Suicide Capsule: ಸಣ್ಣ ಯಂತ್ರದಂತೆ ವಿನ್ಯಾಸಗೊಳಿಸಲಾದ 'ಸುಸೈಡ್ ಕ್ಯಾಪ್ಸುಲ್' ಸಹಾಯದಿಂದ ಸ್ವಿಟ್ಜರ್ಲೆಂಡ್ನಲ್ಲಿ ವ್ಯಕ್ತಿಯೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಹಾಗಾಗಿ, ಈ 'ಆತ್ಮಹತ್ಯೆ ಕ್ಯಾಪ್ಸುಲ್' ಇದೀಗ ವಿಶ್ವಾದ್ಯಂತ ಸಂಚಲನ ಮೂಡಿಸಿದೆ.
ಇದು ಹೇಗೆ ಕೆಲಸ ಮಾಡುತ್ತೆ?: ಆತ್ಮಹತ್ಯೆ ಮಾಡಿಕೊಳ್ಳುವ ವ್ಯಕ್ತಿ ಆ ಸ್ಥಳಕ್ಕೆ ಹೋಗುತ್ತಾರೆ. ಸುಸೈಡ್ ಕ್ಯಾಪ್ಸುಲ್ನಲ್ಲಿ ಮಲಗಲು ಸಿಬ್ಬಂದಿ ಸೂಚಿಸುತ್ತಾರೆ. ವ್ಯಕ್ತಿ ಅದರಲ್ಲಿ ಮಲಗಿದ ಬಳಿಕ ಕ್ಯಾಪ್ಸುಲ್ ಮುಚ್ಚಲಾಗುತ್ತದೆ. ಮುಚ್ಚಿದ ಕ್ಯಾಪ್ಸುಲ್ನಲ್ಲಿ ಮಲಗಿರುವ ವ್ಯಕ್ತಿ ಅದರಲ್ಲಿರುವ ಸಾರಜನಕ ಅನಿಲ ಹರಡುವ ಗುಂಡಿಯನ್ನು ತಾವೇ ಒತ್ತುತ್ತಾರೆ. ಆಗ ಆತ ನಿದ್ರೆಗೆ ಜಾರುತ್ತಾರೆ. ಬಳಿಕ ಕೆಲವೇ ನಿಮಿಷಗಳಲ್ಲಿ ಉಸಿರುಗಟ್ಟಿ ಸಾವನ್ನಪ್ಪುತ್ತಾರೆ. ನೋವಿಲ್ಲದೆ ಆತ್ಮಹತ್ಯೆ ಮಾಡಿಕೊಳ್ಳುವವರಿಗೆ ಕಂಪನಿಯೊಂದು ಈ ಕ್ಯಾಪ್ಸುಲ್ ತಯಾರಿಸಿದೆ. ಆದರೆ ಇದರಿಂದ ಸಾಕಷ್ಟು ಮಂದಿ ಆತ್ಮಹತ್ಯೆ ಮಾಡಿಕೊಳ್ಳುವ ಭಯ, ಆತಂಕ ಎದುರಾಗಿದೆ.
ಪೊಲೀಸರಿಂದ ಕಠಿಣ ಕ್ರಮ: ಸ್ವಿಟ್ಜರ್ಲೆಂಡ್ ಪೊಲೀಸರು ಹೊಸ 'ಆತ್ಮಹತ್ಯಾ ಕ್ಯಾಪ್ಸುಲ್'ನಲ್ಲಿ ವ್ಯಕ್ತಿಯೊಬ್ಬನ ಅನುಮಾನಾಸ್ಪದ ಸಾವು ಪ್ರಕರಣಕ್ಕೆ ಸಂಬಂಧಿಸಿದಂತೆ ಕ್ರಿಮಿನಲ್ ಪ್ರಕರಣ ದಾಖಲಿಸಿ ಈಗಾಗಲೇ ಹಲವರನ್ನು ಬಂಧಿಸಿದ್ದಾರೆ.
ಸ್ಕಾಫ್‌ಹೌಸೆನ್ ಕ್ಯಾಂಟನ್ ಪ್ರದೇಶದಲ್ಲಿನ ಪ್ರಾಸಿಕ್ಯೂಟರ್‌ಗಳಿಗೆ ಕಾನೂನು ಸಂಸ್ಥೆಯೊಂದು ಸೋಮವಾರ ಅರಣ್ಯ ಪ್ರದೇಶದಲ್ಲಿರುವ ಕ್ಯಾಬಿನ್‌ನಲ್ಲಿ ಕ್ಯಾಪ್ಸುಲ್ ಬಳಸಿ ಆತ್ಮಹತ್ಯೆ ಸಂಭವಿಸಿದೆ ಎಂದು ಮಾಹಿತಿ ನೀಡಿದ್ದಾಗಿ ಪೊಲೀಸರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಆತ್ಮಹತ್ಯೆಗೆ ಸಹಕರಿಸಿದ ಶಂಕೆಯ ಮೇರೆಗೆ ಹಲವರನ್ನು ಸೆರೆ ಹಿಡಿಯಲಾಗಿದ್ದು, ಪ್ರಾಸಿಕ್ಯೂಟರ್‌ಗಳು ತನಿಖೆ ಆರಂಭಿಸಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
'ಸಾರ್ಕೊ' ಬಳಕೆಯನ್ನು ಸೆರೆ ಹಿಡಿಯಲು ಬಯಸಿದ ಮಾಧ್ಯಮ ಛಾಯಾಗ್ರಾಹಕರಲ್ಲಿ ಒಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. ಈ ಬಗ್ಗೆ ಹೆಚ್ಚಿನ ವಿವರಗಳನ್ನು ಪೊಲೀಸರು ನೀಡಿಲ್ಲ.
ಸುಸೈಡ್ ಕ್ಯಾಪ್ಸುಲ್ ಬೆಲೆ ಎಷ್ಟು?: ನೆದರ್ಲ್ಯಾಂಡ್ಸ್ ಮೂಲದ ಅಸಿಸ್ಟೆಡ್ ಸೂಸೈಡ್ ಪ್ರೊವೈಡರ್ ಎಕ್ಸಿಟ್ ಇಂಟರ್‌ನ್ಯಾಶನಲ್ ತಾನು '3D-ಪ್ರಿಂಟೆಡ್' ಸಾಧನವನ್ನು ಅಭಿವೃದ್ಧಿಪಡಿಸಿದೆ ಎಂದು ಹೇಳಿದೆ. ಇದನ್ನು ಅಭಿವೃದ್ಧಿಪಡಿಸಲು 1 ಮಿಲಿಯನ್‌ ಅಮೆರಿಕನ್‌ ಡಾಲರ್‌ಗಿಂತಲೂ ಹೆಚ್ಚು ವೆಚ್ಚವಾಗಿರುವುದಾಗಿಯೂ ತಿಳಿಸಿದೆ.
ಕಾನೂನು ಹೇಳುವುದೇನು?: ರಾಜ್ಯ ಪ್ರಾಸಿಕ್ಯೂಟರ್ ಪೀಟರ್ ಸ್ಟಿಚ್ಟರ್ ಅವರು ಎಕ್ಸಿಟ್ ಇಂಟರ್‌ನ್ಯಾಶನಲ್‌ನ ವಕೀಲರಿಗೆ ಆತ್ಮಹತ್ಯೆ ಕ್ಯಾಪ್ಸುಲ್ ಬಳಸಿದರೆ ಕ್ರಿಮಿನಲ್ ಮೊಕದ್ದಮೆಗಳನ್ನು ಎದುರಿಸಬೇಕಾಗುತ್ತದೆ ಎಂದು ಈ ಹಿಂದೆ ಎಚ್ಚರಿಕೆ ನೀಡಿದ್ದರು. ಇಂಥ ಪ್ರಕರಣಗಳಿಗೆ ಸ್ವಿಟ್ಜರ್ಲೆಂಡ್ನಲ್ಲಿ ಕನಿಷ್ಠ ಐದು ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಬಹುದು.
(ನಿಮ್ಮಲ್ಲಿ ಆತ್ಮಹತ್ಯೆಯ ಆಲೋಚನೆಗಳಿದ್ದರೆ ಅಥವಾ ನೀವು ತೀವ್ರ ಚಿಂತೆ, ಭಯಕ್ಕೆ ಒಳಗಾಗಿದ್ದರೆ ಅಥವಾ ನಿಮಗೆ ಭಾವನಾತ್ಮಕ ಬೆಂಬಲ ಬೇಕಿದ್ದರೆ ಸ್ನೇಹ ಫೌಂಡೇಶನ್ - 04424640050 (24x7 ಲಭ್ಯವಿದೆ) ಅಥವಾ ಐಕಾಲ್, ಟಾಟಾ ಇನ್‌ಸ್ಟಿಟ್ಯೂಟ್ ಆಫ್ ಸೋಶಿಯಲ್ ಸೈನ್ಸಸ್ ಸಹಾಯವಾಣಿ - 9152987821 ಸೋಮವಾರದಿಂದ ಶನಿವಾರದವರೆಗೆ ರಾತ್ರಿ 8ರಿಂದ ರಾತ್ರಿ 11ರವರೆಗೆ ಲಭ್ಯವಿರುತ್ತದೆ.)
