ചെന്നൈ: സമൂഹത്തിലെ സാമ്പത്തികമായ വ്യത്യാസങ്ങളും ജാതി വ്യവസ്ഥയും എടുത്തു കാട്ടുന്ന ഒന്നാണ് ഗ്രാമങ്ങളിലെ കുടിലുകൾ. ഓരോ സമൂഹത്തിലും ഉണ്ടാകുന്ന സംഘട്ടനങ്ങളിൽ ഇരയാക്കപ്പെടുന്നതും ഈ കുടിലുകളിൽ താമസിക്കുന്ന പാവം ജനവിഭാഗങ്ങളാണ്. കുടിലുകൾ ഇല്ലാത്ത സംസ്ഥാനം എന്നത് ഓരോ സംസ്ഥാന സർക്കാരുകളുടെയും വെല്ലുവിളിയാണ്. ദാരിദ്ര്യത്തിന്‍റെ പ്രതീകമായി കുടിലുകളെ കണക്കാക്കുന്നുണ്ട്.
ഇന്ത്യ സന്ദർശിക്കുന്ന വിദേശീയരിൽ നിന്ന് ഈ കുടിലുകളെ മറച്ചുവെക്കാനാണ് മതിലുകൾ നിർമിച്ച് ഈ പ്രദേശം മറക്കപ്പെടുന്നത്. കുടിലുകളെ താമസയോഗ്യമായ നല്ലയിനം വീടുകളാക്കി മാറ്റുകയാണ് പഞ്ചായത്ത് മുൻ ചെയർമാനായ ഷൺമുഖം. തമിഴ്‌നാട്ടിലെ കോയമ്പത്തൂര്‍ ജില്ലയിലുള്ള മേട്ടുപാളയത്തിനടുത്ത ഒടന്തുറൈ ഗ്രാമത്തിലേക്ക് പ്രവേശിക്കുമ്പോൾ ഒരേ രീതിയിൽ നിർമിച്ച കോൺക്രീറ്റ് വീടുകളാണ് നമുക്ക് കാണാനാകുക. സോളാർ വൈദ്യുതിയും കുടിവെള്ള പൈപ്പ് കണക്ഷനുകളുമുള്ള വീടുകളാണ് ഗ്രാമത്തിലുള്ളത്. വർഷത്തിൽ എട്ട് ലക്ഷം യുണിറ്റ് കറണ്ട് ഉൽപാദിക്കുന്ന വിന്‍റ്മില്ലിൽ നിലവിൽ ഗ്രാമത്തിൽ പ്രവർത്തിക്കുന്നത്. പഞ്ചായത്തിലെ ആവശ്യങ്ങള്‍ കഴിച്ചുള്ള അധിക വൈദ്യുതി സംസ്ഥാന സര്‍ക്കാരിന്‍റെ ഉടമസ്ഥതയിലുള്ള വൈദ്യുത കമ്പനിക്ക് വില്‍ക്കുകയും ചെയ്യുന്നുണ്ട്.
തന്‍റെ രണ്ട് ഏക്കർ ഭൂമി ഹരിത ഭവനത്തിനായി വിട്ടുകൊടുക്കുന്നതിനൊപ്പം പലരും കൈവശപ്പെടുത്തിയ ഭൂമി ഹരിത ഭവന നിർമാണത്തിന് വാങ്ങി നൽകാനും ഷൺമുഖത്തിന് സാധിച്ചു. കോലാഹലങ്ങൾ ഇല്ലാതെയാണ് സ്വന്തം ഗ്രാമത്തെ കുടിൽ രഹിതമാക്കി ഷൺമുഖം മാറ്റിയത്. ഗ്രാമങ്ങളിൽ വികസം ഉണ്ടായാൽ മാത്രമേ ഇന്ത്യക്ക് സൂപ്പർ പവർ ആകാൻ കഴിയൂവെന്ന് ഷൺമുഖം അഭിപ്രായപ്പെടുന്നു. ഗ്രാമങ്ങളെ അവഗണിച്ചാൽ ഇന്ത്യയുടെ വളര്‍ച്ച പരിമിതപ്പെട്ട് പോകുമെന്നും അദ്ദേഹം ചൂണ്ടിക്കാട്ടുന്നു.
ഷൺമുഖം നടത്തിയ ഓരോ പ്രവർത്തനങ്ങളും ഗ്രാമത്തിന്‍റെ പുരോഗതിയെ നല്ല രീതിയിൽ സ്വാധീനിച്ചിട്ടുണ്ട്. നിര്‍മല്‍ പുരസ്‌കാരം, രാജീവ് ഗാന്ധി പരിസ്ഥിതി പുരസ്‌കാരം എന്നിങ്ങനെ നിരവധി പുരസ്‌കാരങ്ങളാണ് ഈ പഞ്ചായത്ത് ഇതുവരെ നേടിയെടുത്തിട്ടുള്ളത്. ഒരു പഞ്ചായത്ത് പ്രസിഡന്‍റ് എന്ന നിലയിൽ നിന്നുകൊണ്ട് സ്വന്തം ഗ്രാമത്തെ മാറ്റുകയാണ് ഷൺമുഖം ചെയ്‌തത്. ഗ്രാമ വികസനത്തിന്‍റെ പ്രതീകമായി മാറുകയായിരുന്നു ഷൺമുഖം.
