ന്യൂഡല്‍ഹി : തെരഞ്ഞെടുപ്പ് നടന്ന അഞ്ച് സംസ്ഥാനങ്ങളിലും നേരിട്ട വലിയ തോല്‍വികളുടെ പശ്ചാത്തലത്തില്‍ കോണ്‍ഗ്രസ് പ്രവര്‍ത്തക സമിതി യോഗം വൈകാതെ ചേരുമെന്ന് പാര്‍ട്ടി ജനറല്‍ സെക്രട്ടറി രണ്‍ദീപ് സിംഗ് സുര്‍ജേവാല. സോണിയ ഗാന്ധിയുടെ നേതൃത്വത്തിലാകും യോഗം. തോല്‍വി അംഗീകരിക്കുന്നതായും ഫലം വിലയിരുത്തുമെന്നും അദ്ദേഹം കൂട്ടിച്ചേര്‍ത്തു. തോല്‍വി പാര്‍ട്ടി ചര്‍ച്ച ചെയ്യും.
കഴിഞ്ഞ നാലര വര്‍ഷമായി ക്യാപ്റ്റന്‍ അമരീന്ദര്‍ സിംഗിന്‍റെ നേതൃത്വത്തിലുള്ള സര്‍ക്കാരിനെതിരെ വലിയ ഭരണ വിരുദ്ധ വികാരമാണ് ഉയര്‍ന്നത്. ഇതാണ് ഫലത്തില്‍ പ്രതിഫലിച്ചത്. വിരുദ്ധ വികാരം മറികടക്കാന്‍ കോണ്‍ഗ്രസിന് കഴിഞ്ഞില്ല. അതിനാലാണ് ജനങ്ങള്‍ ആം ആദ്‌മി പാര്‍ട്ടിക്ക് വോട്ട് ചെയ്തത്. ചരൺജിത് സിംഗ് ചന്നിയിലൂടെ കോൺഗ്രസ് പുതിയ നേതൃത്വത്തെ അവതരിപ്പിച്ചിരുന്നു.
Also Read: അഞ്ചിടങ്ങളിലെ തെരഞ്ഞെടുപ്പ് ഫലം തത്സമയം
എന്നാല്‍ ഭരണ വിരുദ്ധത മറികടക്കാന്‍ ഇത് ഫലപ്രദമായിരുന്നില്ല. ഒരു മാറ്റത്തിനായാണ് ആളുകൾ എഎപിക്ക് വോട്ട് ചെയ്തതെന്നും സുര്‍ജേവാല പറഞ്ഞു. കഴിഞ്ഞ വർഷം സെപ്റ്റംബറിൽ പാർട്ടി മുഖ്യമന്ത്രിയെ മാറ്റിയിരുന്നു. ശേഷം ആദ്യ ദളിത് മുഖ്യമന്ത്രിയായി ചരൺജിത് സിംഗ് ചന്നി അധികാരമേറ്റു.
ഫെബ്രുവരി 20ന് വോട്ടെടുപ്പിന് മാസങ്ങള്‍ക്ക് മുമ്പായിരുന്നു ഇത്. ജനവിധി അംഗീകരിക്കുന്നുവെന്നും പാർട്ടി അതിൽ നിന്ന് പാഠങ്ങള്‍ പഠിക്കുമെന്നും നേരത്തെ രാഹുല്‍ ഗാന്ധി പ്രതികരിച്ചിരുന്നു.
