ന്യൂഡൽഹി: പൗരത്വം ഭേദഗതി നിയമം (സി‌എ‌എ), ദേശീയ പൗരത്വ പട്ടിക, ദേശീയ ജനസംഖ്യാ പട്ടിക എന്നിവ സംസ്ഥാനത്ത് നടപ്പാക്കില്ലെന്ന് ജാർഖണ്ഡിലെ കോൺഗ്രസ് എം‌എൽ‌എ ഇർഫാൻ അൻസാരി. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും പൗരത്വത്തിന്‍റെയും എൻ‌ആർ‌സിയുടെയും പ്രശ്‌നങ്ങൾ ഉന്നയിച്ച് രാജ്യത്തെ ജനങ്ങളെ തെറ്റിദ്ധരിപ്പിക്കുകയാണെന്നും അൻസാരി ഇടിവി ഭാരതിനോട് പറഞ്ഞു.
സി‌എ‌എ, എൻ‌ആർ‌സി, എൻ‌പി‌ആർ തുടങ്ങിയവക്ക് പകരം തൊഴിലില്ലായ്‌മ പോലെയുള്ള പ്രശ്‌നങ്ങളിൽ സർക്കാർ ശ്രദ്ധ തിരിക്കണം. പരിഹരിക്കപ്പെടേണ്ട പ്രധാന പ്രശ്‌നങ്ങളിൽ നിന്ന് ജനങ്ങളുടെ ശ്രദ്ധ തിരിക്കുകയാണ് സർക്കാർ ചെയ്യുന്നതെന്നും എം‌എൽ‌എ ആരോപിച്ചു. രാജ്യത്തിന്‍റെ വിവിധ ഭാഗങ്ങളിലുള്ള ഗോത്രവർഗക്കാരുടെ കാർഷിക ഭൂമിക്ക് രേഖകൾ ഒന്നും തന്നെയില്ലായെന്നും ഇർഫാൻ അൻസാരി കൂട്ടിച്ചേർത്തു.
