ചെന്നൈ: ബുറെവി ചുഴലിക്കാറ്റ് കടന്നുപോകാനിരിക്കുന്ന പശ്ചാത്തലത്തില്‍ തമിഴ്‌നാടിന്‍റെയും പുതുച്ചേരിയുടെയും വിവിധ ഭാഗങ്ങളിൽ ഇന്നലെ രാത്രി മുതല്‍ ശക്തമായ മഴ പെയ്യുകയാണ്. ബുറെവി ചുഴലിക്കാറ്റ് തെക്കൻ തമിഴ്‌നാട് തീരത്തും പാമ്പനും കന്യാകുമാരിക്കും ഇടയിലാകുമെന്ന് ഇന്ത്യൻ കാലാവസ്ഥ വകുപ്പ് (ഐഎംഡി) അറിയിച്ചു. 70-80 കിലോമീറ്റർ വേഗതയിൽ വടക്കൻ ശ്രീലങ്കയിൽ ഉണ്ടായ കൊടുങ്കാറ്റ് 90 കിലോമീറ്റർ വേഗതയിൽ ഇന്ന് ഉച്ചയോടെ പാമ്പന് അടുത്തായിരിക്കുമെന്ന് ഐഎംഡി അറിയിച്ചു. ഉച്ചകഴിഞ്ഞ് ഇത് പടിഞ്ഞാറൻ തെക്ക് പടിഞ്ഞാറോട്ട് പാമ്പൻ പ്രദേശത്തുകൂടി നീങ്ങുകയും തെക്കൻ തമിഴ്‌നാട് തീരം കടന്ന് പാമ്പനും കന്യാകുമാരിയ്ക്കും ഇടയിലാകുമെന്നും ഐഎംഡി വ്യക്തമാക്കി.
തിരുവാരൂർ ജില്ലയിലെ കോടവാസൽ, നാഗപട്ടണം, വേദരണ്യം, കാരൈക്കൽ, തിരുതുരൈപൂണ്ടി, രാമനാഥപുരത്തെ മുഡുകുലത്തൂർ എന്നിവ ഉൾപ്പെടെയുള്ള പ്രദേശങ്ങളിൽ ബുധനാഴ്ച രാത്രി മുതൽ പരമാവധി 20 സെന്‍റീമീറ്റർ വരെ മഴ ലഭിച്ചു. ബുറെവി ചുഴലിക്കാറ്റിനെ തുടർന്നുണ്ടായ മണ്ണിടിച്ചിലിന്‍റെ പശ്ചാത്തലത്തിൽ തമിഴ്‌നാട്ടിലെയും കേരളത്തിലെയും ജനങ്ങൾക്ക് സാധ്യമായ എല്ലാ സഹായങ്ങളും നൽകുമെന്ന് ആഭ്യന്തരമന്ത്രി അമിത് ഷാ പറഞ്ഞു.
