അഹമ്മദാബാദ്: ഗുജറാത്തി ഹൊറർ ത്രില്ലർ ചിത്രം 'വാഷ്' ഹിന്ദി റീമേക്കിനൊരുങ്ങുന്നു. ക്വീൻ സംവിധായകൻ വികാസ് ബാല്‍ സംവിധാനം ചെയ്യുന്ന ചിത്രത്തില്‍ നായകനായെത്തുന്നത് അജയ് ദേവ്ഗണ് ആണ്.
ബ്ലോക്ക്ബസ്‌റ്റര്‍ ഹിറ്റായി മാറിയ ചിത്രം അണിയറയില്‍ ഒരുങ്ങുന്ന സമയം സിനിമയ്‌ക്കായി ഒരു നിര്‍മാതാവിനെ കിട്ടാന്‍ വലിയ ബുദ്ധിമുട്ടായിരുന്നു. സിനിമ പൂര്‍ത്തിയായ ശേഷം, ചിത്രം കാണാന്‍ നിയോഗിച്ച സെൻസർ ബോർഡ് ഉദ്യോഗസ്ഥയെ 'വാഷ്' ഞെട്ടിച്ചു!
'വാഷി'നെ കുറിച്ച് നിർമാതാവ് കൂടിയായ സംരംഭകൻ കൽപേഷ് സോണി പ്രതികരിച്ചു. 'ഇത്തരത്തിലുള്ള സിനിമയ്ക്ക്, സർക്കാർ സബ്‌സിഡി ലഭിക്കില്ല. എങ്കിലും ഞങ്ങള്‍ക്കതില്‍ പ്രശ്‌നമില്ല. ചിത്രം ഞങ്ങള്‍ സെൻസർ ബോർഡിന് അയച്ചപ്പോള്‍, അത് കാണേണ്ടി വന്ന വനിത ഉദ്യോഗസ്ഥ ഞെട്ടിപ്പോയി.. 'എന്തിനാ ഒരു കൊച്ചു പെൺകുട്ടിയെ ഇങ്ങനെ പീഡിപ്പിക്കുന്നത്' എന്നായിരുന്നു ഉദ്യോഗസ്ഥയുടെ പ്രതികരണം. സിനിമയിലെ ഇരയായി അഭിനയിക്കുന്ന നടിയെ ഉദ്ദേശിച്ചാണ് ഉദ്യോഗസ്ഥ ഇപ്രകാരം പറഞ്ഞത്.' -കൽപേഷ് സോണി പറഞ്ഞു.
നന്മയും തിന്മയും തമ്മിലുള്ള പോരാട്ടത്തിന്‍റെ കാലാതീതമായ ഒരു കഥയാണ് 'വാഷ്' പറയുന്നത്. അഥർവയും (ഹിതു കനോഡിയ) അവന്‍റെ കുടുംബവും നീതിയുടെ ശക്തികളെ ഉൾക്കൊള്ളുമ്പോള്‍, പ്രതാപ് (ഹിതൻ കുമാർ) തിന്‍മയെ പ്രതീകപ്പെടുത്തുന്നു. സ്നേഹം, കുടുംബം, ത്യാഗം എന്നിവയുടെ പര്യവേക്ഷണത്തിലൂടെ, തിന്മയ്‌ക്കെതിരായ നന്മയുടെ വിജയത്തെ ഈ സിനിമ ഹൈലൈറ്റ് ചെയ്യുന്നു. ഈ ശക്തമായ സന്ദേശം പ്രേക്ഷകരെ പ്രചോദിപ്പിക്കുന്നു.
സിനിമയിലെ തന്‍റെ വേഷത്തെ കുറിച്ച് മുതിർന്ന ഗുജറാത്തി നടൻ ഹിതൻ കുമാറും പ്രതികരിക്കുന്നു. 'ചിലപ്പോൾ ചില വേഷങ്ങൾ ഒരു നടനെന്ന നിലയിൽ നിങ്ങളെ ഭയപ്പെടുത്തും. ഇത് അത്തരത്തില്‍ ഒന്നായിരുന്നു.' -ഹിതന്‍ കുമാര്‍ പറഞ്ഞു.
'ഏകദേശം മൂന്ന് പതിറ്റാണ്ടുകളായി ഞാന്‍ സെറ്റിൽ ഉണ്ട്. എന്നാൽ ഈ വേഷം വ്യത്യസ്‌തമായിരുന്നു. കാരണം ഞാൻ ഒരു എതിരാളിയായി അഭിനയിച്ചതിനാൽ എനിക്ക് നിർദയനായിരിക്കേണ്ടി വന്നു. കൂടാതെ, ഇതു പോലൊരു സിനിമയ്ക്ക്, നിർമാതാക്കളെ ബോർഡിൽ കൊണ്ടുവരിക എന്നത് ഏറ്റവും ബുദ്ധിമുട്ടുള്ള കാര്യമാണ്. സാധാരണ ഫാമിലി എന്‍റര്‍ടെയ്‌നര്‍ അല്ലാത്ത ഒരു സിനിമ നിർമിക്കാൻ ധൈര്യം വേണം.' -ഹിതന്‍ കുമാര്‍ കൂട്ടിച്ചേര്‍ത്തു.
വാഷ് സംവിധായകൻ കൃഷ്‌ണദേവ് യാഗ്നികും സിനിമയെ കുറിച്ച് പ്രതികരിച്ചു. 'ഞാൻ ഡ്രൈവ് ചെയ്യുമ്പോൾ ആയിരുന്നു ഈ സിനിമയുടെ ആശയം എനിക്ക് കിട്ടിയത്. ഡ്രൈവ് ചെയ്യുമ്പോള്‍ എനിക്ക് മുന്നിൽ ഒരു കാർ ഉണ്ടായിരുന്നു. എനിക്ക് അതിനെ മറികടക്കാൻ കഴിഞ്ഞില്ല. എനിക്ക് കാർ നിയന്ത്രിക്കാനോ അല്ലെങ്കിൽ കാര്യങ്ങൾ നേടാനുള്ള അമാനുഷിക ശക്തിയോ ഉണ്ടായിരുന്നെങ്കിൽ എന്ന് അപ്പോള്‍ ഞാൻ ആഗ്രഹിച്ചു. അടുത്ത ദിവസം തന്നെ ഞാൻ ഈ സിനിമയുടെ വൺലൈനർ എഴുതുകയും ഒടുവിൽ തിരക്കഥ വികസിപ്പിക്കുകയും ചെയ്‌തു.
ബോക്‌സോഫിസിൽ മികച്ച പ്രകടനം കാഴ്‌ചവയ്‌ക്കുകയും ഇപ്പോൾ ഹിന്ദിയിലേക്ക് റീമേക്ക് ചെയ്യുകയും ചെയ്യുന്നതിനാൽ, നിർമാതാക്കൾ അടുത്തിടെ അഹമ്മദാബാദിൽ സിനിമയുടെ വിജയം ആഘോഷിച്ചിരുന്നു.
പനോരമ സ്‌റ്റുഡിയോസിന്‍റെ ബാനറില്‍, അജയ് ദേവ്ഗൺ, കുമാർ മംഗത്, അഭിഷേക് പഥക് (മംഗത്തിന്‍റെ മകന്‍) എന്നിവർ ചേര്‍ന്നാണ് സിനിമയുടെ നിർമാണം. ഒരു ത്രില്ലിംഗ് സിനിമാറ്റിക് അനുഭവം നൽകുമെന്ന് വാഗ്‌ദാനം നല്‍കുന്ന ചിത്രത്തിന്‍റെ റീമേക്കിനും വാനോളമാണ് പ്രതീക്ഷകള്‍.
Also Read: പേടിപ്പെടുത്തി ആത്മാക്കളും പ്രേതഭവനവും; '1920 ഹൊറേഴ്‌സ് ഓഫ്‌ ദ ഹാര്‍ട്ട്' ട്രെയിലര്‍ പുറത്ത്
