ന്യൂഡൽഹി: ലോക്‌ഡൗൺ ഏർപ്പെടുത്തിയ സാഹചര്യത്തിൽ ഭവനരഹിതർക്കും സാമ്പത്തികമായി പിന്നോക്കം നിൽക്കുന്ന വിഭാഗത്തിനും അടിയന്തര ആശ്വാസം ആവശ്യപ്പെട്ട പൊതുതാൽപര്യ ഹർജി സുപ്രീം കോടതി തള്ളി. ജസ്റ്റിസ് എൻവി രമണയുടെ നേതൃത്വത്തിലുള്ള ബെഞ്ചാണ് സ്വാമി അഗ്നിവേഷ് സമർപ്പിച്ച ഹർജി തള്ളിയത്.
ലോക്‌ഡൗൺ ഒരു വലിയ പ്രതിസന്ധി സൃഷ്ടിച്ചുവെന്നും എല്ലാം ചെയ്തുവെന്ന കേന്ദ്രത്തിന്‍റെ വാദം തെറ്റാണെന്നും അഗ്നിവേഷിന് വേണ്ടി ഹാജരായ സീനിയർ അഡ്വക്കേറ്റ് കോളിൻ ഗോൺസാൽവസ് വാദിച്ചു. എന്നാൽ ഞങ്ങളെ വിശ്വസിക്കാതിരിക്കാൻ നിങ്ങൾക്ക് ഒരു കാരണവുമില്ലെന്ന് കേന്ദ്രത്തിന് വേണ്ടി വാദിച്ച സോളിസിറ്റർ ജനറൽ തുഷാർ മേത്ത പറഞ്ഞു. ഇവ സ്വയംതൊഴിൽ നേടുന്നതിനുള്ള നിവേദനങ്ങളാണ്. കോടതി അത്തരം അപേക്ഷകൾ സ്വീകരിക്കരുതെന്നും അദ്ദേഹം പറഞ്ഞു. എല്ലാ നിർദ്ദേശങ്ങളും പാലിക്കുന്നുണ്ടെന്ന് കേന്ദ്രം ഉറപ്പാക്കുമെന്നും അദ്ദേഹം കോടതിക്ക് ഉറപ്പ് നൽകി.
