ജയ്‌പൂർ : രാജസ്ഥാനിലെ ശിവപുരി ധാമിൽ ദർശനത്തിനെത്തുന്ന ഭക്തർക്ക് ഡ്രസ് കോഡ് നടപ്പിലാക്കാൻ തീരുമാനം. കോട്ട ജില്ലയിലെ തെക്ര പ്രദേശത്തുള്ള ക്ഷേത്രത്തിലെ സന്ദർശകർക്കാണ് ഡ്രസ് കോഡ് നടപ്പിലാക്കാൻ ഭരണസമിതി തീരുമാനിച്ചത്. ഭക്തർ ദർശനത്തിനെത്തുമ്പോൾ മാന്യമായ വസ്‌ത്രം ധരിക്കണമെന്നതാണ് ഡ്രസ് കോഡ് കൊണ്ട് ക്ഷേത്രം മാനേജ്‌മെന്‍റ് ലക്ഷ്യമിടുന്നത്.
ശിവപുരം ക്ഷേത്രത്തിന്‍റെ പരിസരങ്ങളിൽ സന്ദർശകർ കീറിപ്പറിഞ്ഞ വസ്‌ത്രങ്ങളും ഷോട്‌സുകളും ധരിക്കുന്നത് മാനേജ്‌മെന്‍റ് വിലക്കിയിട്ടുണ്ട്. ക്ഷേത്രത്തിൽ ഡ്രസ് കോഡ് നടപ്പാക്കാൻ കമ്മിറ്റി തീരുമാനമെടുത്തതായി ക്ഷേത്രത്തിന്‍റെ അധികാരി സനാതൻ പുരി മഹാരാജ് സ്ഥിരീകരിച്ചു. തീരുമാനം സംബന്ധിച്ച് ക്ഷേത്രത്തിന് പുറത്ത് നോട്ടിസ് പതിച്ചിട്ടുണ്ടെന്നും അദ്ദേഹം പറഞ്ഞു.
മാന്യമായ വസ്‌ത്രം ധരിക്കണം : മോശം വസ്‌ത്രം ധരിച്ച് നിരവധി ഭക്തർ ധാം സന്ദർശിക്കുന്നുവെന്ന പരാതിയെ തുടർന്നാണ് ഡ്രസ് കോഡ് നടപ്പാക്കാൻ തീരുമാനിച്ചതെന്ന് പുരി മഹാരാജ് പറഞ്ഞു. പുരുഷന്മാരും സ്‌ത്രീകളും കീറിപ്പറഞ്ഞ ജീൻസും ഡിസൈൻ ചെയ്‌ത വസ്‌ത്രങ്ങളും ധരിച്ച് ക്ഷേത്രത്തിലെത്തുന്നുണ്ട്. അതിനാൽ എല്ലാവരും സനാതന ധർമ്മം പാലിക്കണമെന്നും മാന്യമായ വസ്‌ത്രം ധരിച്ച് മാത്രം ക്ഷേത്രത്തിൽ വരണമെന്നും അഭ്യർത്ഥിക്കുന്ന ഒരു ബോർഡ് സ്ഥാപിച്ചിട്ടുണ്ടെന്നും അദ്ദേഹം പറഞ്ഞു.
കോട്ടയിലെ ശിവപുരി ധാം സ്വസ്‌തിക രൂപത്തിൽ സ്ഥാപിച്ചിരിക്കുന്ന 525 ശിവലിംഗങ്ങൾക്ക് പേരുകേട്ടതാണ്. ശ്രാവണ മാസത്തിൽ, ഏകദേശം 10,000 മുതൽ 15,000 വരെ ആളുകൾ ദർശനത്തിനായി രാവിലെ മുതൽ വൈകുന്നേരം വരെ ക്ഷേത്രത്തിൽ എത്തുന്നുണ്ട്. തിങ്കളാഴ്‌ചകളിൽ ഇത് 30,000 മുതൽ 40,000 വരെയാകും.
നാഗ്‌പൂരിലെ ക്ഷേത്രങ്ങളിൽ ഡ്രസ് കോഡ് : ക്ഷേത്ര ഭരണ സമിതികളുടെ സംഘടനയായ മഹാരാഷ്‌ട്ര മന്ദിർ മഹാസംഘം ഈ വർഷം മെയ് മാസത്തിൽ നാഗ്‌പൂർ ജില്ലയിലെ നാല് ക്ഷേത്രങ്ങളിൽ ഭക്തർക്കായി സമാനമായ ഡ്രസ് കോഡ് സംവിധാനം കൊണ്ടുവന്നിരുന്നു. സംസ്ഥാനത്തൊട്ടാകെയുള്ള 300 ക്ഷേത്രങ്ങളിൽ ഇത് നടപ്പാക്കാനാണ് മന്ദിർ മഹാസംഘം പദ്ധതിയിടുന്നത്. നിലവിൽ ധന്തോളിയിലെ ഗോപാലകൃഷ്‌ണ ക്ഷേത്രം, ബെല്ലാരിയിലെ സങ്കത്‌മോചൻ പഞ്ചമുഖി ഹനുമാൻ ക്ഷേത്രം, കനോലിബാരയിലെ ബൃഹസ്‌പതി ക്ഷേത്രം, ഹിൽടോപ്പിലെ ദുർഗാമാതാ ക്ഷേത്രം എന്നിവിടങ്ങളിലാണ് ഡ്രസ് കോഡ് നടപ്പാക്കിയിട്ടുള്ളത്.
മാന്യമായ വസ്‌ത്രം ധരിക്കാത്തവരെ ക്ഷേത്രത്തിൽ പ്രവേശിപ്പിക്കേണ്ടതില്ലെന്നാണ് സമിതിയുടെ തീരുമാനം. ക്ഷേത്രത്തിന് അനുചിതമായ വസ്‌ത്രം ധരിച്ച് ഭക്തരെ ശ്രദ്ധയിൽപ്പെട്ടാൽ അവർക്ക് ക്ഷേത്രത്തിന് പുറത്ത് ആവശ്യമായ വസ്‌ത്രം നൽകും. സർക്കാർ നിയന്ത്രണത്തിലുള്ള ക്ഷേത്രങ്ങളിലും ഡ്രസ് കോഡ് സംവിധാനം കൊണ്ടുവരാൻ അഭ്യർഥിക്കുമെന്നും സമിതി അറിയിച്ചിട്ടുണ്ട്.
also read : വിചിത്രമായ ഹെയര്‍ സ്റ്റൈലുകളും മോഡേണ്‍ വസ്‌ത്രങ്ങളും പാടില്ല; ഹരിയാനയിലെ ആശുപത്രി ജീവനക്കാര്‍ക്ക് ഡ്രസ് കോഡ്
