ഇന്‍ഡോര്‍: പുതിയ പാർലമെന്‍റ് മന്ദിരത്തില്‍ സ്ഥാപിച്ച അശോകസ്‌തംഭത്തിന്‍റെ രൂപകല്‍പനയില്‍ കേന്ദ്രസർക്കാർ കൃത്രിമം കാണിച്ചുവെന്ന ആരോപണം നിലനില്‍ക്കുന്ന സാഹചര്യത്തില്‍ പ്രതികരണവുമായി ദിനനാഥ് ഭാർഗവയുടെ കുടുംബം രംഗത്ത്. ഇന്ത്യയുടെ യഥാർഥ ദേശീയ ചിഹ്നം രൂപകല്പന ചെയ്‌ത സംഘത്തിലെ സഹ കലാകാരനായിരുന്നു ദിനനാഥ് ഭാർഗവ. യഥാർഥ അശോകസ്‌തംഭത്തിലെ സിംഹങ്ങള്‍ സമാധാനപ്രേമികളാണെന്നും പുതിയ സ്‌തംഭത്തിലെ സിംഹങ്ങളെ രൂക്ഷമായ രൂപത്തിലാണ് ചിത്രീകരിച്ചിരിക്കുന്നതെന്നും അദ്ദേഹത്തിന്‍റെ ഭാര്യ പ്രഭ ഭാർഗവ ഇടിവി ഭാരതിനോട് പറഞ്ഞു.
'അന്ന് സമാധാനപരമായ സമയമായിരുന്നു. ഇന്നത്തെ പോലെ എല്ലാവരും മറ്റുള്ളവരെ വലിച്ചുതാഴെയിടുന്ന തിരക്കിലായിരുന്നില്ല അന്ന്. ആരുണ്ടാക്കിയാലും ഉണ്ടാക്കിയതാണ്. ഭരണഘടനയുടെ ആദ്യ പേജില്‍ സിംഹങ്ങളെ സമാധാനം പ്രതിഫലിപ്പിക്കുന്ന തരത്തിൽ പെയിന്‍റ് ചെയ്യണം എന്ന് അക്കാലത്ത് ഭാർഗവ സാഹബ് ആഗ്രഹിച്ചിരുന്നു.
പുതിയ സ്‌തംഭത്തില്‍ സിംഹങ്ങളെ ഉഗ്രരൂപികളായിട്ടാണ് കാണിച്ചിരിക്കുന്നതെന്ന് കേട്ടിട്ടുണ്ട്. ഞാന്‍ അത് കണ്ടിട്ടില്ല. എങ്കിലും അവർക്ക് ഇത് മികച്ചതാക്കാമായിരുന്നുവെന്ന് ഞാൻ കരുതുന്നു' - പ്രഭ ഇടിവി ഭാരതിനോട് പറഞ്ഞു.
അശോക സ്‌തംഭത്തിന്‍റെ ദൗത്യം നിറവേറ്റുന്നതിനായി, ദിനനാഥ് ഭാർഗവ സിംഹങ്ങളെ സൂക്ഷ്‌മമായി നിരീക്ഷിക്കാൻ മൂന്ന് മാസത്തോളം കൊൽക്കത്തയിലെ ഒരു മൃഗശാല സന്ദർശിച്ചിരുന്നു. ശാന്തരായി നില്‍ക്കുന്ന സിംഹങ്ങള്‍ക്ക് പകരം പുതിയ പാർലമെന്‍റ് മന്ദിരത്തിന് മുകളിൽ സ്ഥാപിച്ചിരിക്കുന്ന ദേശീയ ചിഹ്നത്തില്‍ സിംഹങ്ങളെ ആക്രമണാത്മായ മുഖഭാവത്തോടെ രൂപകല്പന ചെയ്‌തതില്‍ പ്രതിപക്ഷം കേന്ദ്ര സര്‍ക്കാരിനെതിരെ വിമര്‍ശനം ഉന്നയിച്ചിരുന്നു.
പ്രധാനമന്ത്രി മോദിയുടെ മേൽനോട്ടത്തിലാണ് പുതിയ അശോകസ്‌തംഭം തയാറാക്കിയത്. വളരെ കുറച്ച് മാറ്റങ്ങൾ മാത്രമാണ് വരുത്തിയതെന്നും ഇത് യഥാർഥ സൃഷ്‌ടിയുമായി 99 ശതമാനം സാമ്യമുള്ളതാണെന്നുമാണ് പുതിയ സ്‌തംഭത്തിന്‍റെ ആർക്കിടെക്റ്റ്, സുനിൽ ഡിയോർ അവകാശപ്പെടുന്നത്. ഇന്ത്യൻ ഭരണഘടനയുടെ കൈയെഴുത്തുപ്രതിയെ അലങ്കരിക്കുന്ന ദേശീയ ചിഹ്നം രൂപകൽപ്പന ചെയ്‌ത സംഘത്തിന്‍റെ ഭാഗമായിരുന്നു അന്തരിച്ച ദിനനാഥ് ഭാർഗവ.
ഉത്തർപ്രദേശിലെ സാരാനാഥിൽ ബിസി 250 മുതലുള്ള പുരാതന ശിൽപമായ 'ലയൺ ക്യാപിറ്റൽ ഓഫ് അശോക'യിൽ നിന്ന് പ്രചോദനം ഉൾക്കൊണ്ടാണ് സംഘം അശോകസ്‌തംഭം രൂപകല്‍പ്പന ചെയ്‌തത്. 'ഇന്ത്യയുടെ ആദ്യ പ്രധാനമന്ത്രി ജവഹർലാൽ നെഹ്‌റു ഭരണഘടനയുടെ യഥാർഥ കൈയെഴുത്ത് പ്രതി രൂപകല്പന ചെയ്യാനുള്ള ചുമതല രവീന്ദ്രനാഥ ടാഗോറിന്‍റെ ശാന്തിനികേതന്‍റെ കലാഭവൻ പ്രിൻസിപ്പലിനും പ്രശസ്‌ത ചിത്രകാരൻ നന്ദലാൽ ബോസിനും നൽകിയിരുന്നുവെന്നും പ്രഭ പറഞ്ഞു.
യഥാർഥ ചിത്രം ഇപ്പോഴും കുടുംബത്തിന്‍റെ കൈവശമുണ്ട്. വിവാദങ്ങൾക്കിടയിൽ, ഭാർഗവ വരച്ച യഥാർഥ ചിത്രം ഭാർഗവയുടെ കുടുംബം പങ്കുവച്ചു. അശോകസ്‌തംഭം ഇന്ത്യയുടെ ദേശീയ ചിഹ്നമാണ്, ഇത് യഥാർഥത്തിൽ അശോക ചക്രവർത്തി ശ്രീബുദ്ധന്‍റെ സമാധാന സന്ദേശം പ്രചരിപ്പിക്കാൻ ഉപയോഗിച്ചിരുന്നു. അശോകസ്‌തംഭങ്ങളുടെ മുകൾഭാഗത്ത് കാണുന്ന നാല് സിംഹങ്ങൾ ധൈര്യം, ശക്തി, ആത്മവിശ്വാസം, അഭിമാനം എന്നിവയെ പ്രതിനിധീകരിക്കുന്നു.
പാസ്‌പോർട്ട് മുതൽ കറൻസി വരെ ഇന്ത്യയിലെ എല്ലാ ഔദ്യോഗിക രേഖകളിലും അശോകസ്‌തംഭം ഉണ്ട്. ഭരണഘടനയുടെ ചിഹ്നത്തിൽ ഈ ചിത്രം ഉപയോഗിക്കേണ്ടതിനാൽ, സിംഹം തന്‍റെ പെണ്ണിനും കുട്ടിക്കുമൊപ്പം ശാന്തമായി ഇരിക്കുന്നതായി ചിത്രീകരിച്ചു. ഈ കലാസൃഷ്‌ടി സ്വർണ ഇലകൾ കൊണ്ട് വരച്ചതാണ്, കൂടാതെ സിംഹങ്ങളുടെ വായ ചെറുതായി തുറന്നിരിക്കുന്നു, അവയുടെ പല്ലുകളും ദൃശ്യമാണ്.
പെയിന്‍റിംഗിന്‍റെ അടിഭാഗത്ത് 'സത്യമേവ ജയതേ' എന്ന് സ്വർണത്തിൽ എഴുതിയിരിക്കുന്നുവെന്നും പ്രഭ പറഞ്ഞു. ഭരണഘടനയ്ക്കായി ഭാര്‍ഗവ രൂപകൽപ്പന ചെയ്‌ത കലാസൃഷ്‌ടിയുടെ ഓർമ നിലനിർത്താൻ മധ്യപ്രദേശിലെ ഏതെങ്കിലും ആർട്ട് ഗാലറി, അല്ലെങ്കിൽ മ്യൂസിയം എന്നിവക്ക് ഭാർഗവയുടെ പേര് നൽകണമെന്ന് മരുമകള്‍ ആവശ്യപ്പെട്ടു. വിഷയത്തിൽ നിരവധി നേതാക്കൾ കുടുംബത്തിന് ഉറപ്പ് നൽകിയിട്ടും ഈ ആവശ്യം നാളിതുവരെ പാലിക്കപ്പെട്ടിട്ടില്ലെന്നും അവർ പറഞ്ഞു.
മധ്യപ്രദേശിലെ ബേത്തുൽ പട്ടണത്തിലാണ് ദിനനാഥ് ഭാർഗവ ജനിച്ചത്. 2016 ഡിസംബർ 24-ന് 89-ാം വയസിൽ ഇൻഡോറിൽ വച്ച് അദ്ദേഹം അന്തരിച്ചു.
