ഹൈദരാബാദ്: തെലങ്കാന പ്രദേശ് കോൺഗ്രസിന്‍റെ (പിസിസി) അധ്യക്ഷനായി എംപിയായ എ. രേവന്ത് റെഡ്ഡിയെ കോൺഗ്രസ് അധ്യക്ഷ സോണിയ ഗാന്ധി നിയമിച്ചു. എൻ. ഉത്തം റെഡ്ഡിക്ക് പകരമാണ് രേവന്തിനെ പാർട്ടി അധ്യക്ഷനായി നിയമിച്ചത്. ഉത്തം റെഡ്ഡിയുടെ നേത്യത്വത്തിലുള്ള കമ്മിറ്റിയിൽ വർക്കിങ് പ്രസിഡന്‍റ് ആയിരുന്നു രേവന്ത്.
മുൻ ക്രിക്കറ്റ് താരം മുഹമ്മദ് അസറുദ്ദീൻ ഉൾപ്പെടെ അഞ്ച് വർക്കിങ് പ്രസിഡന്‍റുമാരെയും 10 സീനിയർ വൈസ് പ്രസിഡന്‍റുമാരെയും പുതുതായി നിയമിച്ചിട്ടുണ്ട്. ജെ. ഗീത റെഡ്ഡി, എം. അഞ്ജൻ കുമാർ യാദവ്, ടി. ജഗ്ഗ റെഡ്ഡി, ബി. മഹേഷ് കുമാർ ഗൗഡ് എന്നിവരാണ് മറ്റ് വർക്കിങ് പ്രസിഡന്‍റുമാർ.
Also Read: പ്രധാനമന്ത്രിയുടെ മൻ കി ബാത്തിന് കാതോർത്ത് രാജ്യം
പ്രചാരണ സമിതി, തെരഞ്ഞെടുപ്പ് മാനേജ്മെന്‍റ് കമ്മിറ്റി, എഐസിസി പ്രോഗ്രാം നടപ്പാക്കൽ കമ്മിറ്റി എന്നിവയിലേക്കുള്ള ചെയർമാൻ, കൺവീനർമാരെയും തെരഞ്ഞെടുത്തതായി കോൺഗ്രസ് നേതൃത്വം അറിയിച്ചു.
സംസ്ഥാനത്തെ കോൺഗ്രസിന്‍റെ പഴയ പ്രതാപം തിരികെ കൊണ്ടുവരാൻ ശ്രമിക്കുമെന്നും യുവജനങ്ങൾക്കിടയിലെ തൊഴിലില്ലായ്മയും കർഷകരുൾപ്പെടെയുള്ളവരുടെ പ്രശ്നങ്ങളും പരിഹരിക്കാൻ ശ്രമിക്കുമെന്നും രേവന്ത് പറഞ്ഞു. സോണിയ ഗാന്ധിയും രാഹുൽ ഗാന്ധിയും തന്നിൽ അർപ്പിച്ച വിശ്വാസം സംരക്ഷിക്കുമെന്ന് രേവന്ത് ഹൈദരാബാദിൽ പറഞ്ഞു.
