ന്യൂഡൽഹി: ഒരു വര്‍ഷമായിട്ടും രാജസ്ഥാന്‍ കോണ്‍ഗ്രസിലെ ആഭ്യന്തര പ്രശ്‌നങ്ങള്‍ പരിഹരിയ്ക്കാത്തതില്‍ അതൃപ്‌തനാണെന്ന റിപ്പോര്‍ട്ടുകള്‍ക്കിടെ രാജസ്ഥാന്‍ മുന്‍ ഉപ മുഖ്യമന്ത്രി സച്ചിന്‍ പൈലറ്റ് ഡല്‍ഹിയിലെത്തി. പ്രശ്നങ്ങൾ ഹൈക്കമാൻഡിനെ അറിയിക്കാനാണ് സച്ചിൻ ഡല്‍ഹിയിലെത്തിയതെന്നാണ് സൂചന. എന്നാല്‍ ഉത്തര്‍പ്രദേശിലെ പ്രമുഖ നേതാവ് ജിതിന്‍ പ്രസാദ കോണ്‍ഗ്രസില്‍ നിന്ന് രാജി വച്ച് ബിജെപിയില്‍ ചേര്‍ന്നതിന്‍റെ ഞെട്ടല്‍ മാറുന്നതിന് മുന്‍പേ സച്ചിൻ പൈലറ്റ് ഡല്‍ഹിയിലെത്തിയാണ് അഭ്യൂഹങ്ങൾക്ക് കാരണം.
സച്ചിന്‍റെ ലക്ഷ്യമെന്ത്
പാര്‍ട്ടിയ്ക്ക് തലവേദനയായി ഒരു വര്‍ഷത്തിന് ശേഷം രാജസ്ഥാന്‍ കോണ്‍ഗ്രസില്‍ വീണ്ടും അസ്വാരസ്യങ്ങള്‍ പുകഞ്ഞ് തുടങ്ങിയതായാണ് സൂചന. വെള്ളിയാഴ്‌ച ഡല്‍ഹിയില്‍ എത്തിയ പൈലറ്റ് ഞായറാഴ്‌ച വരെ രാജ്യ തലസ്ഥാനത്ത് തുടരും. പ്രിയങ്ക ഗാന്ധിയെയോ രാഹുൽ ഗാന്ധിയെയോ സന്ദർശിക്കാൻ തനിക്ക് പദ്ധതിയില്ലെന്ന് പൈലറ്റ് വ്യക്തമാക്കിയിട്ടുണ്ടെങ്കിലും രാജസ്ഥാന്‍റെ ചുമതലയുള്ള അജയ് മാക്കൻ ഇക്കാര്യം നിഷേധിച്ചില്ല.
കോണ്‍ഗ്രസില്‍ പൈലറ്റിന് അതൃപ്‌തിയുണ്ടോയെന്ന ചോദ്യത്തിന് ഉണ്ടായിരുന്നെങ്കില്‍ ഈ കൂടിക്കാഴ്‌ച സാധ്യമാകുമായിരുന്നില്ലെന്നാണ് മാക്കൻ മാധ്യമങ്ങളോട് പറഞ്ഞത്. രാജസ്ഥാൻ മന്ത്രിസഭയിലും പാർട്ടി നേതൃസ്ഥാനങ്ങളിലുമുള്ള ഒഴിവുകള്‍ നികത്താനുള്ള എല്ലാ ശ്രമങ്ങളും നടക്കുന്നുണ്ടെന്നും അദ്ദേഹം വ്യക്തമാക്കി.
Also read: പാർട്ടിക്കുള്ളില്‍ അഭിപ്രായ ഭിന്നത; യുപി മുഖ്യമന്ത്രിയുടെ ഡൽഹി സന്ദർശനം ഫലം കാണുമോ?
പൈലറ്റ് ബിജെപിയിലേക്ക്?
കോണ്‍ഗ്രസില്‍ സച്ചിന്‍ പൈലറ്റ് അതൃപ്‌തനാണെന്ന ബിജെപി നേതാവ് റിത ബഹുഗുണയുടെ പ്രസ്‌താവന അടുത്തിടെ വിവാദമായിരുന്നു. സച്ചിന്‍ പൈലറ്റുമായി സംസാരിച്ചെന്നും ബിജെപിയില്‍ പൈലറ്റ് ഉടന്‍ ചേരുമെന്നുമായിരുന്നു റിത പറഞ്ഞത്. എന്നാല്‍ റിതയുടെ അവകാശവാദത്തെ തള്ളി പൈലറ്റ് രംഗത്തെത്തി. അവര്‍ സംസാരിച്ചത് സച്ചിന്‍ ടെന്‍ഡുല്‍ക്കറോടായിരിയ്ക്കുമെന്നും തന്നോട് സംസാരിയ്ക്കാനുള്ള ധൈര്യം അവര്‍ക്കില്ലെന്നുമായിരുന്നു പൈലറ്റിന്‍റെ പ്രതികരണം.
Also read: മുകുള്‍ റോയ് വീണ്ടും തൃണമൂല്‍ കോണ്‍ഗ്രസില്‍; പിതാവിനെ പിന്തുടര്‍ന്ന് മകനും
അടുത്ത വര്‍ഷം നടക്കാനിരിയ്ക്കുന്ന ഉത്തര്‍പ്രദേശ് നിയമസഭ തെരഞ്ഞെടുപ്പിനെ നേരിടാന്‍ ഒരുങ്ങുന്നതിനിടെ ജിതിന്‍ പ്രസാദ ബിജെപിയില്‍ ചേര്‍ന്നത് കോണ്‍ഗ്രസിന് തിരിച്ചടിയായിരുന്നു. ജ്യോതിരാദിത്യ സിന്ധ്യയ്ക്കും ജിതിന്‍ പ്രസാദിനും പിന്നാലെ സച്ചിന്‍ പൈലറ്റും ബിജെപിയില്‍ ചേരുമെന്ന അഭ്യൂഹങ്ങള്‍ ഇതിന് പിന്നാലെയാണ് ഉയര്‍ന്ന് വന്നത്.
മുഖ്യമന്ത്രി അശോക് ഗെലോട്ടുമായി സ്വരചേര്‍ച്ചയിലല്ല സച്ചിന്‍ പൈലറ്റ്. കഴിഞ്ഞ വര്‍ഷം ഗെലോട്ടുമായി കൊമ്പ് കോര്‍ത്തതിനെ തുടര്‍ന്നുണ്ടായ ആഭ്യന്തര കലഹവും ഒടുവില്‍ പാര്‍ട്ടി വിടാനുള്ള നീക്കവും പ്രിയങ്ക ഗാന്ധിയുടെ നേതൃത്വത്തില്‍ ഇടപെട്ടാണ് പരിഹരിച്ചത്.
