കുന്നത്ര ശുഭകരമായിരിക്കുമെന്ന് അയാൾ കരുതിയിരുന്നില്ല. നുകയ്യ പിടികൂടിയ ഔഷധമൂല്യമുള്ള അപൂർവ മത്സ്യത്തിന് (Rare 'Gold' Fish) അന്താരാഷ്‌ട്ര വിപണിയിൽ 3.90 ലക്ഷം രൂപ ലഭിച്ചു.
പ്രാദേശികമായി കച്ചിഡി എന്നറിയപ്പെടുന്ന അപൂർവ സ്വർണ്ണമത്സ്യമാണ് മെരുഗു നുകയ്യ പിടികൂടിയത്. പിടികൂടിയ സ്വർണ്ണമത്സ്യത്തിന് 27 കിലോഗ്രാം ഭാരമുണ്ടെന്ന് മത്സ്യത്തൊഴിലാളിയായ മെരുഗു നുകയ്യ പറഞ്ഞു. കച്ചിഡി എന്ന് പേരിട്ടിരിക്കുന്ന ഈ മത്സ്യത്തിന് വിപണിയിൽ ആവശ്യക്കാരേറെയാണ്, ഭാഗ്യശാലികളായ മത്സ്യത്തൊഴിലാളികൾക്ക് അപ്രതീക്ഷിത വിലയും ലഭിക്കുന്നു. അവരിൽ ഒരാളായിരുന്നു മെരുഗു നുകയ്യ. നുകയ്യ അപൂർവ മത്സ്യത്തെ പിടികൂടിയപ്പോൾ, വാർത്ത കാട്ടുതീ പോലെ പടർന്നു, മത്സ്യത്തിന് ആകർഷകമായ വിലയുമായി മത്സ്യ വ്യാപാരികൾ മാർക്കറ്റിലേക്ക് ഒഴുകി.
സ്വർണ്ണ മത്സ്യത്തിൽ അവകാശവാദം ഉന്നയിക്കാൻ ഒന്നിലധികം ആളുകൾ ശ്രമിച്ചതോടെ, ഈ അപൂർവ മത്സ്യം വാങ്ങാൻ ആളുകൾ നിരയായി. അതിനാല്‍ തന്നെ മാർക്കറ്റിൽ മത്സ്യ വില്‍പ്പനയ്‌ക്കായി ലേലം നടന്നു. ഒടുവിൽ പുടിമടക്ക സ്വദേശിയായ മെരുഗു കൊണ്ടയ്യ എന്ന വ്യാപാരി 3.90 ലക്ഷം രൂപയ്ക്ക് മത്സ്യം സ്വന്തമാക്കി. സ്വർണ്ണ മത്സ്യത്തിന്‍റെ രുചി അതിശയകരമാണെന്നും ഒരിക്കൽ ഈ മത്സ്യത്തിന്‍റെ രുചിയറിഞ്ഞാല്‍ വീണ്ടും വീണ്ടും കഴിക്കാൻ ആഗ്രഹിക്കുമെന്നും പ്രദേശ വാസികള്‍ പറഞ്ഞു.
ബ്ലാക്ക്‌സ്‌പോട്ടഡ് ക്രോക്കർ (Blackspotted Croaker) എന്നും അറിയപ്പെടുന്ന സ്വര്‍ണ്ണ മത്സ്യത്തിന് പ്രോട്ടോണിബിയ ഡയകാന്തസ് (Protonibea diacanthus) എന്ന ശാസ്‌ത്രീയ നാമമുണ്ട്. ഇന്‍റോ-പസഫിക്കിൽ കടലില്‍ കാണപ്പെടുന്ന മത്സ്യത്തിന് ഉയർന്ന ഔഷധമൂല്യം ഉണ്ട്. ശ്വാസകോശം, കരൾ, മറ്റ് ആന്തരിക അവയവങ്ങൾ എന്നിവയുടെ രോഗങ്ങൾ ചികിത്സിക്കുന്നതിനുള്ള മരുന്നുകൾ തയ്യാറാക്കാൻ ഇത്‌ ഉപയോഗിക്കുമെന്ന് വിശ്വസിക്കപ്പെടുന്നു.
ഇത്തരത്തില്‍ ഈ വർഷം ജൂലൈയിൽ കാക്കിനാഡ ജില്ലയിലെ യു.കോതപ്പള്ളി മണ്ഡലത്തില്‍ മറ്റൊരു മത്സ്യത്തൊഴിലാളിയായ മച്ച സതീഷ്‌ സമാനമായ മത്സ്യം പിടികൂടിയിരുന്നു അതിന് 3.10 ലക്ഷം രൂപ ലഭിച്ചിരുന്നു.
ഷുഗര്‍ മൗത്ത് ക്യാറ്റ് ഫിഷ്: ചത്തീസ്‌ഗഡിലെ ജഞ്ജഗീർ ചമ്പ ഗ്രാമത്തില്‍ അപൂര്‍വ ഇനത്തില്‍പ്പെട്ട മത്സ്യത്തെ കണ്ടെത്തി. നാല് കണ്ണുകളുള്ള മത്സ്യത്തെയാണ് കണ്ടെത്തിയത്. ഗ്രാമത്തിലെ മത്സ്യത്തൊഴിലാളിയായ കുനാല്‍ മത്സ്യബന്ധനത്തിന് പോയപ്പോഴായിരുന്നു അപൂര്‍വ ഇനത്തില്‍പ്പെട്ട മത്സ്യത്തെ കണ്ടെത്തിയത്. വളരെ ദൂരെനിന്നുപോലും നിരവധി പേരാണ് നാല് കണ്ണുകളുള്ള മത്സ്യത്തെ കാണാനായി എത്തുന്നത്. മനോഹരമായ മത്സ്യത്തിന് വിമാനത്തിന്‍റെ രൂപമാണുള്ളത്.
