ജയ്‌പൂർ: നിയമസഭാ തെരഞ്ഞെടുപ്പിന് (Rajastan Assembly Election) ദിവസങ്ങള്‍ മാത്രം ശേഷിക്കെ രാജസ്ഥാനില്‍ കോൺഗ്രസ് പ്രകടന പത്രിക പുറത്തിറക്കി (Congress Released Election Manifesto In Rajastan). രാജസ്ഥാൻ പി സി സി ഓഫീസിൽ നടന്ന ചടങ്ങിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ (Mallikarjun Kharge), മുഖ്യമന്ത്രി അശോക് ഗെലോട്ട് (Ashok Gehlot), പാർട്ടി സംസ്ഥാന അധ്യക്ഷൻ ഗോവിന്ദ് സിങ് ദോടസര, സിപി ജോഷി, സച്ചിൻ പൈലറ്റ് എന്നിവർ ചേർന്നാണ് പ്രകടന പത്രിക പുറത്തിറക്കിയത്.
‘ജൻ ഗോഷ്‌ണ പത്ര’ (Jan Ghoshna Patra) എന്ന പേരില്‍ പുറത്തിറക്കിയ പ്രകടന പത്രികയില്‍ സർക്കാർ രൂപീകരണത്തിന് ശേഷം സംസ്ഥാനത്ത് ജാതി സെൻസസ് (Caste Census) നടത്തും എന്നതടക്കമുള്ള വാഗ്‌ദാനങ്ങളുണ്ട്. കോൺഗ്രസ് വീണ്ടും അധികാരത്തിൽ വന്നാൽ സംസ്ഥാനത്തെ ജനങ്ങൾക്ക് പാർട്ടി ഏഴ് വാഗ്‌ദാനങ്ങൾ ഇതിനോടകം പ്രഖ്യാപിച്ചിട്ടുണ്ടെന്നും അവ നിറവേറ്റുന്നതിനാണ് മുൻഗണനയെന്നും അശോക് ഗെലോട്ട് ചടങ്ങിൽ പറഞ്ഞു. 2030-ഓടെ പുതിയ രാജസ്ഥാൻ സൃഷ്‌ടിക്കാനാണ് പാർട്ടി ലക്ഷ്യമിടുന്നതെന്നും ഇത് മുന്നിൽ കണ്ടാണ് പ്രകടന പത്രിക തയ്യാറാക്കിയതെന്നും അദ്ദേഹം വ്യക്തമാക്കി.
ഏഴ് വാഗ്‌ദാനങ്ങൾ ഇങ്ങനെ:
- ഗൃഹ ലക്ഷ്‌മി യോജനയ്ക്ക് കീഴിൽ കുടുംബനാഥയ്ക്ക് 10,000 രൂപ വാർഷിക ഓണറേറിയം.
- 500 രൂപയ്ക്ക് 1.05 കോടി കുടുംബങ്ങൾക്ക് എൽപിജി സിലിണ്ടറുകൾ.
- കന്നുകാലികളെ വളർത്തുന്നവരിൽ നിന്ന് കിലോയ്ക്ക് 2 രൂപയ്ക്ക് ചാണകം വാങ്ങൽ.
- സർക്കാർ ജീവനക്കാർക്കുള്ള പഴയ പെൻഷൻ പുനഃസ്ഥാപിക്കാന്‍ നിയമനിർമാണം.
- സർക്കാർ കോളേജുകളിൽ പ്രവേശനം നേടുന്ന വിദ്യാർഥികൾക്ക് ലാപ്‌ടോപ്പ്, ടാബ്‌ലെറ്റ് വിതരണം.
- പ്രകൃതിക്ഷോഭം മൂലമുണ്ടാകുന്ന നഷ്‌ടം നികത്താൻ ഒരു കുടുംബത്തിന് 15 ലക്ഷം രൂപ വരെ ഇൻഷുറൻസ് പരിരക്ഷ.
- സംസ്ഥാനത്ത് ഇംഗ്ലീഷ് മീഡിയം സ്‌കൂളുകൾ വർധിപ്പിക്കും. വിദ്യാർഥികൾക്ക് ഇംഗ്ലീഷ് മീഡിയത്തില്‍ സകൂൾ വിദ്യാഭ്യാസം ഉറപ്പാക്കും.
സംസ്ഥാനത്തെ 3.32 കോടി ജനങ്ങൾ 'മിഷൻ 2030' നായി തങ്ങളുടെ നിർദ്ദേശങ്ങൾ സമർപ്പിച്ചെന്നും, പ്രകടനപത്രിക തയ്യാറാക്കുമ്പോൾ ഇവ മനസ്സിലുണ്ടായിരുന്നെന്നും ഗെലോട്ട് പറഞ്ഞു. കോൺഗ്രസ് എല്ലായ്‌പ്പോഴും പ്രകടനപത്രികയെ ഗൗരവത്തോടെയാണ് സമീപിക്കുന്നത്. നിറവേറ്റാൻ കഴിയാത്ത വാഗ്‌ദാനങ്ങൾ നൽകരുതെന്നാണ് തങ്ങളുടെ നിലപാടെന്നും ഗെലോട്ട് പറഞ്ഞു.
"ഞങ്ങൾ കേന്ദ്ര സർക്കാരിൽ നിന്ന് സാമൂഹ്യസുരക്ഷയ്ക്കുള്ള അവകാശം ആവശ്യപ്പെടുന്നു. നമ്മൾ ലോകനേതാവാകുന്നതിനെക്കുറിച്ചാണ് സംസാരിക്കുന്നത്, പക്ഷേ പോഷകാഹാരക്കുറവും പട്ടിണിയുമാണ് ആദ്യം ശ്രദ്ധിക്കേണ്ടത്. രാജസ്ഥാനിൽ കഴിഞ്ഞ അഞ്ച് വർഷത്തിനിടെ നമ്മുടെ ആളോഹരി വരുമാനം വർദ്ധിച്ചു. 2030 ഓടെ പ്രതിശീർഷ വരുമാനത്തിൽ രാജസ്ഥാൻ ഒന്നാം സ്ഥാനത്തെത്തണമെന്നത് ഞങ്ങളുടെ സ്വപ്‌നമാണ്." ഗെലോട്ട് പറഞ്ഞു.
പ്രകടനപത്രികയിലെ മറ്റ് പ്രധാന വാഗ്‌ദാനങ്ങൾ:
- കാമധേനു പദ്ധതിയിൽ ഉള്‍പ്പടുത്തി കർഷകർക്ക് രണ്ട് കന്നുകാലികൾക്ക് ഇൻഷുറൻസ് നൽകും. മൃഗങ്ങളുടെ മരണം സംഭവിച്ചാല്‍ 45,000 രൂപ നഷ്‌ടപരിഹാരം നൽകും.
- തൊഴിലുറപ്പ് പദ്ധതിക്ക് കീഴിലുള്ള തൊഴിൽ കാലയളവ് 100ൽ നിന്ന് 150 ദിവസമായി ഉയർത്തും.
- കർഷകർക്ക് രണ്ട് ലക്ഷം രൂപ വരെ പലിശരഹിത വായ്‌പ നൽകും.
- എല്ലാ ഗ്രാമങ്ങളും ഇന്‍റർനെറ്റ് വഴി ബന്ധിപ്പിക്കും.
- സ്ത്രീ സുരക്ഷയ്ക്കായി ഗാർഡുകളെ നിയമിക്കും.
- പഞ്ചായത്തീരാജ് പ്രതിനിധികൾക്ക് പ്രതിമാസ ഓണറേറിയം നൽകും.
- സംസ്ഥാനത്ത് പുതിയ വിദ്യാഭ്യാസ നയം കൊണ്ടുവരും.
- യുവാക്കൾക്ക് നാല് ലക്ഷം സർക്കാർ ജോലികൾ നൽകും.
- സംസ്ഥാനത്ത് മൊത്തം 10 ലക്ഷം പേർക്ക് തൊഴിൽ നൽകും.
- എല്ലാ പൊതുസ്ഥലങ്ങളിലും സിസിടിവി ക്യാമറകൾ സ്ഥാപിക്കും.
- കായിക താരങ്ങൾക്കായി ഖേൽ മിത്ര കേഡറെ നിയമിക്കും.
- കുറഞ്ഞ താങ്ങുവിലയ്ക്ക് കർഷകരിൽ നിന്ന് വിളകൾ വാങ്ങാൻ നിയമം കൊണ്ടുവരും.
