ബെംഗളൂരു : കോടികളുടെ നികുതി വെട്ടിപ്പ് കേസിൽ ജുഡീഷ്യൽ കസ്റ്റഡിയിലുള്ള സുകേഷ് ചന്ദ്രശേഖറിന്‍റെ ആഢംബര കാറുകൾ ലേലം ചെയ്യാനൊരുങ്ങി ആദായ നികുതി വകുപ്പ് (Conman Sukesh Chandrasekhar's Luxury cars to be auctioned). നികുതി പണം തിരിച്ചുപിടിക്കുന്നതിന്‍റെ ഭാഗമായാണ് കാറുകൾ ലേലം ചെയ്യുന്നതെന്ന് നികുതി വകുപ്പ് അധികൃതർ അറിയിച്ചു. കാറുകൾ നവംബർ 28ന് ലേലം ചെയ്യാനാണ് തീരുമാനം.
സാമ്പത്തിക തട്ടിപ്പ് കേസിൽ (Sukesh Chandrasekhar Financial Fraud Case) അറസ്റ്റിലായ സുകേഷ് ചന്ദ്രശേഖർ ഇപ്പോൾ ഡൽഹി ജയിലിലാണ്. നിരവധി സ്ഥാപനങ്ങൾക്ക് നികുതി കുടിശ്ശിക വരുത്തിയതിന് സുകേഷിനെ ഇൻകം ടാക്‌സ് നേരത്തെ അറസ്റ്റ് ചെയ്‌തിരുന്നു. 308 കോടിയുടെ നികുതി കുടിശ്ശികയാണ് സുകേഷിനെതിരെ ചുമത്തിയിരിക്കുന്നത്.
ഇതോടെ പിടിച്ചെടുത്ത സ്വത്തുക്കൾ ലേലം ചെയ്യാൻ നികുതി വകുപ്പ് അധികൃതർ തീരുമാനിക്കുകയായിരുന്നു. പിടിച്ചെടുത്തവയിൽ ബിഎംഡബ്ല്യു, റേഞ്ച് റോവർ, ജാഗ്വാർ, പോർഷെ, ബെന്‍റ്‌ലി, റോൾസ് റോയ്‌സ്, ലംബോർഗിനി, ഡ്യുക്കാട്ടി ഡയവൽ തുടങ്ങി 12 ആഢംബര കാറുകളും ഉൾപ്പെടുന്നു. കേന്ദ്ര നിയമ മന്ത്രാലയത്തിലെ ഉദ്യോഗസ്ഥന്‍റെ പേരിൽ നൂറുകണക്കിന് കോടി രൂപയുടെ തട്ടിപ്പ് നടത്തിയെന്നാണ് സുകേഷിനെതിരെയുള്ള ആരോപണം.
മരുന്ന് കമ്പനി പ്രൊമോട്ടറുടെ ഭാര്യയിൽ നിന്ന് 200 കോടി രൂപ തട്ടിയെടുത്തു എന്ന കേസിൽ ജയിലിൽ കഴിയവെ സുകേഷ് ചന്ദ്രശേഖറിനെ ഇഡി മറ്റൊരു കേസിലും അറസ്റ്റ് ചെയ്‌തിരുന്നു. റെലിഗെര്‍ പ്രമോട്ടറില്‍ നിന്ന് മൂന്നരക്കോടി രൂപ തട്ടിയെടുത്തു എന്ന കേസിലായിരുന്നു എൻഫോഴ്‌സ്‌മെന്‍റ് ഡയറക്‌ടറേറ്റിന്‍റെ നടപടി. 2012 മുതൽ 2018 വരെയുള്ള കാലയളവിൽ 308.48 കോടി രൂപയാണ് സുകേഷ് തട്ടിയെടുത്തത്. തമിഴ്‌നാട്, കേരളം ഉൾപ്പെടെ വിവിധ സ്ഥലങ്ങളിൽ നിന്നാണ് വാഹനങ്ങൾ പിടിച്ചെടുത്തത്. ഈ വാഹനങ്ങൾ ലേലത്തിനായി ബെംഗളൂരുവിലെത്തിച്ച് ആദായ നികുതി ഓഫിസിൽ സൂക്ഷിച്ചിരിക്കുകയാണ്.
'അയോധ്യയിലെ ശ്രീരാമവിഗ്രഹത്തിന് സ്വർണ കിരീടം': അയോധ്യയിലെ ശ്രീരാമവിഗ്രഹത്തിന് സ്വർണ കിരീടം നൽകണമെന്ന് ആവശ്യപ്പെട്ട് സുകേഷ് ദിവസങ്ങൾക്ക് മുമ്പ് ശ്രീരാമജന്മഭൂമി തീർഥക്ഷേത്ര ട്രസ്റ്റ് മേധാവിക്ക് രണ്ട് പേജുള്ള കത്ത് എഴുതിയിരുന്നു. 11 കിലോയോളം ഭാരമുള്ള 916.24 കാരറ്റ് സ്വർണം കൊണ്ട് നിർമിച്ച കിരീടം അയോധ്യയ്ക്ക് നൽകുമെന്നാണ് കത്തിൽ പറയുന്നത്. ഈ കിരീടത്തിൽ 5 കാരറ്റ് ഭാരമുള്ള 101 വജ്രങ്ങൾ പതിപ്പിച്ചിട്ടുണ്ട്. കിരീടത്തിന്‍റെ മധ്യഭാഗത്തുള്ള വജ്രം 50 കാരറ്റ് ഉണ്ടാകുമെന്നും സുകേഷ് കത്തിൽ കൂട്ടിച്ചേർത്തിരുന്നു.
ദക്ഷിണേന്ത്യയിലെ ഏറ്റവും പ്രശസ്‌തമായ ജ്വല്ലറികളുടെ വിദഗ്‌ധ മാർഗനിർദേശത്തിലാണ് കിരീടം രൂപകൽപന ചെയ്യുന്നത്. ഈ കിരീടത്തിന്‍റെ നിർമാതാക്കൾ 1900 മുതൽ ജ്വല്ലറി കരകൗശലത്തിൽ വൈദഗ്‌ധ്യം നേടിയവരാണ്. ബാലാജി തിരുമല ക്ഷേത്രം ഉൾപ്പെടെയുള്ള വിവിധ പുണ്യ ക്ഷേത്രങ്ങൾക്കായി താൻ ആഭരണങ്ങൾ പണി കഴിപ്പിച്ചുവെന്നും സുകേഷ് കത്തിൽ പറഞ്ഞു.
സുകേഷ് ചന്ദ്രശേഖർ ജയിലിലായതിനാൽ അദ്ദേഹത്തിന്‍റെ നിയമോപദേശകനായ അനന്ത് മാലിക്കിനാണ് ട്രസ്റ്റിന് കിരീടം നൽകാനുള്ള ചുമതല. കിരീടവുമായി ബന്ധപ്പെട്ട ആവശ്യമായ ബില്ലുകൾ, രസീതുകൾ, സർട്ടിഫിക്കറ്റുകൾ എന്നിവ ഉൾപ്പെടെ എല്ലാ നിയമ നടപടികളും പൂർത്തീകരിച്ചിട്ടുണ്ടെന്ന് അനന്ത് മാലിക് ഉറപ്പാക്കുമെന്ന് സുകേഷ് കത്തിൽ പറഞ്ഞു.
