ന്യൂഡല്‍ഹി: 2024ലെ ലോക്‌സഭ തെരഞ്ഞെടുപ്പ് ഉള്‍പ്പെടെയുള്ള തെരഞ്ഞെടുപ്പുകളില്‍ സ്വാധീനം ചെലുത്തുന്നതിനായി രാഹുല്‍ ഗാന്ധിയുടെ നേതൃത്വത്തില്‍ വീണ്ടും ജോഡോ യാത്ര ആസൂത്രണം ചെയ്‌ത് കോണ്‍ഗ്രസ്. സെപ്‌റ്റംബറിലാണ് യാത്രയുടെ രണ്ടാം ഭാഗം തുടരാന്‍ പാര്‍ട്ടിയുടെ തീരുമാനം. ഗുജറാത്തിലെ പോര്‍ബന്തറില്‍ നിന്നും ത്രിപുരയിലെ അഗര്‍ത്തലയിലേക്കാണ് ജോഡോ യാത്ര നടത്തുക.
പാര്‍ട്ടിക്കുള്ളില്‍ സജീവ ചര്‍ച്ച: നാല് സംസ്ഥാനങ്ങളില്‍ തെരഞ്ഞെടുപ്പ് നടക്കാനിരിക്കുന്ന സാഹചര്യത്തിലാണ് വീണ്ടും യാത്ര പുനരാരംഭിക്കുന്നത്. ജോഡോ യാത്രയുടെ രണ്ടാം ഭാഗം നടത്താന്‍ പാര്‍ട്ടി നേതാക്കള്‍ തീരുമാനിച്ചിട്ടുണ്ടെങ്കിലും നടത്താനുള്ള തിയതിയെ കുറിച്ചും ജോഡോ യാത്ര തുടരേണ്ട പാതയെ കുറിച്ചും നിലവില്‍ പാര്‍ട്ടിക്കുള്ളില്‍ ചര്‍ച്ചകള്‍ പുരോഗമിക്കുകയാണ്. ''രണ്ടാമതും ജോഡോ യാത്ര നടത്തണമെന്നാണ് നേതാക്കള്‍ ആഗ്രഹിക്കുന്നതെന്നും ഇക്കാര്യത്തെ കുറിച്ചുള്ള വ്യക്തമായ അന്തിമ തീരുമാനം എടുക്കേണ്ടത് ഹൈക്കമാന്‍ഡാണ്. ഹൈക്കമാന്‍ഡ് അത്തരമൊരു തീരുമാനം എടുക്കുമെന്നാണ് തങ്ങള്‍ പ്രതീക്ഷിക്കുന്നതെന്ന് എഐസിസി സംഘടനയുടെ ചുമതലയുള്ള സെക്രട്ടറി വംശി ചന്ദ് റെഡ്ഡി ഇടിവിയോട് പറഞ്ഞു.
കോണ്‍ഗ്രസ് നേതാവ് രാഹുല്‍ ഗാന്ധിയുടെ നേതൃത്വത്തില്‍ നടന്ന ആദ്യ ജോഡോ ഇന്ത്യയുടെ തെക്ക് വടക്കന്‍ സംസ്ഥാനങ്ങളിലൂടെയാണ് കടന്ന് പോയത്. അടുത്ത നവംബറില്‍ നടക്കാനിരിക്കുന്ന നാല് സംസ്ഥാനങ്ങളിലെ നിയമസഭ തെരഞ്ഞെടുപ്പും 2024 ലെ ലോക്‌സഭ തെരഞ്ഞെടുപ്പും മുന്നില്‍ കണ്ടുള്ള പ്രവര്‍ത്തനങ്ങള്‍ പുരോഗമിക്കുന്നതിനാല്‍ രണ്ടാമത്തെ ജോഡോ യാത്രക്ക് സമയമെന്നത് ഏറെ നിര്‍ണായകമാണ്. കഴിഞ്ഞ തവണ ജോഡോ യാത്ര നടത്താന്‍ സമയം ധാരാളം ഉണ്ടായിരുന്നുവെന്നും മുതിര്‍ന്ന എഐസിസി നേതാവ് പറഞ്ഞു.
കഴിഞ്ഞ തവണത്തെ പോലെയുള്ള പദയാത്രയില്‍ നിന്നും വ്യത്യസ്‌തമായി സംസ്ഥാനങ്ങളിലെ തെരഞ്ഞെടുത്ത പ്രത്യേക കേന്ദ്രങ്ങളിലൂടെ യാത്ര നടത്തിയാല്‍ സമയ പ്രശ്‌നം അധികം അഭിമുഖീകരിക്കേണ്ടി വരില്ലെന്നും അദ്ദേഹം പറഞ്ഞു. മാത്രമല്ല സെപ്‌റ്റംബര്‍, ഒക്‌ടോബര്‍ മാസങ്ങളില്‍ പരമാവധി ജനങ്ങളില്‍ കോണ്‍ഗ്രസിന്‍റെ സ്വാധീനം ചെലുത്താനും ഇത്തരത്തിലുള്ള യാത്ര കൊണ്ട് സാധിക്കുമെന്നും എഐസിസി ഭാരവാഹി പറഞ്ഞു.
136 ദിനം നീണ്ട ആദ്യ ജോഡോ യാത്ര: 2022 സെപ്‌റ്റംബര്‍ ഏഴിനാണ് കോണ്‍ഗ്രസ് നേതാവ് രാഹുല്‍ ഗാന്ധിയുടെ നേതൃത്വത്തില്‍ കന്യാകുമാരിയില്‍ നിന്നും ഭാരത് ജോഡോ യാത്ര ആരംഭിച്ചത്. 136 ദിവസം നീണ്ടു നിന്ന യാത്ര 2023 ജനുവരി 30ന് ജമ്മു കശ്‌മീര്‍ തലസ്ഥാനമായ ശ്രീനഗറില്‍ അവസാനിച്ചു. ശ്രീനഗറിലെ ഷേര്‍-ഇ-കശ്‌മീര്‍ അന്താരാഷ്‌ട്ര ക്രിക്കറ്റ് സ്റ്റേഡിയത്തിലായിരുന്നു ജോഡോ യാത്രയുടെ സമാപന സമ്മേളനം.
ഗുജറാത്തില്‍ നിന്നുള്ള തുടക്കം ഏറെ സന്തോഷകരം: കഴിഞ്ഞ തവണ കന്യാകുമാരിയിൽ നിന്ന് ജോഡോ യാത്ര ആരംഭിക്കുന്നതിന് മുമ്പായി സെപ്‌റ്റംബർ അഞ്ചിന് അഹമ്മദാബാദിലെത്തിയ രാഹുല്‍ ഗാന്ധി മഹാത്മാഗാന്ധി സ്‌മാരകത്തിൽ എത്തി പ്രാർഥിച്ചിരുന്നു. ''ഗുജറാത്ത് മഹാത്മാഗാന്ധിയുടെ നാടായതിനാൽ അദ്ദേഹത്തിന്‍റെ ജന്മസ്ഥലമായ പോർബന്തറിൽ നിന്ന് രാഹുല്‍ ഗാന്ധി തന്‍റെ രണ്ടാം യാത്ര ആരംഭിച്ചാൽ ഞങ്ങൾ വളരെ സന്തുഷ്‌ടരാണെന്ന്” ഗുജറാത്ത് സിഎൽപി നേതാവ് അമിത് ചാവ്ദ ഇടിവി ഭാരതിനോട് പറഞ്ഞു.
