ലക്‌നൗ: യുപിയില്‍ ഓടിക്കൊണ്ടിരുന്ന ട്രെയിനില്‍ യുവതിക്ക് നേരെ ആസിഡ്‌ ആക്രമണം. വ്യാഴാഴ്‌ച വൈകുന്നരം ഔറയ്യയില്‍ നിന്നും ഇറ്റാവാഹിലുള്ള ഭര്‍ത്താവിന്‍റെ വീട്ടിലേക്ക് പോകവേയാണ് യുവതിയെ മൂന്നംഗ സംഘം ആക്രമിച്ചത്. ആക്രമണ ശേഷം പ്രതികള്‍ ട്രെയിനില്‍ നിന്നും ചാടി രക്ഷപെട്ടതായി പൊലീസ് പറഞ്ഞു.
പൂര്‍വവൈരാഗ്യമാണ് ആക്രമണത്തിന് പിന്നിലെന്നാണ് സൂചന. ദിവസങ്ങള്‍ക്ക് മുന്‍പ് യുവതിയുടെ സഹോദരനും പ്രതികളും തമ്മില്‍ തര്‍ക്കമുണ്ടായിരുന്നു. പിന്നീട് പ്രതികള്‍ സഹോദരനെ കള്ളക്കേസില്‍ കുടുക്കി.
ദുസ്സെഹ്രയിലുള്ള സ്വന്തം വീട് സന്ദര്‍ശിക്കുന്നതില്‍ യുവതിയേയും പ്രതികള്‍ ഭിഷണിപ്പെടുത്തിയിരുന്നു. ഇതിന്‍റെ പേരില്‍ യുവതി പൊലീസില്‍ പരാതിയും നല്‍കിയിരുന്നു. പരാതി നല്‍കി മൂന്നാം ദിവസമാണ് ആക്രമണമുണ്ടായത്.
സംഭവത്തില്‍ പ്രത്യേക സംഘത്തെ രൂപീകരിച്ച് അന്വേഷണം ആരംഭിച്ചതായി എസ്‌പി അപര്‍ണ ഗൗതം അറിയിച്ചു. ഗുരുതരമായി പൊള്ളലേറ്റ യുവതിയെ ചികിത്സക്കായി ആശുപത്രിയില്‍ പ്രവേശിപ്പിച്ചു.
