ന്യൂഡല്‍ഹി : 'ഗ്രീന്‍ ഡല്‍ഹി' അപ്ലിക്കേഷനിലൂടെ ലഭിച്ച പരാതികളുടെ അടിസ്ഥാനത്തില്‍ ഡല്‍ഹിയിലെ 150 മലിനീകരണ കേന്ദ്രങ്ങള്‍ കണ്ടെത്തിയെന്ന് പരിസ്ഥിതി മന്ത്രി ഗോപാല്‍ റായ്. 'ആപ്പിൽ ലഭിച്ച പരാതികളുടെ അടിസ്ഥാനത്തിൽ ഡൽഹിയിലെ 150 മലിനീകരണ ഹോട്ട്സ്പോട്ടുകള് കണ്ടെത്തി. ഈ പ്രദേശങ്ങളിൽ നിന്ന് നിരവധി പരാതികളാണ് ലഭിച്ചത്,' ഗോപാല്‍ റായ് പറഞ്ഞു.
27,000 പരാതികളിൽ 23,000ത്തിൽ അധികം പരാതികള്‍ പരിഹരിച്ചു. മുനിസിപ്പൽ കോർപ്പറേഷനുകൾ, ഡൽഹി വികസന അതോറിറ്റി, പൊതുമരാമത്ത് വകുപ്പ് എന്നിവയുമായി ബന്ധപ്പെട്ടതാണ് മിക്ക പരാതികളുമെന്ന് അദ്ദേഹം വ്യക്തമാക്കി. മലിനീകരണമുണ്ടാക്കുന്ന പ്രവര്‍ത്തനങ്ങളെ കുറിച്ചുള്ള പരാതികൾ ഫലപ്രദമായി പരിഹരിക്കുന്നതിനായി സര്‍ക്കാര്‍ പുറത്തിറക്കിയ ആപ്പാണ് 'ഗ്രീൻ ഡൽഹി'.
Also read: വായു മലിനീകരണം 40% ഇന്ത്യക്കാരുടെയും ആയുർദൈർഘ്യം കുറയ്ക്കുമെന്ന് റിപ്പോർട്ട്
മലിനീകരണത്തിനെതിരായ പ്രവർത്തനങ്ങളുടെ നിരീക്ഷണത്തിനും ഏകോപനത്തിനുമായി 'ഗ്രീൻ വാർ റൂം' എന്ന പദ്ധതിയും കഴിഞ്ഞ വർഷം ഡല്‍ഹി സര്‍ക്കാര്‍ ആരംഭിച്ചിരുന്നു. രോഹിണി, ദ്വാരക, ഓഖ്ല ഫേസ് -2, പഞ്ചാബി ബാഗ്, ആനന്ദ് വിഹാർ, വിവേക് വിഹാർ, വസീർപൂർ, ജഹാംഗീർപുരി, ആർകെ പുരം, ബവാന, മുണ്ട്ക, നരേല, മായാപുരി എന്നിവിടങ്ങളിലെ മലിനീകരണമുണ്ടാക്കുന്ന കേന്ദ്രങ്ങള്‍ നേരത്തേ കണ്ടെത്തിയിരുന്നു.
കേന്ദ്ര മലിനീകരണ നിയന്ത്രണ ബോർഡും ഡൽഹി മലിനീകരണ നിയന്ത്രണ അതോറിറ്റിയും നടത്തിയ പരിശോധനകളിലാണ് 13 കേന്ദ്രങ്ങൾ തിരിച്ചറിഞ്ഞത്.
