ന്യൂഡൽഹി : കേന്ദ്ര സർക്കാരിനോട് വിയോജിക്കുന്ന പ്രതിപക്ഷ നേതാക്കൾക്കും പൗരന്മാർക്കുമെതിരായ നിർബന്ധിത ക്രിമിനൽ നടപടികളുടെ വർദ്ധനവ് ചൂണ്ടിക്കാട്ടി സുപ്രീം കോടതിയിൽ ഹർജി നൽകി കോണ്‍ഗ്രസ് ഉൾപ്പടെയുള്ള 14 പ്രതിപക്ഷ രാഷ്ട്രീയ പാർട്ടികൾ. സംയുക്‌തമായാണ് പ്രതിപക്ഷ പാർട്ടികൾ ഹർജി സമർപ്പിച്ചിരിക്കുന്നത്. ഹർജി സുപ്രീം കോടതി അടുത്ത മാസം അഞ്ചിന് പരിഗണിക്കും.
ഇന്ത്യൻ നാഷണൽ കോണ്‍ഗ്രസ്, ഡിഎംകെ, ആർജെഡി, ബിആർഎസ്, ടിഎംസി, എഎപി, എൻസിപി, ശിവസേന, ജെഎംഎം, ജെഡിയു, സിപിഎം, സിപിഐ, സമാജ്‌വാദി പാർട്ടി, ജമ്മു കശ്‌മീർ നാഷണൽ കോണ്‍ഫറൻസ് എന്നീ പാർട്ടികളാണ് ഹർജി നൽകിയിരിക്കുന്നത്. ചീഫ് ജസ്റ്റിസ് ഡി വൈ ചന്ദ്രചൂഡിന്‍റെ നേതൃത്വത്തിലുള്ള ബഞ്ചിന് മുമ്പാകെയാണ് ഹർജി സമർപ്പിച്ചത്.
രാഷ്ട്രീയ വിയോജിപ്പുകളെ പൂർണമായും തകർക്കാൻ ലക്ഷ്യമിട്ട് സിബിഐ, ഇഡി തുടങ്ങിയ അന്വേഷണ ഏജൻസികളെ കേന്ദ്രസർക്കാർ ആയുധമാക്കുന്നു എന്നാണ് ഹർജിയിലെ പ്രധാന ആരോപണം. 2013-2014 കാലയളവിൽ ഇഡി രജിസ്റ്റർ ചെയ്‌ത കേസുകളുടെ എണ്ണം അപേക്ഷിച്ച് 2019 ആയപ്പോഴേക്കും കേസുകൾ കുത്തനെ ഉയർന്നു.
2019-ൽ നിന്ന് 2020-21 കാലയളവെത്തിയപ്പോൾ കേസുകളുടെ എണ്ണം 981ആയി. എന്നാൽ 2021-22 ആയപ്പോഴേക്കും കേസുകൾ 1180 ആയെന്നും ഹർജിയിൽ ആരോപിക്കുന്നു. ഇത്രയൊക്കെ കേസുകൾ രജിസ്റ്റർ ചെയ്‌തിട്ടും കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) വെറും 23 ശിക്ഷാവിധികൾ മാത്രമേ നടപ്പിലാക്കിയിട്ടുള്ളുവെന്നും ഹർജിയിൽ ചൂണ്ടിക്കാട്ടുന്നു.
2004-14 കാലഘട്ടത്തിൽ സിബിഐ അന്വേഷിച്ച കേസുകളിലെ 72 രാഷ്ട്രീയ നേതാക്കളിൽ 43 പേർ (60% ൽ താഴെ) പ്രതിപക്ഷത്തിൽ നിന്നുള്ളവരായിരുന്നു. എന്നാൽ ഇപ്പോൾ അതേ കണക്ക് 95 ശതമാനമായി ഉയർന്നുവെന്നും ഹർജിയിൽ പറയുന്നു. ഇഡിയുടെ അന്വേഷണത്തിലും ഇതേ രീതിയാണ് പ്രതിഫലിക്കുന്നത്. 2014ന് മുൻപ് പ്രതിപക്ഷ നേതാക്കളുടെ അനുപാതം 54 ശതമാനമായിരുന്നെങ്കിൽ 2014ശേഷം അത് 95 ശതമാനമാണ്.
ഗുരുതരമായ ദേഹോപദ്രവം ഉൾപ്പെടാത്ത (നരഹത്യ, ബലാത്സംഗം, എന്നിവ ഒഴികെയുള്ള) കുറ്റകൃത്യങ്ങളിൽ വ്യക്തികളുടെ അറസ്റ്റ്, റിമാൻഡ്, ജാമ്യം എന്നിവ നിയന്ത്രിക്കുന്നതിന്‌ മാർഗരേഖ വേണമെന്നും പ്രതിപക്ഷ പാർട്ടികൾ ഹർജിയിൽ ആവശ്യപ്പെട്ടിട്ടുണ്ട്. അറസ്റ്റിനും റിമാൻഡിനുമായി ഇഡി, പൊലീസ്, കോടതി എന്നിവ ഉൾപ്പെട്ട ട്രിപ്പിൾ ടെസ്റ്റ് ഉപയോഗിക്കണമെന്നും പ്രതിപക്ഷ പാർട്ടികൾ ആവശ്യപ്പെട്ടു.
നീക്കം രാഹുലിനെതിരായ നടപടിക്ക് പിന്നാലെ: രാഹുൽ ഗാന്ധിക്കെതിരായ കേസിനും എംപി സ്ഥാനത്ത് നിന്ന് അയോഗ്യനാക്കിയ നടപടിക്കും പിന്നാലെയാണ് പ്രതിപക്ഷ പാർട്ടികളുടെ നീക്കം. രാഹുലിനെതിരായ കേന്ദ്ര സർക്കാർ നടപടിക്കെതിരെ പ്രതിപക്ഷ നേതാക്കൾ ഒന്നടങ്കം കേന്ദ്ര സർക്കാരിനെതിരെ രംഗത്തെത്തിയിരുന്നു.
അതേസമയം ഇന്ത്യയുടെ ശബ്‌ദത്തിനായി പോരാടുമെന്നും ഇതിനാൽ എന്ത് വില കൊടുക്കാനും താൻ തയ്യാറാണെന്നുമായിരുന്നു രാഹുലിന്‍റെ പ്രതികരണം. സാമൂഹ്യ മാധ്യമങ്ങളിലൂടെയാണ് തനിക്കെതിരായ നടപടിയില്‍ അദ്ദേഹം നിലപാട് വ്യക്തമാക്കിയത്.
'മോദി’ പരാമർശത്തിലെ അപകീർത്തിക്കേസില്‍ സൂറത്ത് ചീഫ് ജുഡീഷ്യല്‍ മജിസ്ട്രേറ്റ് രണ്ടുവർഷം തടവുശിക്ഷ ഇന്നലെയാണ് (മാര്‍ച്ച് 23) വിധിച്ചത്. ഈ കോടതി ഉത്തരവ് പുറത്തുവന്നതിന് പിന്നാലെയാണ് രാഹുല്‍ ഗാന്ധിയെ എംപി സ്ഥാനത്തുനിന്നും അയോഗ്യനാക്കിക്കൊണ്ടുള്ള ലോക്‌സഭ സെക്രട്ടേറിയറ്റിന്‍റെ നടപടി.
