പട്‌ന: കോണ്‍ഗ്രസ് നേതാവ് രാഹുല്‍ ഗാന്ധിയുടെ ഫ്ലൈയിങ്ങ് കിസ് വിവാദവുമായി ബന്ധപ്പെട്ട് വീണ്ടും വിവാദ പരാമര്‍ശവുമായി ബിഹാറില്‍ നിന്നുള്ള കോണ്‍ഗ്രസ് എംഎല്‍എ. ഫ്ലൈയിങ് കിസിനെ ചൊല്ലിയുള്ള വിവാദം അടിസ്ഥാന രഹിതമാണെന്നും അനാവശ്യമാണെന്നും എംഎൽഎ നീതു സിങ് ഇടിവി ഭാരതിനോട് പറഞ്ഞു. 'രാഹുല്‍ ജീക്ക് ഫ്ലൈയിങ് കിസ് കൊടുക്കണമെങ്കില്‍ അതിന് ഇഷ്‌ടം പോലെ പെണ്‍കുട്ടികളെ കിട്ടുമെന്നും 50 വയസ് പിന്നിട്ട സ്ത്രീക്ക് കൊടുക്കേണ്ട കാര്യമില്ലെന്നും' എംഎല്‍എ. രാഹുല്‍ ജീക്ക് വേറെ പെണ്‍കുട്ടികളെ കിട്ടാഞ്ഞിട്ടാണോയെന്നും എംഎല്‍എ ആവര്‍ത്തിച്ച് ചോദിച്ചു.
രാഹുല്‍ ഗാന്ധിക്കെതിരെ ഉയരുന്ന വിവാദങ്ങള്‍ അടിസ്ഥാന രഹിതമാണെന്നും അനാവശ്യമാണെന്നും എംഎല്‍എ പറഞ്ഞു. ഇതുസംബന്ധിച്ച് സോഷ്യല്‍ മീഡിയയില്‍ പ്രചരിക്കുന്ന ദൃശ്യങ്ങള്‍ രാഹുലിനെ തകർക്കാനുള്ള ബിജെപിയുടെ കുതന്ത്രമാണെന്നും എംഎല്‍എ പറഞ്ഞു. ഞങ്ങളുടെ നേതാവിനെതിരെ ഇത്തരത്തിൽ ആരോപണം ഉന്നയിക്കുമ്പോൾ സ്‌മൃതി ഇറാനി സ്വയം ലജ്ജിക്കണം. സ്വന്തം സുഹൃത്തിന്‍റെ ഭർത്താവിനെ പ്രണയിച്ച് വിവാഹം കഴിച്ച സ്‌മൃതിയുടെ വീഡീയോ എല്ലാവരും കണ്ടതാണെന്നും എംഎൽഎ നീതു സിങ് പറഞ്ഞു.
രാഹുല്‍ ഗാന്ധി സ്‌പീക്കര്‍ക്ക് നല്‍കിയ ഫ്ലൈയിങ് കിസില്‍ സ്‌മൃതി ഇറാനി തെറ്റിദ്ധരിച്ചതെങ്ങനെയെന്ന് തനിക്ക് മനസിലാകുന്നില്ലെന്നും എംഎല്‍എ പറഞ്ഞു. 'ഞങ്ങളുടെ രാഹുല്‍ ഗാന്ധിക്ക് പെണ്‍കുട്ടികളെ കിട്ടാന്‍ ബുദ്ധിമുട്ടൊന്നുമില്ല. ഫ്ലൈയിങ് കിസ് കൊടുക്കാന്‍ ആഗ്രഹമുണ്ടെങ്കില്‍ അതിന് ഇഷ്‌ടം പോലെ പെണ്‍കുട്ടികളുണ്ട്. അല്ലാതെ 50 കഴിഞ്ഞ സ്ത്രീക്ക് നല്‍കേണ്ട കാര്യമില്ലെന്നും' എംഎല്‍എ പറഞ്ഞു.
രാഹുല്‍ ഗാന്ധിയും ഫ്ലൈയിങ് കിസ് വിവാദവും: മണിപ്പൂര്‍ കലാപവുമായി ബന്ധപ്പെട്ട് ലോക്‌സഭയിലുണ്ടായ അവിശ്വാസ പ്രമേയ ചര്‍ച്ചകള്‍ക്ക് ശേഷം മടങ്ങുമ്പോഴാണ് രാഹുല്‍ ഗാന്ധിക്കെതിരെയുള്ള ഫ്ലൈയിങ് കിസ് വിവാദം ഉയര്‍ന്നത്. ചര്‍ച്ചയില്‍ പങ്കെടുത്തതിന് ശേഷം രാഹുല്‍ ഗാന്ധി മടങ്ങുമ്പോള്‍ ബിജെപി നേതാക്കള്‍ കൂവുകയും പരിഹസിക്കുകയും ചെയ്‌തിരുന്നു. ഇതിനിടെ കെ.സി വേണുഗോപാല്‍ അടക്കമുള്ള നേതാക്കളെ നോക്കി രാഹുല്‍ ഗാന്ധി കൈ വീശി കാണിച്ചിരുന്നു. ഇതിന് പിന്നാലെ ബിജെപി ബെഞ്ചുകള്‍ക്ക് നേരെയും കൈവീശി കാണിച്ചിരുന്നു. ഇതിനെതിരെയാണ് ആരോപണം ഉയര്‍ന്നത്.
ആരോപണവുമായി സ്‌മൃതി ഇറാനി: ലോക്‌സഭയില്‍ സംസാരിക്കുന്നതിനിടെ കേന്ദ്രമന്ത്രി സ്‌മൃതി ഇറാനി രാഹുല്‍ ഗാന്ധിയെ കുറ്റപ്പെടുത്തിയിരുന്നു. രാഹുൽ ഗാന്ധി സ്‌ത്രീ വിരുദ്ധനാണെന്നും അതുകൊണ്ടാണ്‌ അദ്ദേഹം പാര്‍ലമെന്‍റില്‍ ഇത്തരത്തില്‍ പെരുമാറിയതെന്നും പറഞ്ഞു. സ്‌ത്രീകൾ ഇരിക്കുന്ന പാര്‍ലമെന്‍റിനുള്ളില്‍ ഇങ്ങനെ പെരുമാറുന്നത് ശരിയല്ലെന്നും സ്‌മൃതി ഇറാനി പറഞ്ഞിരുന്നു. ലോകത്തിലെ തന്നെ ആദ്യ സംഭവമാണിതെന്നും സ്‌മൃതി കുറ്റപ്പെടുത്തിയിരുന്നു.
