ന്യൂഡൽഹി: ഡിഫൻസ് റിസർച്ച് ആന്‍ഡ് ഡെവലപ്‌മെന്‍റ് ഓർഗനൈസേഷൻ (ഡിആർഡിഒ) വികസിപ്പിച്ചെടുത്ത 2-ഡിയോക്‌സി-ഡി-ഗ്ലൂക്കോസ് (2-ഡിജി) എന്ന കൊവിഡ് പ്രതിരോധ മരുന്നിന് അനുമതി. ഡ്രഗ്‌സ് കൺട്രോളർ ഓഫ് ഇന്ത്യയാണ് മരുന്നിന് അടിയന്തര അനുമതി നൽകിയത്. ഹൈദരാബാദിലെ ഡോ. റെഡ്ഡീസ് ലബോറട്ടറിയുമായി സഹകരിച്ച് ഡിആർഡിഒ ലാബായ ഇൻസ്റ്റിറ്റ്യൂട്ട് ഓഫ് ന്യൂക്ലിയർ മെഡിസിൻ ആൻഡ് അലൈഡ് സയൻസസ് (ഐ‌എൻ‌എം‌എസ്) ആണ് മരുന്ന് വികസിപ്പിച്ചത്.
മരുന്നിന്‍റെ ഉപയോഗത്തിലൂടെ കൂടുതൽ വേഗത്തിൽ രോഗമുക്തി നേടാൻ സാധിക്കുമെന്ന് ക്ലിനിക്കൽ പരിശോധനകളിൽ തെളിഞ്ഞതായി ഡിആർഡിഒ അറിയിച്ചു. 2-ഡിജി പരീക്ഷിച്ച കൂടുതൽ രോഗികളുടെയും ആർടിപിസിആർ പരിശോധനാഫലം നെഗറ്റീവായി മാറിയതായും രോഗത്തിന്‍റെ തീവ്രത കുറയ്‌ക്കുന്നതിന് ഈ മരുന്ന് വളരെയധികം സഹായിക്കുമെന്നും ഡിആർഡിഒ വ്യക്തമാക്കി.
2020 ഏപ്രിലിൽ ഐ‌എൻ‌എം‌എസ്-ഡിആർഡിഒ ശാസ്‌ത്രജ്ഞരാണ് കൊവിഡ് വൈറസിനെ ചെറുക്കാൻ മരുന്നിന് കഴിയുമെന്ന് കണ്ടെത്തിയത്. ഇതിന്‍റെ അടിസ്ഥാനത്തിൽ 2020 മെയ്‌ മുതൽ 2-ഡിജിയുടെ രണ്ടാംഘട്ട ക്ലിനിക്കൽ പരീക്ഷണങ്ങൾ ആരംഭിച്ചു. 2020 നവംബറിൽ മൂന്നാംഘട്ട പരീക്ഷണങ്ങൾക്ക് ഡിസിജിഐ അനുമതി നൽകി.
2020 ഡിസംബർ മുതൽ 2021 മാർച്ച് വരെയാണ് മൂന്നാംഘട്ട പരീക്ഷണങ്ങൾ നടന്നത്. ഡൽഹി, ഉത്തർപ്രദേശ്, പശ്ചിമബംഗാൾ, ഗുജറാത്ത്, രാജസ്ഥാൻ, മഹാരാഷ്‌ട്ര, ആന്ധ്രാപ്രദേശ്, തെലങ്കാന, കർണാടക, തമിഴ്‌നാട് എന്നീ സംസ്ഥാനങ്ങളിൽ നിന്നുള്ള 220 രോഗികളിലാണ് പരീക്ഷണം നടത്തിയത്. ശേഷം ക്ലിനിക്കൽ ഫലങ്ങൾ ഡിസിജിഐക്ക് സമർപ്പിക്കുകയായിരുന്നു.
