ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ ഡല്‍ഹിയിലെ വസതിയ്‌ക്ക് സമീപം അജ്ഞാത ഡ്രോണ്‍ കണ്ടെത്തിയതിനെ തുടര്‍ന്ന് പൊലീസ് അന്വേഷണം ആരംഭിച്ചു. ഇന്ന് പുലര്‍ച്ചെ 5.30 ഓടെയാണ് പ്രധാനമന്ത്രിയുടെ സംരക്ഷണ ചുമതലയുള്ള സ്പെഷ്യൽ പ്രൊട്ടക്ഷൻ ഗ്രൂപ്പ് (എസ്‌പിജി) പ്രധാനമന്ത്രിയുടെ വസതിക്ക് മുകളിൽ അജ്ഞാതമായ ഡ്രോണ്‍ കണ്ടെത്തിയത്. പിന്നാലെ ഡല്‍ഹി പൊലീസില്‍ വിവരം അറിയിക്കുകയായിരുന്നു.
ഉടന്‍ സ്ഥലത്തെത്തിയ പൊലീസ് ഡ്രോണ്‍ കണ്ടെത്തുന്നതിനായി തെരച്ചില്‍ ആരംഭിച്ചു. അതേസമയം പ്രദേശത്തു നിന്ന് ഡ്രോണോ മറ്റ് സംശയാസ്‌പദമായ ഉപകരണങ്ങളോ കണ്ടെത്താനായില്ല.
'പ്രധാനമന്ത്രിയുടെ വസതിക്ക് സമീപം പറക്കുന്ന അജ്ഞാതമായ ഉപകരണം കണ്ടതായി വിവരം ലഭിച്ചു. സമീപ പ്രദേശങ്ങളിൽ തിരച്ചിൽ നടത്തിയെങ്കിലും അത്തരത്തിലുള്ള ഒരു വസ്‌തുവും കണ്ടെത്താനായില്ല. എയർ ട്രാഫിക് കൺട്രോൾ റൂമുമായും (എടിസി) ബന്ധപ്പെട്ടു. പ്രധാനമന്ത്രിയുടെ വസതിക്ക് സമീപം അത്തരത്തിലുള്ള പറക്കുന്ന വസ്‌തുക്കളൊന്നും കണ്ടെത്താന്‍ അവർക്കും സാധിച്ചിട്ടില്ല' -ഡൽഹി പൊലീസ് പ്രസ്‌താവനയിൽ പറഞ്ഞു.
ഒരു നിയന്ത്രിത വ്യോമാതിര്‍ത്തിക്കുള്ളില്‍ വരുന്നതാണ് പ്രധാനമന്ത്രിയുടെ വസതി. ഈ മേഖല റെഡ് നോ-ഫ്ലൈ സോണ്‍ അല്ലെങ്കില്‍ നോ ഡ്രോണ്‍ സോണ്‍ എന്ന് വ്യക്തമാക്കിയിട്ടുണ്ട്. ഉയർന്ന വ്യക്തികളുടെയും നിർണായക സർക്കാർ സ്ഥാപനങ്ങളുടെയും സുരക്ഷയും സുരക്ഷയും ഉറപ്പാക്കുന്നതിനാണ് ഇത്തരം നിയന്ത്രണങ്ങള്‍ കൊണ്ടുവരുന്നത്.
സുരക്ഷ പ്രോട്ടോക്കോളുകളുടെ ലംഘനത്തെക്കുറിച്ചും സെൻസിറ്റീവ് ഏരിയകളിൽ അനധികൃത ഡ്രോണുകൾ ഉയർത്തിയേക്കാവുന്ന ഭീഷണിയെക്കുറിച്ചും സംഭവം ഗുരുതരമായ ആശങ്കകൾ സൃഷ്‌ടിച്ചിട്ടുണ്ട്. ഈ അടുത്തകാലത്തായി ഏറെ പ്രചാരം നേടിയവയാണ് ഡ്രോണുകൾ. വിനോദ ആവശ്യങ്ങൾ മുതൽ വാണിജ്യപരവും സൈനികവുമായ ഉപയോഗങ്ങൾക്ക് വരെ അവയുടെ ആപ്ലിക്കേഷനുകൾ ഉപയോഗിക്കുന്നു.
ഇന്ത്യന്‍ അതിര്‍ത്തി മേഖലയില്‍ നേരത്തെ നിരവധി തവണ പാക് ഡ്രോണുകള്‍ സൈന്യം വെടിവച്ചിട്ടിരുന്നു. അടുത്തിടെ പഞ്ചാബിലെ അമൃത്‌സർ ജില്ലയിലെ ഭൈനി രാജ്‌പുതാന ഗ്രാമത്തിന് സമീപം അന്താരാഷ്‌ട്ര അതിർത്തിയിൽ (ഐബി) പാകിസ്ഥാൻ ഡ്രോൺ കണ്ടെടുത്തിരുന്നു. ജൂൺ 7 രാത്രിയാണ് പാകിസ്ഥാൻ ഡ്രോൺ രാജ്യാന്തര അതിർത്തിയില്‍ നിന്നും ബിഎസ്‌എഫും (അതിർത്തി രക്ഷ സേന) പഞ്ചാബ് പൊലീസും പിടികൂടിയത്.
ബിഎസ്‌എഫ് പ്രസ്‌താവന പ്രകാരം, പൊലീസ് നാക്ക പാർട്ടിയും ബിഎസ്‌എഫിനൊപ്പം ചേർന്ന് പ്രദേശത്ത് സംയുക്ത തെരച്ചിൽ നടത്തി. തെരച്ചിലിനൊടുവില്‍, തകർന്ന നിലയിലുള്ള ഒരു ഡ്രോൺ കണ്ടെടുത്തതായി അധികൃതർ അറിയിച്ചു. ഭൈനി രാജ്‌പുതാന ഗ്രാമത്തിന്‍റെ പ്രാന്തപ്രദേശത്തുള്ള രജതൽ-ഭരോപാൽ-ഡാവോക്ക് ട്രൈ ജങ്‌ഷനോട് ചേർന്നുള്ള കൃഷിയിടത്തില്‍ നിന്നുമാണ് ഡ്രോൺ കണ്ടെടുത്തത്.
കണ്ടെടുത്ത ഡ്രോൺ ഡിജെഐ മാട്രൈസ് 300 ആര്‍ടികെ മോഡൽ സീരീസിന്‍റെ ക്വാഡ്‌കോപ്റ്ററാണെന്ന് റിപ്പോർട്ടിൽ പറയുന്നു. ആകാശത്ത് ചലിക്കാതെ നിലയുറപ്പിക്കാനാവുന്ന ഡ്രോണുകളാണ് ക്വാഡ്‌കോപ്റ്ററുകള്‍. സാധാരാണ ഡ്രോണുകളെക്കാള്‍ മികച്ച വിവരശേഖരണങ്ങളും ഉപയോഗവും ഇവയ്‌ക്ക് സാധ്യമാകും. അമൃത്‌സർ സെക്‌ടറിൽ ബിഎസ്‌എഫ് സൈനികർ മറ്റൊരു പാകിസ്ഥാൻ ഡ്രോൺ പിടികൂടിയതായും ബിഎസ്‌എഫ് വൃത്തങ്ങൾ അറിയിച്ചു. നേരത്തെ ജൂണ്‍ അഞ്ചിനും മയക്കുമരുന്ന് കടത്തുകയായിരുന്ന പാക് ഡ്രോണ്‍ സൈന്യം വെടിവച്ചിട്ടിരുന്നു.
