ഗാസിയാബാദ്: സ്‌കൂള്‍ ബസും കാറും കൂട്ടിയിടിച്ചുണ്ടായ അപകടത്തില്‍ സ്‌ത്രീകളടക്കം ആറ് പേര്‍ മരിക്കുകയും രണ്ട് പേര്‍ക്ക് ഗുരുതരമായി പരിക്കേല്‍ക്കുകയും ചെയ്‌തു. ഉത്തര്‍ പ്രദേശിലെ ഗാസിയാബാദിലെ ഡല്‍ഹി- മീററ്റ് എക്‌സ്‌പ്രസ് ഹൈവേയില്‍ ഇന്ന് പുലര്‍ച്ചെയായിരുന്നു സംഭവം. പുലര്‍ച്ചെ ആറ് മണിക്ക് അപകടം നടന്നതിനാല്‍ സ്‌കൂള്‍ ബസില്‍ കുട്ടികള്‍ ഉണ്ടായിരുന്നില്ലെന്ന് പൊലീസ് പറഞ്ഞു.
ഗാസിപൂരിനടുത്തുള്ള പമ്പില്‍ നിന്നും ഇന്ധനം നിറച്ച ശേഷം സ്‌കൂള്‍ ബസ് തെറ്റായ ദിശയിലായിരുന്നു സഞ്ചരിച്ചിരുന്നത്. മീററ്റില്‍ നിന്നും വന്ന കാര്‍ ഗുരുഗ്രാമിലേക്ക് പോകും വഴിയാണ് അപകടം സംഭവിച്ചത്. ബസ് തെറ്റായ ദിശയില്‍ സഞ്ചരിച്ചതാണ് അപകടത്തിന് കാരണമെന്ന് അഡീഷണല്‍ ഡെപ്യൂട്ടി കമ്മിഷണര്‍ പറഞ്ഞു.
പരിക്കേറ്റവരെ അടുത്തുള്ള ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് എക്‌സ്‌പ്രസ് വേയിലെ ഗതാഗതം തടസപ്പെട്ടു. സംഭവ സ്ഥലത്ത് നിന്നും അപകടത്തില്‍പെട്ട വാഹനങ്ങള്‍ നീക്കം ചെയ്യുവാനുള്ള നടപടികള്‍ ആരംഭിച്ചിരിക്കുകയാണ്. ഇന്ത്യന്‍ ശിക്ഷാനിയമത്തിലെയും മോട്ടോര്‍ വാഹന വകുപ്പിന്‍റെ നിയമത്തിലെ പ്രസക്തമായ വകുപ്പുകളും പ്രകാരം കേസ് രജിസ്‌റ്റര്‍ ചെയ്‌തിട്ടുണ്ട്. ബസ് ഡ്രൈവറെ ഞങ്ങള്‍ കസ്‌റ്റഡിയിലെടുത്തിട്ടുണ്ടെന്ന് പൊലീസ് അറിയിച്ചു.
കഴിഞ്ഞ ദിവസം പുലര്‍ച്ചെ ഉത്തര്‍ പ്രദേശില്‍ ടെംപോയുമായി, അമിതവേഗത്തിലെത്തിയ ടാങ്കര്‍ ലോറി കൂട്ടിയിടിച്ച് അപകടമുണ്ടായിരുന്നു. ലഖ്‌നൗ വാരണാസി ഹൈവേയിൽ പ്രതാപ്‌ഗഡിലെ ലീലാപൂർ പൊലീസ് സ്‌റ്റേഷൻ പരിധിയിലെ മോഹൻഗഞ്ച് മാർക്കറ്റിന് സമീപമായിരുന്നു അപകടം നടന്നത്.
ബസും മിനി ലോറിയും കൂട്ടിയിടിച്ച് അപകടം: അതേസമയം, കണ്ണൂര്‍ തോട്ടടയിൽ ബസും മിനി ലോറിയും കൂട്ടിയിടിച്ച് ബസ് യാത്രക്കാരൻ മരിച്ചു. മരിച്ച യാത്രക്കാരനെ തിരിച്ചറിഞ്ഞിട്ടില്ല. ചൊവ്വാഴ്‌ച പുലർച്ചെ 12.45 ഓടെയാണ്‌ ദാരുണമായ അപകടം നടന്നത്.
മണിപ്പാലിൽ നിന്ന്‌ പത്തനംതിട്ടയിലേക്ക്‌ പോകുകയായിരുന്ന കല്ലട ട്രാവൽസിന്‍റെ ടൂറിസ്‌റ്റ് ബസും തലശ്ശേരിയിൽ നിന്ന്‌ കണ്ണൂർ ഭാഗത്തേക്ക്‌ പോകുകയായിരുന്ന മിനി ലോറിയും തമ്മിലാണ് കൂട്ടിയിടിച്ച് അപകടം സംഭവിച്ചത്. അപകടത്തിൽ 27 യാത്രക്കാർക്കാണ് പരിക്കേറ്റത്. ഇതിൽ രണ്ട് പേരുടെ നില ഗുരുതരമാണ്.
ലോറി ഡ്രൈവർക്കും പരിക്കേറ്റിട്ടുണ്ട്. പരിക്കേറ്റ ഒരു സ്‌ത്രീയുടെ നില അതീവ ഗുരുതരമാണ്. ഇവർക്ക് അടിയന്തര ശസ്‌ത്രക്രിയ നടത്തിയെന്നാണ് വിവരം. മണിപ്പാലിലും മംഗളൂരുവിലും പഠിക്കുന്ന വിദ്യാർഥികളും ബസിലുണ്ടായിരുന്നു.
പരിക്കേറ്റവരെ വിവിധ ആശുപത്രികളിൽ പ്രവേശിപ്പിക്കുകയും ചിലരെ പ്രാഥമിക ചികിത്സ നൽകി ഡിസ്‌ചാർജ് ചെയ്യുകയും ചെയ്‌തു. മിംസ് ആശുപത്രിയിൽ പ്രവേശിപ്പിച്ച 19 പേരിൽ ഒന്‍പത് പേരെയും ബേബി മെമ്മോറിയൽ ആശുപത്രിയിൽ പ്രവേശിപ്പിച്ച 11 പേരിൽ 6 പേരെയും ഇതിനോടകം തന്നെ ഡിസ്‌ചാർജ് ചെയ്‌തിട്ടുണ്ട്.
ബസിന്‍റെ പിന്നിലായിരുന്നു ലോറി ഇടിച്ചത്. ഇടിയുടെ ആഘാതത്തിൽ മൂന്ന് തവണ കറങ്ങി തലകീഴായി റോഡിന് കുറുകെയാണ് ബസ് മറിഞ്ഞത്. ഇതോടെ ഇവിടുത്തെ ഗതാഗതവും തടസപ്പെട്ടു. ലോറി ഇടിച്ച് കയറി സമീപത്തെ കടയും തകർന്നിരുന്നു. ആന്ധ്രാപ്രദേശ് രജിസ്ട്രേഷനിൽ ഉള്ളതാണ് അപകടത്തിൽപ്പെട്ട ലോറി.
