ഭോപ്പാൽ : പ്രധാനമന്ത്രി നരേന്ദ്ര മോദി പ്രഖ്യപിച്ച 'ജനത കർഫ്യൂ'വിനോട് പൂർണ്ണമായി സഹകരിച്ച് മധ്യപ്രദേശ്. കൊറോണ വൈറസിനെതിരായ പോരാട്ടത്തിൽ പ്രധാനമന്ത്രി ആഹ്വാനം ചെയ്ത 'ജനത കർഫ്യൂ' കണക്കിലെടുത്ത് മധ്യപ്രദേശിലെ ആളുകൾ വീടിനകത്ത് തുടരുകയാണ്. തെരുവുകൾ വിജനമാണ്. റോഡരികിലെ കടകളും ഭക്ഷണശാലകളും അടഞ്ഞുകിടക്കുകയാണ്. കൊവിഡ്-19ന്‍റെ വ്യാപനം തടയുന്നതിനുള്ള സാമൂഹിക അകലം പാലിക്കുന്നതിന്‍റെ ഭാഗമായി പ്രധാനമന്ത്രി ഞായറാഴ്ച രാവിലെ 7 നും രാത്രി 9 നും ഇടയിലാണ് 'ജനത കർഫ്യൂ' ആഹ്വാനം ചെയ്തത്.
മധ്യപ്രദേശിൽ മാർച്ച് 20നാണ് ആദ്യ കൊവിഡ് 19 ബാധ സ്ഥിരീകരിക്കുന്നത്. അതിനുശേഷം മാർച്ച് 21 മുതൽ ജബൽപൂർ, രേവ, സിയോണി, നർസിംഗ്പൂർ എന്നീ നാല് ജില്ലകൾ പൂർണ്ണമായി ലോക്ഡൗൺ ചെയ്യതു. ജബൽപൂർ നഗരത്തിലെ 4 പേർക്കാണ് വൈറസ് ബാധ സ്ഥിരീകരിച്ചത്. ഇവരിൽ 3 പേർ ദുബായിൽ നിന്ന് മടങ്ങിയെത്തിയ ഒരു കുടുംബത്തിലെ അംഗങ്ങളും ഒരാൾ ജർമ്മനിയിൽ നിന്ന് മടങ്ങിയെത്തിയ ആളുമാണ്. ഇതോടനുബന്ധിച്ച് സ്കൂളുകൾ, സിനിമാ ഹാളുകൾ, മ്യൂസിയങ്ങൾ എന്നിവ അടച്ചുപൂട്ടുകയും പല ജില്ലകളിലെയും പാസഞ്ചർ ബസുകളുടെ സർവ്വീസുകൾ നിർത്തലാക്കുകയും ചെയ്തു.
