താനെ: മഹാരാഷ്ട്രയിലെ പൽഘർ ജില്ലയിൽ നിന്ന് 14 വയസുകാരിയെ തട്ടിക്കൊണ്ടുപോയി ബലാത്സംഗം ചെയ്ത കേസിൽ 25 കാരന് ഏഴ് വർഷം കഠിന തടവ്. ഇന്ത്യൻ ശിക്ഷാ നിയമം 363(തട്ടിക്കൊണ്ടുപോകൽ), 376(ബലാത്സംഗം) എന്നീ വകുപ്പുകൾ പ്രകാരമാണ് ശിക്ഷ വിധിച്ചത്.
പ്രതി ഹിരലാൽ മധ്യപ്രദേശിലെ ദൗസങ്കാബാദ് സ്വദേശിയാണ്. പെൺകുട്ടി യുവാവുമായി പ്രണയത്തിലായിരുന്നുവെന്നും സ്കൂളിൽ പോകുകയാണെന്ന വ്യാജേന പെൺകുട്ടി യുവാവിനൊപ്പം നാട് വിടുകയായിരുന്നുവെന്നും അഭിഭാഷകൻ കോടതിയെ അറിയിച്ചു. മകളെ കാണാതായതിനെ തുടർന്ന് പെൺകുട്ടിയുടെ മാതാപിതാക്കൾ യുവാവിനെതിരെ പരാതി നൽകുകയായിരുന്നു. പ്രായപൂർത്തിയാകാത്ത പെൺകുട്ടിയെ മാതാപിതാക്കളുടെ നിയമപരമായ രക്ഷാകർതൃത്വത്തിൽ നിന്ന് തട്ടികൊണ്ടുപോയി ബലാത്സംഗം ചെയ്തു എന്ന് കോടതി നിരീക്ഷിച്ചു.
