ചണ്ഡീഗഢ്: പഞ്ചാബിൽ തുടരുന്ന രാഷ്ട്രീയ അനിശ്ചിതത്വത്തിന് പരിഹാരം കാണാൻ കോൺഗ്രസ് ഹൈക്കമാൻഡ് ശ്രമം തുടരുന്നു. മുഖ്യമന്ത്രി പദത്തിനൊപ്പം രണ്ട് ഉപമുഖ്യമന്ത്രിമാർക്ക് സാധ്യത. സംസ്ഥാനത്ത് ആര് മുഖ്യമന്ത്രി ആയാലും രണ്ട് ഉപമുഖ്യമന്ത്രിമാർ ഉണ്ടാകുമെന്ന് പാർട്ടി വൃത്തങ്ങൾ അറിയിച്ചു.
ആരെല്ലാമാണ് ഉപമുഖ്യമന്ത്രിയാകുമെന്നത് മുഖ്യമന്ത്രി ആരാകുമെന്നതിനെ ആശ്രയിച്ചിരിക്കുമെന്നും പാർട്ടി വൃത്തങ്ങൾ വ്യക്തമാക്കി. പഞ്ചാബ് മുഖ്യമന്ത്രിയെ തീരുമാനിക്കാനായി രാഹുൽ ഗാന്ധിയുടെ നേതൃത്വത്തിൽ കോൺഗ്രസ് പാർട്ടി യോഗം ചേർന്നിരുന്നു. മുതിർന്ന നേതാക്കളായ അംബിക സോണി, കോൺഗ്രസ് ജനറൽ സെക്രട്ടറി കെസി വേണുഗോപാൽ തുടങ്ങിയവർ യോഗത്തിൽ പങ്കെടുത്തത്.
സംസ്ഥാനത്തെ നിലവിലെ സാഹചര്യങ്ങൾ വിലയിരുത്തി അടുത്ത മുഖ്യമന്ത്രിയെ തീരുമാനിക്കുന്നതിന് മുന്നോടിയായാണ് യോഗം നടന്നത്. കോൺഗ്രസ് നിയമസഭ കക്ഷി യോഗം ചേർന്ന ശേഷമാണ് പ്രഖ്യാപനമെന്നായിരുന്നു റിപ്പോർട്ടുകൾ. അതേ സമയം അംബിക സോണി മുഖ്യമന്ത്രി സ്ഥാനത്ത് നിന്ന് പിന്മാറിയെന്നും റിപ്പോർട്ടുകളുണ്ട്.
കോണ്‍ഗ്രസ് നേതാവ് നവജ്യോത് സിങ് സിദ്ദുവിനെ മുഖ്യമന്ത്രിയാക്കാനുള്ള ഏത് നീക്കത്തെയും തടയുമെന്ന് രാജിവച്ച ശേഷം പഞ്ചാബ് മുഖ്യമന്ത്രി അമരീന്ദർ സിങ് വ്യക്തമാക്കിയിരുന്നു. വൈകിട്ട് ചേർന്ന കോണ്‍ഗ്രസ് അടിയന്തര നിയമസഭാകക്ഷി യോഗത്തിന് ശേഷമാണ് അമരീന്ദർ സിങ് രാജി പ്രഖ്യാപിച്ചത്. തുടർന്ന് രാജ്ഭവനിലെത്തി ഗവർണറെ കണ്ട് രാജിക്കത്ത് കൈമാറുകയായിരുന്നു.
READ MORE: പഞ്ചാബ് മുഖ്യമന്ത്രി; കോൺഗ്രസ് പാർട്ടി യോഗം ചേർന്നു
